ރައީސުލްޖުމްހޫރިއްޔާ ޑރ. މުޚައްމަދު މުއިއްޒު، ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރުސީއެމް) ގެ މެންބަރުކަމަށް ހ. މީނާޒް، ޝަމްއޫން ހަމީދު މިއަދު އައްޔަންކުރައްވައިފިއެވެ.
ރައީސް އޮފީހުގައި މިއަދު ހެނދުނު ބޭއްވި ޚާއްސަ ރަސްމިއްޔާތެއްގައި، ޝަމްއޫން ހަމީދަށް ކޮމިޝަނުގެ މެންބަރުކަމުގެ ހުވާލައިދެއްވީ ސުޕްރީމް ކޯޓުގެ ފަނޑިޔާރު ޑރ. މުޙައްމަދު އިބްރާހީމްއެވެ. އަދި މަގާމަށް އައްޔަންކުރެއްވި ކަމުގެ ލިޔުން އޭނާއާ ހަވާލުކުރެއްވީ ރައީސް މުއިއްޒުއެވެ.
މީގެ ކުރިންވެސް އެޗްއާރުސީއެމްގައި އިސް މަގާމުތަކެއް ފުރުއްވާފައިވާ ޝަމްއޫން ވަނީ 2010 އިން 2012 އަށް އެ ކޮމިޝަނުގެ އިންވެސްޓިގޭޝަން ޑިޕާޓްމަންޓުގެ ޑިރެކްޓަރުކަން ކުރައްވާފައެވެ. އަދި 2012 އިން 2016 އަށް އެ ކޮމިޝަނުގެ ސެކްރެޓަރީ ޖެނެރަލްގެ މަގާމުވެސް އޭނާ އަދާކުރެއްވިއެވެ.
މީގެ އިތުރުން، ޔުނިވާސަލް ޕީރިއަޑިކް ރިވިއު (ޔޫޕީއާރު) ރިޕޯޓު އެކުލަވާލުމުގައި ކޮމިޝަނުގެ ފޯކަލް ޕޮއިންޓެއްގެ ގޮތުގައި އޭނާ މަސައްކަތްކުރެއްވިއެވެ. އަދި ނުކުޅެދުންތެރިކަން ހުންނަ ކުދިންނަށް ތައުލީމު ހާސިލުކުރުމަށް ހުރި ފުރުސަތުތަކާއި ކުޑަކުދިންގެ ހައްގުތައް ރައްކާތެރިކުރުމާ ގުޅޭގޮތުން ހެދި ގައުމީ ފެންވަރުގެ ދިރާސާތަކުގައިވެސް ޝަމްއޫން މުހިންމު ދައުރެއް އަދާކުރެއްވި ކަމަށް ރައީސް އޮފީހުން ފާހަގަކުރިއެވެ.
އެޗްއާރުސީއެމްގެ މެންބަރުކަމަށް އައްޔަންކުރެއްވުމާ ހަމައަށް ޝަމްއޫން އެންމެ ފަހުން ހުންނެވީ މިނިސްޓްރީ އޮފް ދިވެހި ލެންގުއޭޖް، ކަލްޗާ އެންޑް ހެރިޓޭޖްގެ ޕާމަނަންޓް ސެކްރެޓަރީގެ މަގާމުގައެވެ.