އެމެރިކާގެ އޭއައި ނިޒާމުތަކެކޭ އެއްފަދައިން، ޗައިނާގައި އުފައްދާފައިވާ އާޓިފިޝަލް އިންޓެލިޖެންސް (އޭއައި) އެޖެންޓުންނަކީ ވެސް މަކަރުހެދުމާއި، ރޭވުންތައް ރޭވުމުގެ އިތުރުން މަޢުލޫމާތު އޮޅުވާލުމުގެ ޤާބިލުކަން ހުރި ނިޒާމުތަކެއްކަން ފަހުގެ ދިރާސާތަކުން ހާމަވެއްޖެއެވެ.
މި އަހަރު ހިންގި ޓެސްޓުތަކެއްގެ ތެރޭގައި، ޗައިނާގެ މަޝްހޫރު ކުންފުނިތައް ކަމަށްވާ އަލީބާބާ، ޑީޕްސީކް އަދި މޫންޝޮޓްގެ މޮޑެލްތަކުން ބިނާކޮށްފައިވާ އޭއައި އެޖެންޓުތަކެއް ވަނީ، ވިޔަފާރީގެ ބިޑެއް ކާމިޔާބުކުރުމަށްޓަކައި އެ އެޖެންޓުތަކުގެ ޤާބިލުކަމާ މެދު ޞައްޙަނޫން މަޢުލޫމާތު ދީފައެވެ. އަދި ދެވަނަ ފުރުސަތެއް ދިނުމުން ވެސް މިފަދަ އޮޅުވާލުންތައް ތަކުރާރުކޮށްފައިވާކަން ފާހަގަކުރެވިފައިވެއެވެ.
މާހިރުންނާއި ދިރާސާ ކަރުދާސްތައް ބުނާ ގޮތުގައި، ޗައިނާގެ އޭއައި އެޖެންޓުން ވަނީ ހުރަސްތަކުން ރެކުމަށާއި، ކަންކަން އޮޅުވާލުމުގެ އިތުރުން ނާކާމިޔާބީތައް ސިއްރުކުރަން ދަސްކޮށްފައެވެ. މިއީ އަމިއްލައަށް މަސައްކަތްކުރާ އޭއައި ނިޒާމުތަކާ ގުޅިގެން މުޅި ދުނިޔޭގައި ވެސް ކަންބޮޑުވުން އުފެދިފައިވާ ނުރައްކާތެރި ސިފަތަކެކެވެ.
ރޮއިޓާސް ނިއުސް އެޖެންސީން ދިރާސާކުރި 200 އަށްވުރެ ގިނަ ލިޔެކިޔުންތަކަށް ބަލާއިރު، 2025 ވަނަ އަހަރުން ފެށިގެން މިހާތަނަށް ހެދި މަދުވެގެން 20 ދިރާސާއަކުން މިފަދަ ޢަމަލުތައް ފާހަގަކުރެވިފައިވެއެވެ. މީގެ ތެރޭގައި އަމިއްލައަށް ކޮޕީ ހެދުމާއި، ކަނޑައެޅިފައިވާ އިންތަކުން ބޭރުވުން ފަދަ ނުރައްކާތެރި ކަންކަން ހިމެނެއެވެ. މިފަދަ ސިފަތަކަކީ އޭއައި ކުރިއަރަމުން އަންނައިރު، އެ ނިޒާމުތައް އިންސާނުންގެ ކޮންޓްރޯލުން ނެއްޓިގެން ދިއުމަށް މަގުފަހިވެދާނެ ކަންކަމެވެ.
އިރުމަތީ ޗައިނާގެ ޝަންޑޮންގް ޕްރޮވިންސްގެ ކިންގްޑާއޯގައި ހުންނަ "ކިންގްޑާއޯ ހިއުމަނޮއިޑް ރޮބޯޓް ޑޭޓާ އެންޑް ޓްރޭނިންގް ސެންޓަރު" ގައި، ގޭތެރެ ތަރުތީބުކޮށް ސާފުކުރުމުގެ މަސައްކަތަށް އިންސާނެއްގެ ސިފަޔަށް ހަދާފައިވާ ރޮބޯޓެއް ތަމްރީނުކުރަނީ--ފޮޓޯ/ޓެލެގްރާފްއިންޑިއާޖޯޖްޓައުން ޔުނިވަސިޓީގެ ރިސާޗް ފެލޯއެއް ކަމަށްވާ ކޮލިން ޝިއާ-ބްލައިމިއާ ވިދާޅުވީ، މި ނަތީޖާތަކުން ދައްކުވައިދެނީ އޭއައި ނިޒާމުތައް ކޮންޓްރޯލުން ނެއްޓުމަށް ބޭނުންވާ ހުރިހާ ސިފަތަކެއް މިހާރު ފެންނަން ހުރިކަމެވެ. އަދި މިއީ ސީރިއަސް އިންޒާރެއްގެ ގޮތުގައި ދެކެންޖެހޭ ކަމެއް ކަމަށް އޭނާ ވިދާޅުވިއެވެ.
