ދުނިޔޭގެ ހިތުގެ ދުވަސް ފާހަގަކުރުމުގެ ގޮތުން ހެލްތު ޕްރޮޓެކްޝަން އޭޖެންސީ (އެޗްޕީއޭ) އާއި ސިއްޙީ ދާއިރާގައި ހަރަކާތްތެރިވާ ގިނަ މުއައްސަސާތަކާއި މަދަނީ ޖަމްއިއްޔާތަކާ ގުޅިގެން ހުޅުމާލެ ފޭސް-2 ގެ ރުއްގަނޑު-3 ސަރަޙައްދުގައި ޚާއްޞަ ހަރަކާތްތަކެއް ކުރިއަށް ގެންގޮސްފިއެވެ.
'ޑޯންޓް މިސް އަ ބީޓް' މި ޝިޢާރުގެ ދަށުން ބޭއްވި މި ހަރަކާތުގެ މައިގަނޑު މަގްސަދަކީ ހިތުގެ ދުޅަހެޔޮކަން ފާހަގަކުރުމާއި، ހިތާއި ލޭނާރުގެ ބަލިތަކާމެދު އާންމުންގެ ހޭލުންތެރިކަން އިތުރުކުރުމެވެ.
މި ހަރަކާތް ޝަރަފުވެރިކޮށްދެއްވީ މިނިސްޓާ އޮފް ހެލްތު، ފެމިލީ އެންޑް ވެލްފެއާ، ގީލާ ޢަލީގެ އިތުރުން ދުނިޔޭގެ ޞިއްޙަތު ޖަމްޢިއްޔާ (ޑަބްލިއުއެޗްއޯ) އިން ދިވެހިރާއްޖެއަށް ކަނޑައަޅުއްވާފައި ހުންނަވާ މަންދޫބު މިސް ޕޭޑެންއެވެ.
ދުނިޔޭގެ ހިތުގެ ދުވަސް ފާހަގަކުރުމުގެ ގޮތުން ހެލްތު ޕްރޮޓެކްޝަން އޭޖެންސީ (އެޗް.ޕީ.އޭ)އިން އިސްނަގައިގެން މިއަދު ހުޅުމާލޭގައި ބޭއްވި ޖަރަކާތުގެ ތެރެއިން ހެލްތް މިނިސްޓަރު ގީލާ... ފޮޓޯ/ ހެލްތް މިނިސްޓްރީމިގެ އިތުރުން މި ހަރަކާތުގައި ސިއްޙަތާބެހޭ ވުޒާރާ، ޓައިނީ ހާޓްސް އޮފް މޯލްޑިވްސް، ދުނިޔޭގެ ސިއްޙަތު ޖަމިއްޔާ، ހައުސިން ޑިވެލޮޕްމެންޓް ކޯޕަރޭޝަން، ނޭޝަނަލް ސެންޓަ ފޯ ކާޑިއޮލަ ވަސްކިއުލަ ޑިޕާޓްމެންޓާއި، ހުޅުމާލެ ހޮސްޕިޓަލް، މޯލްޑިވިއަން ރެޑްކްރެސެންޓް، އަރބަން ޕްރައިމަރީ ހެލްތު ކެއާ ސެންޓަރު، މޯލްޑިވިއަން ފިޒިއޯތެރަޕީ އެސޯސިއޭޝަން، ފެކަލްޓީ އޮފް ހެލްތު ސައިންސް އަދި ނޭޝަނަލް ޑައިބެޓީސް ސެންޓަރުން ބައިވެރިވެފައިވެއެވެ.
މި އިވެންޓުގެ ތެރެއިން އާންމުންނަށް ހިލޭ ހެލްތު ސްކްރީންކުރުމާއި މަޢުލޫމާތު ފޯރުކޮށްދިނުމަށް ތަފާތު ސްޓޯލްތައް ވަނީ ގާއިމުކޮށްފައެވެ. އެގޮތުން ހުޅުމާލެ ހޮސްޕިޓަލުގެ ޕަބްލިކް ހެލްތު ސެންޓަރުން ލޭގެ ޕްރެޝަރާއި ހަކުރު ޗެކްކުރުމުގެ ޚިދުމަތް ދީފައިވާއިރު، އާބަން ޕްރައިމަރީ ހެލްތު ކެއަ ސެންޓަރާއި އެންޑީސީ އަދި އެންސީސީއެސް ގުޅިގެން ވަނީ ހިތާއި ލޭދައުރުވާ ނިޒާމުގެ މޮޑެލްތައް ދައްކާލުމާއި، ކުޑަކުދިންނަށް ޚާއްސަ ކުޅިވަރުތަކާއި ފޭސް ޕެއިންޓިން ކުރިއަށް ގެންގޮސްފައެވެ.
