ހުޅުމާލޭގެ ދުވާރުތަކުގެ މަތީގައި ހިނގާ މީހުންނަށް އުނދަގޫވާނެހެން ގަވާއިދާ ޚިލާފަށް ޕާކުކޮށްފައިވާ އުޅަނދުތައް ޓޯކުރުމުގެ މަސައްކަތް ފުލުހުން މިއަދު ފަށައިފިއެވެ.
ފުލުހުން މިއަދު އެކްސްގައި ކޮށްފައިވާ ޕޯސްޓެއްގައި ވަނީ، ހުޅުމާލޭގެ ދުވާރުތަކުގައި އާންމު ދަތުރުފަތުރަށް ދަތިވާގޮތަށް ޕާކުކޮށްފައިވާ އުޅަނދުތައް ޓޯކުރާ މަންޒަރު ފެންނަ ފޮޓޯތަކެއް އާންމުކޮށްފައެވެ.
އެ މުއައްސަސާއިން ވަނީ، އެގޮތަށް އުޅަނދު ޕާކުކުރުމަކީ ނުރައްކާތެރި އެކްސިޑެންޓްތައް ހިނގަން މެދުވެރިވާ ކަމަކަށް ވާތީ، އާންމު ރައްޔިތުންގެ ސަލާމަތާއި ރައްކާތެރިކަން ކަށަވަރުކުރުމުގެ ގޮތުންނާއި މަގުމަތީގެ އަމާންކަން ދެމެހެއްޓުމަށް ޓަކައި އެފަދަ ސަރަހައްދުތަކުގައި އުޅަނދު ޕާކުނުކުރުމަށް އިލްތިމާސްކޮށްފައެވެ.
ހުޅުމާލޭގައި ދުވާރުމަތީގައި ޕާކުކޮށްފައިވާ އުޅަނދުތައް ނެގުމުގެ މަސައްކަތުގައި ފުލުހުން ހަރަކާތެރިވަނީ --- ފޮޓޯ: ފުލުހުން ފުލުހުން އިއްޔެ ވަނީ ހުޅުމާލޭގެ މަގުތަކުގައި ހިނގާބިނގާވެ އުޅޭ މީހުންނަށް ޚާއްސަކޮށްފައިވާ ދުވާރުތަކުގައާއި، އާންމު ދަތުރުފަތުރަށް ދަތިވާގޮތަށް އުޅަނދު ޕާކުކުރުން އިތުރުވަމުންދާކަން ފާހަގަކުރެވިފައިވާ ކަމަށް ބުނެފައެވެ. އަދި ދުވާރުތަކުގައި އުޅަނދުފަހަރު ޕާކު ކުރާނަމަ އެ އުޅަނދުތަކުގެ ވެރިފަރާތްތަކާ މެދު ފިޔަވަޅު އަޅާނެކަމަށް ފުލުހުން ވަނީ ބުނެފައެެވެ.
ހުޅުމާލޭގެ އިތުރުން މާލޭގެ ބޮޑުތަކުރުފާނު މަގުގައި ގަވާއިދާ ޚިލާފަށް ޕާކުކޮށްފައި ހުންނަ އުޅަނދުތައް ނެގުމުގެ މަސައްކަތް ވެސް ފުލުހުން ވަނީ ފަށާފައެވެ. އެ މަސައްކަތުގެ ތެރެއިން ނުވަ އުޅަނދެއް ޓޯކޮށްފައިވާ ކަމަށް އިއްޔެ ފުލުހުން ވަނީ ބުނެފައެވެ.
މަތުމަތީގައި ގަވައިދާ ޚިލާފަށް ޕާކުކުރާ އުޅަނދުތައް ޓޯކުރާ މައިގަނޑު ސަބަބުތަކުގެ ތެރޭގައި، ހިނގާ މީހުންނަށް ދަތިވާގޮތަށް ދުވާރުމައްޗާއި ކަފިހިހުރަހާއި، ނުކުޅެދުންތެރިކަން ހުންނަ މީހުންނަށް ޚާއްސަ ތަންތަނުގައި ޕާކުކުރުމާއި، މަގުތަކުގެ ކަންމައްޗާއި ދަތުރުފަތުރަށް ހުރަސްއެޅޭގޮތަށް ބެހެއްޓުން ހިމެނެއެވެ.
މީގެ އިތުރުން ޕާކުކުރުން މަނާ ސަރަހައްދުތަކާއި، ސްކޫލް އަދި ހޮސްޕިޓަލްތަކުގެ ގޭޓު ކުރިމަތީގައި ޕާކުކުރުމުންނާއި، ގިނަ ދުވަސްވެ ވީރާނާވާން ދޫކޮށްލާފައިވާ އުޅަނދުތައް ވެސް ފުލުހުން އަންނަނީ ޓޯކުރަމުންނެވެ.