ހައުސިން ޑިވޮލޮޕްމެންޓް ކޯޕަރޭޝަން އެޗްޑީސީގައި ބޭނުންވާ ވަރަށް މުވައްޒަފުން ނެތްކަމަށް އެ ކުންފުނީގެ މެނޭޖިން ޑިރެކްޓަރު އަލީ ޒުހައިރު މިއަދު ވިދާޅުވެއްޖެއެވެ.
ދިވެހިރާއްޖޭގެ އަޑުން ކުރިއަށްގެންދިޔަ 'އަހާށޭ ބުނާނަން' ޕްރޮގްރާމުގައި ވާހަކަދައްކަވަމުން ޒުހައިރު ވިދާޅުވީ، ކުންފުނީގައި މިހާރު 2،400 އަށްވުރެ ގިނަ މުވައްޒަފުން އެބަތިބި ކަމަށެވެ.
ޒުހައިރު ވަނީ އެޗްޑީސީއަކީ ވަރަށް ގިނަ މަސައްކަތްތަކެއް ކުރާ ކުންފުންޏެއް ކަމަށާއި އެޗްޑިސީއަކީ ސެމީ ސްކިލް، ލޭބަރުން ގިނަ އަދި އިދާރީ މަސައްކަތް ބޮޑު ކުންފުންޏެއްކަމަށް ވިދާޅުވެފައެވެ. އެހެންކަމުން އެ ކުންފުނީގެ މުއައްޒަފުންނަކީ ގިނަ ދާއިރާތަކެއްގައި މަސައްކަތްކުރާ ބައެއްކަން އޭނާ ވަނީ ފާހަގަކުރައްވާފައެވެ.
ޒުހައިރު ވަނީ އެޗްޑިސީއާ ހަވާލުކުރެވިފައި ވަނީ ހަމައެކަނި ހުޅުމާލެ ނޫންކަމަށާއި، ތިލަފުއްޓާއި ގުޅީފަޅަކީ ވެސް އެ ކުންފުނިން ހަވާލުވެގެން ބަލަމުންދާ ދެ ރަށްކަން ފާހަގަކުރައްވާފައެވެ. އަދި، ރަސްމާލެ ހިއްކުމުގެ ޕްރޮޖެކްޓުގެ ޓެކްނިކަލް ހުރިހާ މަސައްކަތްތަކެއް ބަލާފައިވާނެކަމަށް އޭވާ ވަނީ ވިދާޅުވެފައެވެ.
ކުންފުނިން ކުރަންޖެހޭ މަސައްކަތްތަކާއި ހަވާލުކޮށްފައިވާ މެންޑޭޓް ބޮޑުކަން ފާހަގަކުރައްވާ އޭނާ ވަނީ މިއަހަރުގެ ތެރޭގައިވެސް އެތައް ހެކްޓަރެއްގެ ބިންތަކެއް އެ ކުންފުންޏަށް އިތުރުވެގެންދިޔަކަމަށް ވިދާޅުވެފައެވެ. އަދި އެ ބިންތައް ވެސް ބެލެހެއްޓުމުގެ ހުރިހާ ކަމެއް ކުރަންޖެހޭކަން އޭނާ ފާހަގަކުރެއްވިއެވެ.
އެހެންވީމަ ކުންފުނީގެ ޒާތުގައި އަޅުގަނޑުމެން ކުންފުންޏަށް ބޭނުންވާ ވަރުގެ މުއައްޒަފުންނެއް އަދިއެއް ނެތް. އެހެންނަމަވެސް އަޅުގަނޑުމެންގެ ކުންފުނީގަ ފުދޭވަރަކަށް މުވައްޒަފުން ގިނަކަމަށް ވަނީ. އެހެންވީމަ ކުންފުނިން މިހާރު މިދަނީ ރިޑެންޑެންސީ ޕޮލިސީއާ އަދި އޭގެ އިތުރަށް ރިޓަޔާމެންޓް ޕޮލިސީ ވެސް އިމްޕްލިމެންޓް ކުރުމުގެ މަސައްކަތް މި ކުރަނީ.އެޗްޑީސީގެ މެނޭޖިން ޑިރެކްޓަރު ބްރިގޭޑިއާ ޖެނެރަލް ރިޓަޔާޑް އަލީ ޒުހައިރު
އޭނާ ވަނީ އެ ކުންފުނީގެ އެންމެ މުހިންމު އަމާޒަކީ ރައްޔިތުންނަށް ދިމާވެފައިވާ ތަކުލީފުތައް ހައްލުކޮށްދިނުން ކަމަށާއި މަގުމަތީގައި ދިމާވާ މައްސަލަތަކާއި ނެޓްވޯކިން މަސައްކަތްތަކުގެ އިތުރުން ބޭނުންވާ ހުސްބިންތައް އޭގެ ޒާތުގައި ތަރައްގީކޮށް ބެލެހެއްޓުމަކީ ކުންފުނިން އެންމެ މުހިންމު އިސްކަމެއްދީގެން ކުރަމުންދާ މަސައްކަތްތައް ކަމަށް އޭނާ ވަނީ ވިދާޅުވެފައެވެ.
އޭނާ ވަނީ ތަރައްގީގެ ތެެރެއިން އިންފްރަސްޓްރަކްޗާ މަސައްކަތަކީ އެންމެ މުހިންމު އެއް ދާއިރާ ކަމަށާއި އެހެންކަމުން އިންފްރަސްޓްރަކްޗާ އޭގެ ޒާތުގައި ނެގެވޭތޯ އެކުންފުނިން މަސައްކަތްކުރަމުންދާ ކަމަށް އޭނާ ވަނީ ވިދާޅުވެފައެވެ.