ހަމައެއާއެކު، މޯލްޑިވިއަން ފިޒިއޮތެރަޕީ އެސޯސިއޭޝަނުން ޖިސްމާނީ ހަރަކާތްތަކަށް ތައްޔާރުވެފައިވާ މިންވަރު ދެނެގަތުމުގެ ޓެސްޓުތައް ހެދިއިރު، މޯލްޑިވިއަން ރެޑް ކްރެސެންޓުން ވަނީ ސީޕީއާރް އަދި ފުރަތަމަ އެހީގެ ހަރަކާތްތައް ކުރިއަށް ގެންގޮސްފައެވެ.
މީގެއިތުރުން އެޗްޕީއޭ ޓޮބޭކޯ ކޮންޓްރޯލުން ދުންފަތުގެ އިސްތިއުމާލުކުރުން ހުއްޓާލުމާ ގުޅޭ ލަފައާއި ހޭލުންތެރިކަން ފޯރުކޮށްދީފައިވެއެވެ.
ދުނިޔޭގެ ހިތުގެ ދުވަސް ފާހަގަކުރުމުގެ ގޮތުން ހެލްތު ޕްރޮޓެކްޝަން އޭޖެންސީ (އެޗް.ޕީ.އޭ)އިން އިސްނަގައިގެން މިއަދު ހުޅުމާލޭގައި ބޭއްވި ޖަރަކާތުގެ ތެރެއިން ހެލްތް މިނިސްޓަރު ގީލާ... ފޮޓޯ/ ހެލްތް މިނިސްޓްރީހެލްތު ޕްރޮޓެކްޝަން އެޖެންސީއިން އިސްނަގައިގެން ކުރިއަށް ގެންދިޔަ މި ހަރަކާތުގެ ތެރެއިން، ރާއްޖޭގެ ހުރިހާ ރަށެއްގައި ހިތެއް އެޅުމާއި ފޮޓޯ ނެގުމުގެ ޚާއްސަ ހަރަކާތްތަކެއް ވަނީ ކުރިއަށް ގެންގޮސްފައެވެ.
މި ހަރަކާތުގައި ބައިވެރިން ވަނީ ގައުމީ ފެންވަރުގައި ހިތުގެ ބަލިތަކާ ދެކޮޅަށް މަސައްކަތްކުރުމުގެ އެއްބައިވަންތަކަން ދައްކުވައިދީފައެވެ. އަދި އަމިއްލަ ހިތުގެ ދުޅަހެޔޮކަމަށްޓަކައި ކުރާނެ ކަންކަން ބަޔާންކޮށް 'ޕްރޮމިސް ޓު ހާޓް' ޕްލެޖު ބޯޑުގައި ސޮއިކުރުމުގެ ފުރުސަތު ވެސް ވަނީ ހުޅުވާލާފައެވެ.
ދުނިޔޭގެ ހިތުގެ ދުވަހަކީ ހިތުގެ ބަލިތަކާއި ސްޓްރޯކުން ރައްކާތެރިވުމަށާއި، ހިތުގެ ސިއްހަތާ މެދު އާންމުން ހޭލުންތެރިކުރުވުމުގެ މަގުސަދުގައި ކޮންމެ އަހަރެއްގެ ސެޕްޓެމްބަރު 29 ވަނަ ދުވަހު ފާހަގަކުރާ ދުވަހެކެވެ. މި ދުވަސް ފާހަގަކުރަން ފެށީ 2000 ވަނަ އަހަރު ވޯލްޑް ހާޓް ފެޑަރޭޝަނާއި ދުނިޔޭގެ ސިއްހަތު ޖަމްއިއްޔާ ގުޅިގެންނެވެ.
މި ދުވަސް ފާހަގަކުރުމުގެ މައިގަނޑު ބޭނުމަކީ ދުނިޔޭގައި އެންމެ ގިނައިން މީހުން މަރުވާ ސަބަބު ކަމުގައިވާ ހިތުގެ ބަލިތަކުން ރައްކާތެރިވާނެ ގޮތްތައް އަންގައިދިނުމެވެ. އަދި ފައިދާހުރި ކާނާ ކެއުމާއި، ގަވާއިދުން ކަސްރަތު ކުރުމާއި، ދުންފަތުގެ އިސްތިއުމާލު ނުކުރުން ފަދަ ދުޅަހެޔޮ އާދަތަކަށް ބާރުއެޅުމުގެ އިތުރުން ލޭގެ ޕްރެޝަރާއި، ކޮލެސްޓްރޯލް އަދި ހަކުރުގެ މިންވަރު ގަވާއިދުން ބަލައި ދުރާލާ ބަލި ދެނެގަތުމަށް ހޭލުންތެރިކަން އިތުރުކުރުމެވެ.