މިދިޔަ މަހު 150،000އަށްވުރެ ގިނަ ފަތުރުވެރިން ރާއްޖެއަށް ޒިޔާރަތްކޮށްފައިވާ ކަމަށް ފަތުރުވެރިކަމާބެހޭ ވުޒާރާގެ ތަފާސްހިސާބުތަކުން ދައްކައިފިއެވެ.
ފަތުރުވެރިކަމާބެހޭ ވުޒާރާއިން އެންމެ ފަހުން އާންމުކުރި ތަފާސްހިސާބުތަކުން ދައްކާ ގޮތުގައި މިދިޔަ ސެޕްޓެންބަރު މަހު ރާއްޖެއަށް ޖުމްލަ 150,764 ފަތުރުވެރިން ޒިޔާރަތްކޮށްފައި ވެއެވެ. މިއަދަދާ އަޅާބަލާއިރު މިދިޔަ އަހަރުގެ ސެޕްޓެންބަރު މަހު ރާއްޖެއަށް ޒިޔާރަތްކޮށްފައިވަނީ 151,114 ފަތުރުވެރިންނެވެ. އެހެންކަމުން މިއީ 0.2 އިންސައްތަ ދަށް އަދަދެކެވެ.
މިދިޔަ މަހު އެވްރެޖްކޮށް ދުވާލެއްގެ މައްޗަށް 5,872 ފަތުރުވެރިން ޒިޔާރާތްކޮށްފައިވާއިރު، މި މުއްދަތުގެ ތެރޭގައި އެންމެ ގިނަ އަދަދަކަށް ފަތުރުވެރިން ޒިޔާރަތްކޮށްފައިވަނީ 26ވަނަ ދުވަހު ކަމަށް ފަތުރުވެރިކަމާބެހޭ ވުޒާރާގެ ތަފާސްހިސާބުތަކުން ދައްކައެވެ. އެދުވަހު އެކަނިވެސް 6,284 ފަތުުރުވެރިން ރާއްޖެއަށް އައިސްފައިވެއެވެ.
މިއާއެެކު އަހަރުގެ މިހާތަނަށް ރާއްޖެއަށް ޒިޔާރަތްކުރި ފަތުރުވެރިންގެ އަދަދު 1,603,021 އަށް އަރާފައިވާއިރު މިދިޔަ އަހަރުގެ މި މުއްދަތުގައި ރާއްޖެއަށް ޒިޔާރަތްކޮށްފައިވަނީ 1,659,031 ފަތުރުވެރިންނެވެ. އެހެންކަމުން މިއީ 3.4 އިންސައްތަ ދަށް އަދަދެކެވެ.
އެންމެ ގިނައިން ރާއްޖެއަށް ފަތުރުވެރިން ޒިޔާރަތްކޮށްފައިވާ ގައުމުތަކަށް ބަލާއިރު އެއްވަނައިގައި އުޅެނީ ޗައިނާއެވެ. އެގޮތުން އެ ގައުމުން 300,977 ފަތުރުވެރިން ރާއްޖެ ޒިޔާރަތްކޮށްފައިވާއިރު، ދެވަނައަށް އެންމެ ގިނަ ފަތުރުވެރިން ރާއްޖެ ޒިޔާރަތްކުރި ގައުމު ކަމަށްވާ ރަޝިޔާއިން ވަނީ 229,236 ފަތުރުވެރިން ޒިޔާރަތްކޮށްފައެވެ. އިނގިރޭސިވިލާތުން 119,968 ފަތުރުވެރިން ރާއްޖެ ޒިޔާރަތްކޮށްފައިވާއިރު ޖަރުމަނުވިލާތުން ޒިޔާރަތްކޮށްފައިވަނީ 99,062 ފަތުރުވެރިންނެވެ. އަދި 98,039 ފަތުރުވެރިންނާއެކު ފަސްވަނައަށް އެންމެ ގިނަ ފަތުރުވެރިން ރާއްޖެ ޒިޔާރަތްކޮށްފައިވަނީ އިޓަލީވިލާތުންނެވެ.
ތަފާސްހިސާބުތަކުން ދައްކާގޮތުގައި މި މުއްދަތުގައި ރާއްޖެ ޒިޔާރަތްކުރި ފަތުރުވެރިންގެ ތެރެއިން 1,158,404 ފަތުރުވެރިން ޗުއްޓީ ހޭދަކޮށްފައިވަނީ ރިސޯޓުތަކުގައެވެ. ގެސްޓްހައުސްތަކުގައި 345,220 ފަތުރުވެރިން ޗުއްޓީ ހޭދަކޮށްފައިވާއިރު، ހޮޓާތަކުގައި 36,106 ފަތުރުވެރިން އަދި ސަފާރީ އުޅަނދުތަކުގައި 29,679 ފަތުރުވެރިން ޗުއްޓީ ހޭދަކޮށްފައިވެއެވެ.
މި އަހަރުގެ މިހާތަނަށް އެންމެ ގިނަ ފަތުރުވެރިން ރާއްޖެ އެތެރެވެފައިވާ އެއާޕޯޓުތަކަށް ބަލާއިރު އެންމެ ގިނަ އަދަދަކަށް ފަތުރުވެރިން އައިސްފައިވަނީ ވެލާނާ އިންޓަނޭޝަނަލް އެއާޕޯޓު މެދުވެރިކޮށެވެ. އެއީ 1,569,214 ފަތުރުވެރިންނެވެ. މީގެ އިތުރުން ގަން އިންޓަނޭޝަނަލް އެއަރޕޯޓުން 5,606 ފަތުރުވެރިން، މާފަރު އިންޓަނޭޝަނަލް އެއަރޕޯޓުން 5,032 ފަތުރުވެރިން، ހަނިމާދޫ އިންޓަނޭޝަނަލް އެއަރޕޯޓުން 3,331 ފަތުރުވެރިން، މާމިގިލީ އެއާޕޯޓުން 2,971 ފަތުރުވެރިން އަދި ދާލު އެއާޕޯޓުން 1,284 ފަތުރުވެރިން އެތެރެވެފައިވާކަމަށް ޓޫރިޒަމް މިނިސްޓްރީގެ ތަފާސްހިސާބުތަކުން ދައްކައެވެ.