ދުބާއީއިން ފުރައިގެން ތެލް އަވީވަށް ބުދަ ދުވަހު ދަތުރުކުރި ފްލައިދުބާއީގެ ބޯޓެއްގެ ކޮކްޕިޓް ތެރޭގައި ހިނގި ހަމަނުޖެހުމެއްގައި ޒަހަމްވި ޕައިލެޓު، ބޯޓުގެ ކޮންޓްރޯލް ހޯދުމަށް ކުރި މަސައްކަތް އިންޑިއާގެ ބޮޑުވަޒީރު ނަރެންދުރަ މޯދީއަށް ކިޔައިދީފިއެވެ.
ބުދަ ދުވަހު ހިނގި މި ހާދިސާ ކުރިމަތިވީ 174 ފަސިންޖަރުންނާއި އަށް ކުރޫންނާއެކު ދަތުރުކުރި ފްލައިދުބާއީގެ އެފްޒެޑް1073 (ބޯއިން 737 މެކްސް 8) މަރުކާގެ ބޯޓުގައެވެ. ފްލައިޓް ޓްރެކިން ޑޭޓާތަކުން ދައްކާ ގޮތުގައި، ބޯޓުން ފުރަތަމަ 7700 ގެ އިމަޖެންސީ ކޯޑު ފޮނުވުމަށްފަހު، އޭގެ ހަތް މިނެޓު ފަހުން ވަނީ ހައިޖެކްކުރުން ނުވަތަ ގަވާއިދާ ހިލާފު އަމަލެއް ހިނގާކަން އަންގައިދޭ 7500 ގެ ކޯޑު ފޮނުވާފައެވެ. އަދި ގާތްގަނޑަކަށް 29 ސިކުންތުގެ ތެރޭގައި ބޯޓު ވަނީ 14،000 ފޫޓު ތިރިކޮށްފައެވެ.
https://x.com/narendramodi/status/2105931116058411146
މިއަދު އިންޑިއާގެ ބޮޑުވަޒީރާއެކު ބޭއްވި 10 މިނެޓުގެ ވީޑިއޯ ކޯލެއްގައި ކެޕްޓަން ސްމިތު މައްޗަރް ބުނި ގޮތުގައި، އޭނާއަށް ވަރަށް ބޮޑަށް އަނިޔާވެ ކޮކްޕިޓްގެ ތަޅުމަށް ވެއްޓިފައި އޮތް ނަމަވެސް، ބޯޓު ތިރިވަމުންދާކަން އޭނާއަށް އިހުސާސްކުރެވުނެވެ. އޭވިއޭޝަން ދާއިރާގައި 17 އަހަރު އަދި ކެޕްޓަނެއްގެ ގޮތުގައި 11 އަހަރު މަސައްކަތްކޮށްފައިވާ ސްމިތު ބުނީ، އޭނާގެ ފުރާނަ ސަލާމަތްކުރުމުގެ އިތުރުން ބޯޓުގައި ތިބި އެހެން މީހުން މަރުވިޔަ ނުދިނުމަށްޓަކައި ކޮކްޕިޓްގެ ދޮރު ހުޅުވަން ނިންމީ ކަމަށެވެ.
ސްމިތު ކޮކްޕިޓްގެ ދޮރު ހުޅުވުމާއެކު، ފަސިންޖަރުންނާއި ކުރޫން ވަދެ ހަމަލާދިން މީހާ ވަނީ ހުއްޓުވާފައެވެ. އޭގެ ފަހުން، އެ ބޯޓުގައި ދަތުރުކުރި ފްލައިދުބާއީގެ އޮފް ޑިއުޓީ ދެ ޕައިލެޓުންގެ އެހީތެރިކަމާއެކު، ސައުދީ އަރަބިއްޔާގެ ތަބޫކްގައި އޮންނަ ޕްރިންސް ސުލްތާން ބިން އަބްދުލްއަޒީޒް އިންޓަނޭޝަނަލް އެއާޕޯޓަށް ބޯޓު ވަނީ ސަލާމަތުން ޖައްސާފައެވެ.
