މާލޭގެ ބޮޑުތަކުރުފާނު މަގުގައި ގަވާއިދާ ޚިލާފަށް ޕާކުކޮށްފައި ހުންނަ އުޅަނދުތައް ނެގުމުގެ މަސައްކަތްތަކެއް ދިވެހި ފުލުހުންގެ ޚިދުމަތުން ފަށައިފިއެވެ.
މި މަސައްކަތުގެ ދަށުން ރެއިން ފެށިގެން މިހާތަނަށް ހަތަރު ފުރޮޅުލީ ނުވަ އުޅަނދެއް ޓޯކޮށްފައިވާ ކަމަށް ފުލުހުން ބުންޏެވެ.
ފުލުހުން ބުނިގޮތުގައި، ހިނގާފައި އުޅޭ މީހުންނަށް ޚާއްސަކޮށްފައިވާ ދުވާރުތަކުގަޔާއި، އާންމު ދަތުރުފަތުރަށް ދަތިވާ ގޮތަށް ގިނަ ބަޔަކު އުޅަނދު ޕާކުކުރަމުންދާކަން ވަނީ ފާހަގަކުރެވިފައެވެ.
މިގޮތަށް ގަވާއިދާ ހިލާފަށް ޕާކުކުރުމަކީ ނުރައްކާތެރި އެކްސިޑެންޓުތައް ހިނގަން މެދުވެރިވާ ކަމަކަށްވާތީ، އާންމުންގެ ރައްކާތެރިކަމަށްޓަކައި އެފަދަ ކަންކަން ނުކުރުމަށް ފުލުހުން ވަނީ އިލްތިމާސްކޮށްފައެވެ.
ބޮޑުތަކުރުފާނުމަގު ޒަމާނީކުރުމުގެ މަސައްކަތުގެ ދަށުން އެންމެ ފަހުން ތަރައްގީކުރި ބައި ހުޅުވާލުމާ އެކު ދަތުރުފަތުރަށް ބޮޑު ލުޔެއް ލިބުނު ނަމަވެސް، މާގިނަ ދުވަހެއް ނުވެ ގަވާއިދާ ޚިލާފަށް ޕާކުކުރާ އުޅަނދުތަކުގެ ސަބަބުން މަގުގެ ތޮއްޖެހުން ވަނީ އަނެއްކާވެސް އިތުރުވާން ފަށައިފައެވެ.
ބޮޑުތަކުރުފާނު މަގުގެ އިތުރުން ހުޅުމާލޭގައި ވެސް މިފަދައިން ގަވާއިދާ ހިލާފަށް ޕާކުކުރާ މައްސަލަ ފާހަގަކުރެވިފައިވާ ކަމަށް ފުލުހުން ބުނެއެވެ.
ފުލުހުން ހާމަކުރި ގޮތުގައި، ގަވާއިދާ ހިލާފަށް ޕާކުކޮށްފައިވާ އުޅަނދުތައް މަގުމަތިން ނެގުމަށް ކުރަމުންދާ މަސައްކަތް މިރޭ ވެސް ކުރިއަށްދާނެއެވެ. އަދި މަގުމަތީގައި ގަވާއިދާ ހިލާފަށް ޕާކުނުކުރުމަށާއި، އެގޮތަށް ޕާކުކޮށްފައިވާ އުޅަނދުތައް ނެގުމަށް އެންމެހައި ފަރާތްތަކަށް އިލްތިމާސްކުރަމުން، މި މަސައްކަތުގައި އާންމު ރައްޔިތުންގެ ފަރާތުން ލިބެމުންދާ އެއްބާރުލުމަށް ފުލުހުން ވަނީ ޝުކުރު އަދާކޮށްފައެވެ.
މަގުމަތީގެ ރައްކާތެރިކަން ދެމެހެއްޓުމަށާއި ދަތުރުފަތުރަށް ބުރޫއެރުން ކުޑަކުރުމުގެ ގޮތުން، ގަވައިދާ ޚިލާފަށް ޕާކުކޮށްފައި ހުންނަ އުޅަނދުފަހަރު ޓޯކުރުމުގެ މަސައްކަތަކީ ފުލުހުން އަބަދުވެސް އަބަދުވެސް ކުރަމުން ގެންދާ މަސައްކަތެކެވެ.
އެގޮތުން މަތުމަތީގައި ގަވައިދާ ޚިލަށްފަށް ޕާކުކުރާ އުޅަނދުތައް ޓޯކުރާ މައިގަނޑު ސަބަބުތަކުގެ ތެރޭގައި ހިނގާ މީހުންނަށް ދަތިވާގޮތަށް ޕޭވްމަންޓާއި ކްރޮސްވޯކް އަދި ނުކުޅެދުންތެރިކަން ހުންނަ މީހުންނަށް ޚާއްސަ ތަންތަނުގައި ޕާކުކުރުމާއި، މަގުތަކުގެ ކަންމައްޗާއި ދަތުރުފަތުރަށް ހުރަސްއެޅޭގޮތަށް ބެހެއްޓުން ހިމެނެއެވެ.
މީގެއިތުރުން ޕާކުކުރުން މަނާ ސަރަހައްދުތަކާއި، ސްކޫލް އަދި ހޮސްޕިޓަލްތަކުގެ ގޭޓު ކުރިމަތީގައި ޕާކުކުރުމާއި، ގިނަދުވަސްވެ ވީރާނާވާން ދޫކޮށްލާފައިވާ އުޅަނދުތައް ވެސް ފުލުހުން އަންނަނީ ޓޯކުރަމުންނެވެ.
އެގޮތުން ގަވައިދާއި ޚިލާފަށް ޕާކުކޮށްފައި ހުންނަ އުޅަނދުތައް ޓީކުރުމަށް ފުލުހުން ކުރާ މަސައްކަތުގެ ދަށުން ރެއާއި މިރޭ ވެސް އެ މަސައްކަތް ކުރިއަށް ގެންދަން ފުލުހުން ވަނީ ނިންމާފައެވެ.