ޕްރިމިއާ ލީގުގެ މާލީ ގަވާއިދުތަކާ ޚިލާފުވި ކަމަށް ނިންމި ނިންމުން އިސްތިއުނާފު ކުރުމަށް ދީފައިވާ މުއްދަތު މިއަދަށް ހަމަވާއިރު، މެންޗެސްޓާ ސިޓީން އެ މައްސަލަ އިސްތިއުނާފު ކުރުމަށް ތައްޔާރުވަމުންދާ ކަމަށް ރިޕޯޓްތައް ބުނެފިއެވެ.
މިއާއެކު އިނގިރޭސި ފުޓުބޯޅައިގެ ތާރީޚުގައި ވެސް ފާހަގަކޮށްލެވޭ ބޮޑު މައްސަލައިގެ އާ ބާބެއް މިވަނީ ފެށިފައެވެ.
މި މައްސަލައިގައި ގޯހެއް ހަދާފައި ނުވާނެ ކަމަށް ތަކުރާރުކޮށް ބުނަމުން އަންނަ މެންޗެސްޓާ ސިޓީން ބުނެފައިވަނީ، 900 މިލިއަން ޕައުންޑަށްވުރެ ގިނަ ފައިސާގެ އާމްދަނީ އޮޅުވާލައި، ޚަރަދުތައް ކުޑަކޮށް ދެއްކުމަށް ސައްހަ ނޫން ކޮމާޝަލް އެއްބަސްވުންތައް ބޭނުންކުރި ކަމަށް މިނިވަން ކޮމިޝަނުން ނިންމި ނިންމުމަށް ގޮންޖަހާނެ ކަމަށެވެ.
މީގެ އިތުރުން ކްލަބުގެ ކުށެއް ނެތްކަން ސާބިތުކޮށްދޭނެ "އިންކާރު ނުކުރެވޭ ފަދަ ހެކި" އެބަހުރި ކަމަށާއި، ސްޕޮންސާޝިޕް އެއްބަސްވުންތަކަށް ޚަރަދުކޮށްފައި ވަނީ ކްލަބުގެ އޯނަރުން ނޫން ކަމަށާއި އަބޫދާބީ ސަރުކާރުން ކަމަށް ސިޓީން ވަކާލާތު ކުރާނެ ކަމަށް ވަނީ ބުނެފައެވެ.
ޕްރިމިއާ ލީގުގެ އާ ފާސްޓް ޓްރެކް އުސޫލުތައް ބުނާގޮތުން، އިސްތިއުނާފު ހުށަހަޅާތާ 12 ހަފްތާގެ ތެރޭގައި އަޑުއެހުންތައް ބާއްވަން ޖެހެއެވެ. އަދި އަޑުއެހުންތައް ނިމޭތާ 30 ދުވަހުގެ ތެރޭގައި ގޮތެއް ނިންމަންވާނެއެވެ. ނަމަވެސް، ފެބްރުއަރީ 2023 ގައި އެ ކްލަބުގެ މައްޗަށް ދައުވާ އުފުލިއިރު މި އުސޫލުތައް ވުޖޫދުގައި ނެތް ކަމަށް ސިޓީން ކޯޓުގައި ބުނާނެ ކަމަށް ލަފާކުރެވެއެވެ.
ސިޓީއާ ދެކޮޅަށް ފެންމަތިވެފައިވާ މި މައްސަލައިގެ އަސަރު މިހާރު ވަނީ ފުޓުބޯޅައަށް ވަރަށް ބޮޑަށް ކޮށްފައެވެ. އިނގިރޭސިވިލާތުގެ ހައުސް އޮފް ކޮމަންސްގެ ޓްރެޒަރީ ސިލެކްޓް ކޮމިޓީގެ އިސްވެރިޔާ މެގް ހިލިއާ ވަނީ އިނގިރޭސި ޓެކްސް އިދާރާ (އެޗްއެމްއާރުސީ) އިން މި މައްސަލައިގައި އަޅަމުންދާ ފިޔަވަޅުތަކާ ގުޅޭގޮތުން ސުވާލު އުފައްދަވާފައެވެ.
އެ ކްލަބުން އެތައް ސީޒަނެއްގެ މަތިން ޕްރިމިއާ ލީގުގެ ގަވާއިދުތަކާ 100 އަށްވުރެ ގިނަ ފަހަރު ޚިލާފުވެފައިވާ ކަމަށް ނިންމުމާ ގުޅިގެން ހިލިއާ ވަނީ އެޗްއެމްއާރުސީއަށް ސިޓީއެއް ފޮނުއްވާފައެވެ.
ކުޅިވަރުގެ ދާއިރާގެ ގާނޫނީ މާހިރުން ލަފާކުރާ ގޮތުގައި، ވާދަވެރި އެހެން ކްލަބްތަކާއި، ކުޅުންތެރިން އަދި އެޖެންޓުން މި މައްސަލައާ ގުޅިގެން ބަދަލު ހޯދުމުގެ މައްސަލަތައް ކޯޓަށް ހުށަހެޅުމުގެ ފުރުސަތު އޮތުމުން، މި މައްސަލައިގެ ޝަރީއަތްތައް ކުރިއަށް އޮތް އަހަރުތަކުގައި ވެސް ދިގުދެމިގެންދާނެއެވެ.