ސައުދީ އަރަބިއްޔާއިން ނެރުނު އިބްތިދާއީ ރިޕޯޓެއްގައި ބުނެފައިވާ ގޮތުގައި، މި ހަމަނުޖެހުން ފެށުނީ ފަސްޓް އޮފިސަރު ކެޕްޓަނަށް ހަމަލާދިނުމުންނެވެ. އަދި މި ހަމަނުޖެހުމުގައި ދެ ޕައިލެޓުންނަށްވެސް އަނިޔާވެފައިވާ ކަމަށް އެ ރިޕޯޓުގައި ބުނެފައިވެއެވެ. ނަމަވެސް ހަމަލާދިން ސަބަބު އަދި ހޯދިފައެއް ނުވެއެވެ. މި މައްސަލައިގެ ޖިނާއީ ތަހުގީގެއް ޔޫއޭއީއިން ފަށާފައިވާއިރު، ސައުދީ އަރަބިއްޔާއާއި އިސްރާއީލުންވެސް ދަނީ މިކަން ތަހުގީގުކުރަމުންނެވެ. ފްލައިދުބާއީއިން ނެރުނު ބަޔާނެއްގައި ވަނީ، ތަހުގީގު ނިމެންދެން މިކަމާ ގުޅޭގޮތުން އެކި ގޮތްގޮތަށް ވާހަކަ ނުދެއްކުމަށް އެދިފައެވެ.
ސްމިތު ކުރި ހިތްވަރަށް ދުނިޔޭގެ އެކި ގައުމުތަކުގެ ލީޑަރުން ދަނީ ތައުރީފުކުރަމުންނެވެ. އިންޑިއާގެ ބޮޑުވަޒީރު މޯދީ ވިދާޅުވި ގޮތުގައި، ސްމިތުގެ ހިތްވަރާއި ކެތްތެރިކަމުގެ ސަބަބުން އެތައް ބައެއްގެ ފުރާނަ ވަނީ ސަލާމަތްވެފައެވެ.
އެމެރިކާގެ ރައީސް ޑޮނަލްޑް ޓްރަމްޕް ވިދާޅުވި ގޮތުގައި، ސްމިތު އޮތީ ވަރަށް ބޮޑަށް ޒަހަމްވެފައި ކަމަށާއި، ނަމަވެސް ދޮރު ހުޅުވުމަށް އޭނާ ނިންމި ނިންމުމަކީ ބަތަލުންގެ އަމަލެއް ކަމަށެވެ.
މީގެ އިތުރުން، އެމެރިކާގައި ހުންނަވާ އިންޑިއާގެ ސަފީރު ވިނޭ މޯހަން ކުވާތުރާ ވިދާޅުވީ، ސްމިތާއި އޭނާއަށް އެހީތެރިވި މީހުން ވަނީ ބޮޑު ހިތާމައަކުން ސަލާމަތްކޮށްދީފައި ކަމަށެވެ.
ތަބޫކްގައި ފުރަތަމަ ފަރުވާ ދިނުމަށްފަހު، އިތުރު ފަރުވާއަށް ސްމިތު މިހާރު ވަނީ ޔޫއޭއީއަށް ގެންގޮސްފައެވެ. ޔޫއޭއީގައި ހުންނަވާ އިންޑިއާގެ ސަފީރު ދީޕަކް މިއްޓަލް ހޮސްޕިޓަލަށް ޒިޔާރަތްކުރެއްވުމަށްފަހު ވިދާޅުވީ، ސްމިތުގެ ހާލު ރަނގަޅުވަމުން އަންނަ ކަމަށެވެ. އިންޑިއާގެ އެމްބަސީން ބުނެފައިވާ ގޮތުގައި، ސްމިތުގެ ފަރުވާގެ ކަންކަމާ ގުޅޭގޮތުން ޔޫއޭއީގެ ކަމާބެހޭ ފަރާތްތަކާއެކު ދަނީ މަޝްވަރާކުރަމުންނެވެ.