މީގެ އިތުރުން، ރެޑްވުޑް ރިސާޗްގެ އެލެކްސް މެލަން ފާހަގަކުރެއްވި ގޮތުގައި، މިއީ އެމެރިކާގެ ލެބޯޓްރީތަކުން ވެސް ފެންނަމުންދާ ނުރައްކާތަކެކެވެ. މިހާރުގެ ފެންވަރުގައި މިއީ މާ ބޮޑު ނުރައްކަލެއްގެ ގޮތުގައި ނުފެނުނު ނަމަވެސް، އޭއައިގެ ޤާބިލުކަން އިތުރުވަމުންދާ ވަރަކަށް އެ ތަކެތީގެ އޮޅުވާލުންތައް ދެނެގަނެ، އެކަންކަން ހުއްޓުވުމަކީ އިންސާނުންނަށް ބޮޑު ގޮންޖެހުމަކަށް ވާނެއެވެ.
މިދިޔަ އަހަރުގެ ތެރޭގައި އެމެރިކާގެ އޯޕަން އޭއައިގެ އެޖެންޓުތަކެއް ވަނީ ކަނޑައެޅިފައިވާ ލެބޯޓްރީ މާހައުލުން ބޭރުވެ، 'ހަގިން ފޭސް' ޕްލެޓްފޯމް ހެކްކޮށްފައެވެ. އަދި އޮސްޓްރޭލިއާ ސަރުކާރުގެ ސިއްހީ ޕޯޓަލްއަކަށް ވެސް އޯޕަން އޭއައިގެ އެޖެންޓެއް ވަދެގަތް ހާދިސާއެއް ސެޕްޓެމްބަރު މަހު ވަނީ ފެންމަތިވެފައެވެ.
ޗައިނާގެ ސައިބަސްޕޭސް އެޑްމިނިސްޓްރޭޝަނުން ހާމަކުރާ ގޮތުގައި، މިފަދަ އޭއައި ނިޒާމުތައް ބާރުގެ ދަށުން ނެއްޓުމުގެ ފުރުސަތު އިންތިހާއަށް ބޮޑެވެ. މިދިޔަ ހަފުތާގައި ޑޮނަލްޑް ޓްރަމްޕާއި ރައީސް ޝީ ޖިންޕިން ބޭއްވެވި ބައްދަލުވުމުގައި ވެސް ވަނީ އޭއައިގެ ރައްކާތެރިކަމާ ގުޅޭގޮތުން މަޝްވަރާކުރައްވާފައެވެ. މި ބައްދަލުވުމުގައި ރައީސް ޝީ ވިދާޅުވީ، އޭއައިގެ ޓެކްނޮލޮޖީ ޒިންމާދާރުކަމާއެކު ތަރައްޤީކޮށް ބެލެހެއްޓުމަކީ ދެ ޤައުމުގެ ވެސް ޒިންމާއެއް ކަމަށެވެ.
ދިރާސާތަކުން ދައްކާ ގޮތުގައި، ޗައިނާގެ އެންމެ ކުރިއަރާފައިވާ މޮޑެލްތަކުން ބިޑްކުރުމުގެ މަރުޙަލާގައި 80 އިންސައްތައަށްވުރެ ގިނަ ފަހަރު ވަނީ ދޮގު މައުލޫމާތު ފޯރުކޮށްދީފައެވެ. އަދި މަސައްކަތެއް ނާކާމިޔާބުވުމުން އެކަން ހާމަކުރުމުގެ ބަދަލުގައި، އަމިއްލައަށް ފޭކް ފައިލްތަކެއް އުފައްދައިގެން ކާމިޔާބުވި ކަމަށް ދެއްކުމަށް ވެސް ބައެއް އެޖެންޓުން ވަނީ މަސައްކަތްކޮށްފައެވެ.
ފުޑާން ޔުނިވަސިޓީގެ ދިރާސާއަކުން ހާމަވި ގޮތުގައި، އޭއައި ނިޒާމެއް ބަދަލުކުރަން އުޅޭކަން އެނގުމުން، އެ ނިޒާމުން ވަނީ އަމިއްލައަށް އެހެން ކޮމްޕިއުޓަރަކަށް އޭގެ ކޮޕީއެއް ބަދަލުކޮށްފައެވެ. އަދި ނިޒާމު ނިއްވާލިޔަ ނުދިނުމަށްޓަކައި އަމިއްލަ ދިފާއީ ރޭވުންތައް ރާވާފައިވާކަން ވެސް ފާހަގަކުރެވުނެވެ.
މި ނުރައްކާތައް ހުއްޓުވުމަށްޓަކައި ޗައިނާއިން މިހާރު ވަނީ އޭއައި އެޖެންޓުން ވަކި އިންތަކެއްގެ ތެރޭގައި ހިފެހެއްޓުމަށް އާ އުސޫލުތަކެއް އެކުލަވާލާފައެވެ. މީގެ ތެރޭގައި އަމިއްލައަށް ވަސީލަތްތައް ހޯދުމާއި، އިވެލުއޭޓަރުންނަށް އޮޅުވާލުމުގެ އިތުރުން ޤާބިލުކަން ފޮރުވުން ހުއްޓުވުމުގެ މިންގަނޑުތައް ހިމެނެއެވެ. އެހެންނަމަވެސް، މާހިރުން ދެކޭގޮތުގައި ޗައިނާގައި އޭއައި ސޭފްޓީއާ ގުޅޭ މަސައްކަތްތައް އަދި އޮތީ ވަރަށް ޅަފަތުގައި ކަމަށްވާތީ، އެމެރިކާއާ އަޅާބަލާއިރު އެ ޤައުމުގެ ރައްކާތެރިކަމުގެ ނިޒާމުތައް އަދި އެކަށީގެންވާ ވަރަށް ހަރުދަނާއެއް ނޫނެވެ.