އަންނަ އަހަރު ދަރިވަރުންނަށް ތިން މަހެއްހާ ދުވަހަށް ޗުއްޓީ ލިބޭނެކަން އެޑިއުކޭޝަން މިނިސްޓްރީގެ ކަލަންޑަރުން ދައްކައިފިއެވެ.
އެޑިއުކޭޝަން މިނިސްޓްރީން ރޭ ވަނީ އަންނަ ދިރާސީ އަހަރުގެ އެކެޑެމިކް ކަލަންޑަރު ހާމަކޮށްފައެވެ.
އެ ކަލަންޑަރުގައިވާ ގޮތުން، ދިރާސީ އަހަރުގެ ކިޔެވުން ފެށޭނީ އަންނަ ޖަނަވަރީ 17ގައެވެ.
އަށާވީސް ދުވަހު ކިޔެވުމަށް ފަހު، އަންނަ ފެބުރުވަރީ މަހުގެ އަށްވަނަ ދުވަހަކީ ރޯދަމަހުގެ އެއްވަނަ ދުވަހަށްވާތީ، އެ ދުވަސް ވަނީ ސަރުކާރު ބަންދު ދުވަހެއްގެ ގޮތުގައި ކަނޑައަޅާފައެވެ.
ދަރިވަރުންތަކެއް: އަންނަ އަހަރު ދަރިވަރުންގެ ޗުއްޓީއަށް ޖުމުލަ ތިން މަހެއްހާ ދުވަސް ލިބޭނެ - ސަން ފޮޓޯ/ އަހުމަދު އަވްޝަން އިލްޔާސްއެ މަހުގެ 21 އިން ފެށިގެން 25 ވަނަ ދުވަހަށް ކަނޑައަޅާފައިވަނީ ޓީޗަރުންގެ ޕްރޮފެޝަނަލް ޑިވެލޮޕްމެންޓް ދުވަސްތަކުގެ ގޮތުގައެވެ. އަދި، އެ ދުވަސްތަކާ ޖެހިގެން ދެން ފެށޭނީ ރޯދަ މަހުގެ ފަހު ދިހައެއްގެ ދުވަސްތަކަށް ވާތީ، އެ ދުވަސްތައް ވެސް ވަނީ ބަންދުކޮށްފައެވެ.
މީގެއިތުރުން، ކަލަންޑަރުން އެނގޭ ގޮތުގައި، އަންނަ މާޗު މަހުގެ ނުވައަކުން ފެށިގެން 11 ވަނަ ދުވަހަށް ވަނީ ފިތުރު އީދުގެ މުނާސަބަތުގައި ސަރުކާރު ބަންދު ދުވަސްތަކެއްގެ ގޮތުގައި ކަނޑައަޅާފައެވެ. އެހެންވެ، އެ މުއްދަތުގައި ތިން ހަފުތާގެ ޗުއްޓީއެއް ދަރިވަރުންނަށް ލިބޭނެއެވެ.
އެއަށްފަހު މެއި މަހުގެ 16 ވަނަ ދުވަހުން 20 ވަނަ ދުވަހުގެ ނިޔަލަށް ވަނީ ޙައްޖާއި އަލްޙާ އީދަށް ސަރުކާރު ބަންދުކޮށްފައެވެ.
ދަރިވަރުންގެ އަންނަ އަހަރުގެ ފުރަތަމަ ޓާމުގެ ކިޔެވުން ނިންމައި، ޓެސްޓު ފެށޭނީ ޖޫން މަހުގެ 29 ވަނަ ދުވަހެވެ. އެ ޓެސްޓުތައް ޖުލައި މަހުގެ އަށް ވަނަ ދުވަހާ ހަމައަށް ބާއްވާއިރު، ފުރަތަމަ ޓާމުގައި ވެސް ދަރިވަރުންނަށް ޗުއްޓީގެ ގޮތުގައި ގިނަ ދުވަސްތަކެއް ލިބެއެވެ.
