ހުޅުމާލެ ފުރަތަމަ ފިޔަވަހީގެ ނިރޮޅުމަގުގައި މިއަދު މަޑުކޮށްގެން އޮތް ޕިކަޕެއްގެ ދޮރު ހުޅުވާލި ވަގުތު، އެ ދޮރުގައި ސައިކަލެއް ޖެހި، ސައިކަލު ދުއްވަން އިން މީހައަށް އަނިޔާވެއްޖެއެވެ.
ފުލުހުން މީޑިއާތަކަށް ހިއްސާކުރި މައުލޫމާތުގައި ބުނެފައިވަނީ، ނިރޮޅުމަގުގައި މަޑުކޮށްގެން އޮތް ޕިކަޕެއްގެ ދޮރު ހުޅުވި ވަގުތު ދޮރުގައި ސައިކަލެއް ޖެހިފައިވާކަމުގެ ރިޕޯޓް ފުލުހުންނަށް ލިބިފައިވަނީ ހަވީރު 16:04 އެހައިކަންހާއިރު ކަމަށެވެ.
މި އެކްސިޑެންޓުގައި ސައިކަލު ދުއްވަން އިން 27 އަހަރުގެ ދިވެހި ފިރިހެނަކަށް ވަނީ އަނިޔާވެފައެވެ. ނަމަވެސް، އޭނާއަށް ސީރިއަސް އަނިޔާއެއް ލިބިފައި ނުވާކަމަށް ފުލުހުން މައުލޫމާތު ދެއެވެ.
މި ހާދިސާއާ ގުޅިގެން ބަލަންޖެހޭ ކަންކަން ފުލުހުން މިހާރު ދަނީ އިތުރަށް ތަހުގީގު ކުރަމުންނެވެ.
މާލެ ސަރަހައްދުގައި އެކްސިޑެންޓުތައް އިތުރުވެފައިވާއިރު، ހުޅުމާލޭގެ ދެ ފިޔަވަހީގައި ވެސް ނުރައްކާތެރި އެކްސިޑެންޓުތައް ހިނގައި، މީހުން މަރުވެފައި ވެސްވެއެވެ. އެގޮތުން އޯގަސްޓު 29 ވަނަ ދުވަހުގެ ރޭ، ހުޅުމާލެ ދެވަނަ ފިޔަވަހީގެ ހިތިގަސްމަގު، ވިނަރެސް ޓަވަރު-7 ކައިރީ ހިނގި ނުރައްކާތެރި އެކްސިޑެންޓެއްގައި ނުވަ އަހަރުގެ އަންހެން ކުއްޖަކު ވަނީ މަރުވެފައެވެ.
އެ އެކްސިޑެންޓު ހިނގީ، މަގުގެ އެއްފަރާތުގައި މަޑުކޮށްފައި އޮތް ކާރެއްގެ ޑްރައިވަރު، ކާރަށް އަރަން އުޅުމުގެ ތެރޭގައެވެ. އެ ވަގުތު އެ ކާރު އޯވަޓޭކް ކުރަން ދިޔަ ސައިކަލު އެ މީހާގެ ގައިގައި ޖެހި، ސައިކަލު މަގުގެ ކަނާތްފަރާތު ލޭނަށް ވެއްޓިފައިވާ ކަމަށް ފުލުހުން ބުންޏެވެ. އަދި އެ ވަގުތު އެ ލޭނުން ދުއްވާފައި އައި އެހެން ކާރަކަށް ކުއްލިއަކަށް މަޑުކުރަން ފުރުސަތު ނުލިބި، ސައިކަލުގެ ފަހަތުގައި އިންދައި ވެއްޓުނު، އުމުރުން ނުވަ އަހަރުގެ ކުއްޖާގެ ގައިގައި ޖެހިފައިވާ ކަމަށް ނުވަތަ އެ ކުއްޖާގެ ގައިމައްޗަށް ކާރު އަރާފައިވާ ކަމަށް ތަހުގީގަށް ބެލެވޭ ކަމަށް ފުލުހުން މައުލޫމާތު ދީފައިވެއެވެ.
އެ އެކްސިޑެންޓްގައި އަނިޔާވި ކުއްޖާ މަރުވީ، އައިޖީއެމް ހޮސްޕިޓަލުގައި ފަރުވާދެމުން ދަނިކޮށް މިދިޔަ މަހުގެ އެއްވަނަ ދުވަހުގެ ފަތިހުގެ ވަގުތެއްގައެވެ.