އިދިކޮޅު އެމްޑީޕީގެ ކޮންގްރެސް މާލޭ ސިޓީ ކައުންސިލުގެ ހޯލުގައި ބާއްވަމުން ދަނިކޮށް، ކައުންސިލުތަކުގެ އިދާރާތަކުގެ ގޯތިތަކުގައި ސިޔާސީ ޕާޓީތަކުގެ ފިކުރުތައް ޕްރޮމޯޓުކުރުން ގާނޫނުގެ އަސާސްތަކާ ޚިލާފު ކަމަށް ބުނެ، އެ ބިންތަކުގައި ސިޔާސީ ހަރަކާތްތައް ނުހިންގަން އަންގައި ކައުންސިލުތަކުގެ ބެލެނިވެރި ލޯކަލް ގަވަމަންޓް އޮތޯރިޓީ (އެލްޖީއޭ)އިން ކައުންސިލުތަކަށް ސިޓީއެއް ފޮނުވައިފިއެވެ.
ފާހަގަކުރެވޭ ގޮތުގައި އެމްޑީޕީގެ ކޮންގްރެސް ބާއްވާނެ އެއްވެސް ތަނެއް ނުލިބުމުގެ ސަބަބުން އެ ޕާޓީގެ ކޮންގްރެސް އެންމެ ފަހުން ބާއްވައިފައިވަނީ މާލޭ ސިޓީ ކައުންސިލުގެ ހޯލުގައެވެ. މިދިޔަ ބުރާސްފަތި ދުވަހު ފެށި ކޮންގްރެސްގެ މަސައްކަތްތައް ނިންމައިލައިފައިވަނީ މިރޭގެ ވަގުތެއްގައެވެ.
އެމްޑީޕީގެ ކޮންގްރެސް ފެށި ދުވަހު ސިޓީ ކައުންސިލުތަކުގެ މޭޔަރުންނަށާއި ރަށު ކައުންސިލުތަކުގެ ރައީސުންނަށް އެލްޖީއޭގެ ސީއީއޯ މުޙައްމަދު ނިމާލް ފޮނުއްވި ސިޓީގައިވަނީ ކައުންސިލުތަކުގެ އިދާރާގެ ގޯތިތަކާއި ކައުންސިލުތަކުގެ ނަންތަކުގައި ދަފުތަރުކޮށް އާންމު ޚިދުމަތްތަކަށް ކަނޑައަޅައިފައިވާ ބިންތަކުގައި ސިޔާސީ ޕާޓީތަކުގެ ފިކުރުތައް ދިރުވައި އާލާކުރުމަކީ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނުގެ އަސާސްތަކާ ޚިލާފަށް ކުރެވޭ ކަމެއް ކަމަށެވެ.
ކައުންސިލުތަކުގެ އެންމެހައި މުދާތަކާއި ވަސީލަތްތައް ކައުންސިލުތަކުން ބޭނުންކުރަންވާނީ އެ އިދާރާތަކަށް މަތިކޮށްފައިވާ ޒިންމާތައް އަދާކުރުމަށް ކަމަށް ނިމާލްގެ ސިޓީގައިވެއެވެ.
"އަދި ކައުންސިލު އިދާރާއަކީ ރައްޔިތުން ޚިދުމަތް ހޯދުމަށް އަންނަ މުހިއްމު އިދާރާއެއްކަމުން އެފަދަ ތަންތަނުގައި ސިޔާސީ ހަރަކާތްތައް ހިންގުމަކީ ރައްޔިތުންގެ ހިތުގައި ނުތަނަވަސްކަން އުފެދިގެންދާނެ ކަމެއް ކަމުގައި ވެސް ދެކެމެވެ،" ނިމާލް ފޮނުއްވި ސިޓީގައި ލިޔުއްވައިފައިވެއެވެ.
ނިމާލް އިތުރަށް ލިޔުއްވައިފައިވާ ގޮތުގައި ކައުންސިލުތަކުން ފޯރުކޮށްދޭ ޚިދުމަތްތައް ދިނުމުގައި ސިޔާސީ ފިކުރެއް ޕްރޮމޯޓުވާނެހެން ކައުންސިލުތަކުން އަމަލުކުރުމުގެ ސަބަބުން އެ ނިޒާމަށް ރައްޔިތުން ކުރާ އިތުބާރު ގެއްލޭނެއެވެ.
އެހެންކަމުން ކައުންސިލުތަކުގެ މުދާތަކާއި ވަސީލަތްތައް ސިޔާސީ ޕާޓީއެއް ޕްރޮމޯޓުކުރުމަށް ނުވަތަ ވަކި ބަޔަކަށް މަންފާވާ ގޮތަށް ބޭނުން ނުކުރުމަށާއި ކައުންސިލުތަކުގެ ބިންތަކުގައި ސިޔާސީ ހަރަކާތްތައް ނުހިންގުމަށް ކައުންސިލުތަކަށް ނިމާލްގެ ސިޓީގައި ވަނީ އަންގަވައިފައެވެ.
އިދިކޮޅު އެމްޑީޕީން ކޮންގްރެސް ބާއްވަން އެދުމުން ސަރުކާރުގެ އިދާރާތަކުން ތަނެއް ދީފައިނުވާއިރު، ވެރިކަންކުރާ ޕީއެންސީގެ ކޮންގްރެސްއަށް ޒުވާނުންގެ މަރުކަޒާއި އެ ސަރަހައްދުގެ ތިން މަދަރުސާއެއް ދޫކުރިއެވެ. އެހެންވެ އެކަމަށް އެމްޑީޕީން ފާޑުކިޔައިފައިވެއެވެ.