ޕޭރަންޓަކު ދަރިވަރެއްގެ ރިޕޯޓު ފޮތް ބަލަނީ -- ސަން ފޮޓޯ/ ފަޔާޒު މޫސާއެކެޑަމިކް ކަލަންޑަރުން ދައްކާ ގޮތުގައި، ފުރަތަމަ ޓާމުގެ ޗުއްޓީ ނިންމުމަށްފަހު ދެވަނަ ޓާމުގެ ކިޔެވުމަށް ދަރިވަރުން ނިކުންނާނީ އޮގަސްޓު މަހުގެ އެއްވަނަ ދުވަހެވެ. އެއަށްފަހު ދެވަނަ ޓާމުގެ ކިޔެވުންތައް ނިންމައި، ޓެސްޓު ނޮވެމްބަރު މަހުގެ 23 އިން ފެށިގެން ޑިސެމްބަރު މަހުގެ ދެވަނަ ދުވަހުގެ ނިޔަލަށް ކުރިއަށްދާނެއެވެ.
އެއާއެކު، ޑިސެމްބަރު މަހުގެ ފަސްވަނަ ދުވަހު ރިޕޯޓު ފޮތް ދިނުމަށްފަހު އެ މަހުގެ ނުވަ ވަނަ ދުވަހު ދިރާސީ އަހަރުގެ ކިޔެވުން ނިންމައި ދަރިވަރުން ޗުއްޓީއަށް ދާނެއެވެ. އެ މުއްދަތުގައި ދަރިވަރުންނަށް މަސް ދުވަހުގެ ޗުއްޓީއެއް ލިބޭނެއެވެ.
ދެހާސް އަށާވީސް ވަނަ އަހަރުގެ ދިރާސީ އަހަރުގެ ކިޔެވުން ފަށާނީ އެ އަހަރުގެ ޖަނަވަރީ ނުވައެއްގައެވެ. އެކަމަކު، ޖަނަވަރީ ފަހެއްގައި ޓީޗަރުން ސުކޫލުތަކަށް ނިކުންނަން ޖެހެއެވެ.
ކަލަންޑަރުގައިވާ ގޮތުން، ދަރިވަރުންނަށް އަންނަ އަހަރު ކިޔަވައިދޭނީ، 163 ދުވަހެވެ. އެއީ ފަސް މަހެއްހާ ދުވަސް ކަމަށްވާއިރު، ޖުމުލަ ޗުއްޓީއަށް 88 ދުވަސް ލިބެއެވެ. އެއީ، ތިން މަހެއްހާ ދުވަހުގެ މުއްދަތެވެ.
ހަތަރު އަހަރަށް ފަހު ދަރިވަރުންނަށް ޑިސެމްބަރުގައި ބޮޑު ޗުއްޓީ ލިބެން ފެށީ މި އަހަރެވެ.
އެގޮތުން، ބޮޑު ޗުއްޓީ އަހަރުގެ މެދުތެރޭ ލިބޭ ގޮތަށް، 2021ގައި ބަދަލުކުރިއެވެ. އެއީ ފަތުރުވެރިކަމުގެ ދާއިރާގައި މަސައްކަތް ކުރާ ގިނަ މީހުންނަށް އަހަރުގެ ފަހުކޮޅު މަސައްކަތް ބުރަވާތީ، އެ މީހުންގެ އެދުމުގެ މަތިން ކަމަށް އޭރު އޮތް ސަރުކާރުން ބުންޏެވެ. ނަމަވެސް އެ ބަދަލާއެކު، އެންމެ ބޮޑަށް ފާޑުކިޔުން އަމާޒުވީ ޖޫން، ޖުލައިގައި މޫސުމީ ވިއްސާރަ އަންނާތީ އެ ދުވަސްވަރު ދަތުރުފަތުރަށް ހުރަސް އެޅޭކަމަށް ބުނެއެވެ.
އެހެންވެ، ދިރާސީ އަހަރުގެ ކިޔެވުން ޖެނުއަރީއަށް އަލުން ބަދަލުކުރުމަކީ ރައީސް ޑރ. މުޙައްމަދު މުއިއްޒުގެ ރިޔާސީ ވައުދުފުޅެކެވެ.