އިދިކޮޅު ޕާޓީ އެމްޑީޕީގެ ކޮންގްރެސްއަށް މާލޭ ސިޓީ ކައުންސިލުގެ ޓައުންހޯލް ދޫކުރީ އެ އޮންނަ އުސޫލުން އެމްޑީޕީން ފައިސާ ދެއްކުމުން ކަމަށް، މޭޔަރު އާދަމް ޢާޒިމް މިއަދު ވިދާޅުވެއްޖެއެވެ.
އެމްޑީޕީގެ ކޮންގްރެސް ބާއްވާނެ އެއްވެސް ތަނެއް ނުލިބުމުގެ ސަބަބުން، ބުރާސްފަތި ދުވަހުން ފެށިގެން އިއްޔެގެ ނިޔަލަށް އޮތް އެ ޕާޓީގެ ކޮންގްރެސް އެންމެ ފަހުން ބޭއްވީ މާލޭ ސިޓީ ކައުންސިލުގެ ހޯލުގައެވެ.
އެމްޑީޕީގެ ކޮންގްރެސް ފެށި ދުވަހު ސިޓީ ކައުންސިލުތަކުގެ މޭޔަރުންނަށާއި ރަށު ކައުންސިލުތަކުގެ ރައީސުންނަށް އެލްޖީއޭގެ ސީއީއޯ މުޙައްމަދު ނިމާލް ފޮނުއްވި ސިޓީގައިވަނީ ކައުންސިލުތަކުގެ އިދާރާގެ ގޯތިތަކާއި ކައުންސިލުތަކުގެ ނަންތަކުގައި ދަފުތަރުކޮށް އާންމު ޚިދުމަތްތަކަށް ކަނޑައަޅައިފައިވާ ބިންތަކުގައި ސިޔާސީ ޕާޓީތަކުގެ ފިކުރުތައް ދިރުވައި އާލާކުރުމަކީ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނުގެ އަސާސްތަކާ ޚިލާފަށް ކުރެވޭ ކަމެއް ކަމަށެވެ.
ނިމާލްގެ ސިޓީގައި ވަނީ، ކައުންސިލުތަކުގެ މުދާތަކާއި ވަސީލަތްތައް ސިޔާސީ ޕާޓީއެއް ޕްރޮމޯޓުކުރުމަށް ނުވަތަ ވަކި ބަޔަކަށް މަންފާވާ ގޮތަށް ބޭނުން ނުކުރުމަށާއި ކައުންސިލުތަކުގެ ބިންތަކުގައި ސިޔާސީ ހަރަކާތްތައް ނުހިންގުމަށް އަންގަވައިފައެވެ.
ނިމާލް ފޮނުއްވި ސިޓީއާ ގުޅިގެން 'ސަން'އިން ސުވާލުކުރުމުން ޢާޒިމް ވިދާޅުވީ މިހާރު ވެސް އެކި ހަފުލާތަކަށާއި އިވެންޓުތަކަށް ސަލްޓަން ޕާކާއި ލޮނުޒިޔާރަތް ޕާކާއި އާޓިފިޝަލް ބީޗު ފަދަ ތަންތަން ކުއްޔަށް ދޫކުރާ ކަމަށެވެ. އޭގެ ތެރެއިން ވެސް އާންމުކޮށް ސިޔާސީ އެކި އެއްވުންތައް ބާއްވަން އާޓިފިޝަލް ބީޗު މިހާރު ވެސް ދޫކުރަނީ ކުއްޔަށް ކަން ޢާޒިމް ފާހަގަކުރެއްވިއެވެ.
"އެހެންވީމާ ރޭގެ ކޮންގްރެސް މި ތަނުގައި [މާލޭ ސިޓީ ކައުންސިލުގެ ޓައުންހޯލުގައި] ބޭއްވިގެން މި ދިޔައީ ސީދާ ލާރި ދައްކައިގެން، ކޮމާޝަލް ރޭޓުގައި، [އެމްޑީޕީއަށް] ހިލޭ ދިން ތަނެއް ނޫން މިއީ،" އޭނާ ވިދާޅުވިއެވެ.
އެމްޑީޕީއަކީ ސަރުކާރުން ސިޔާސީ ޕާޓީތަކަށް ކަނޑައަޅައިފައިވާ ބަޖެޓުގެ ތެރެއިން ލިބޭ ފައިސާއިން ޚަރަދުކޮށްގެން ހިންގާ ބޮޑު ޕާޓީއެއްކަން ޢާޒިމް ފާހަގަކުރެއްވިއެވެ. އެހެންކަމުން އާންމު ކުންފުންޏަކަށް ނުވަތަ ވުޒާރާއަކަށް މާލޭ ސިޓީ ކައުންސިލުގެ ޓައުންހޯލު ކުއްޔަށް ދޫކުރުމެކޭ އެމްޑީޕީއަށް ކުއްޔަށް ދޫކުރުމެކޭ މާ ބޮޑު ތަފާތެއް ނެތް ކަމަށް ވިދާޅުވިއެވެ.
އެއާއެކު ޢާޒިމް ވަނީ ނަހަމަގޮތުގައި ކައުންސިލުން އެއްވެސް ބިމެއް ދޫނުކުރާނެކަމުގެ ޔަގީންކަން ވެސް ދެއްވައިފައެވެ.
ކައުންސިލުތަކަށް ނިމާލް ފޮނުއްވި ސިޓީގައި އިތުރަށް ލިޔުއްވައިފައިވާ ގޮތުގައި ކައުންސިލުތަކުގެ އެންމެހައި މުދާތަކާއި ވަސީލަތްތައް ކައުންސިލުތަކުން ބޭނުންކުރަންވާނީ އެ އިދާރާތަކަށް މަތިކޮށްފައިވާ ޒިންމާތައް އަދާކުރުމަށެވެ.
"އަދި ކައުންސިލު އިދާރާއަކީ ރައްޔިތުން ޚިދުމަތް ހޯދުމަށް އަންނަ މުހިއްމު އިދާރާއެއްކަމުން އެފަދަ ތަންތަނުގައި ސިޔާސީ ހަރަކާތްތައް ހިންގުމަކީ ރައްޔިތުންގެ ހިތުގައި ނުތަނަވަސްކަން އުފެދިގެންދާނެ ކަމެއް ކަމުގައި ވެސް ދެކެމެވެ،" ނިމާލް ފޮނުއްވި ސިޓީގައި ލިޔުއްވައިފައިވެއެވެ.
އިދިކޮޅު އެމްޑީޕީން ކޮންގްރެސް ބާއްވަން އެދުމުން ސަރުކާރުގެ އިދާރާތަކުން ތަނެއް ދީފައިނުވާއިރު، ވެރިކަންކުރާ ޕީއެންސީގެ ކޮންގްރެސްއަށް ޒުވާނުންގެ މަރުކަޒާއި އެ ސަރަހައްދުގެ ތިން މަދަރުސާއެއް ދޫކުރިއެވެ. އެހެންވެ އެކަމަށް އެމްޑީޕީން ފާޑުކިޔައިފައިވެއެވެ.
މިހާރު މި ހިނގާ ދައުރުގެ މާލޭ ސިޓީ ކައުންސިލުގެ ސާފު އަޣުލަބިއްޔަތު އޮންނަނީ އިދިކޮޅު އެމްޑީޕީގައެވެ.