ޑައުންސިންޑްރޯމް ހުންނަ ދިވެހި ކުއްޖަކު ކިޔެވުމަށް ފަސް ސުކޫލަކުން ނޫނެކޭ ބުނި މައްސަލަ ބަލައިދެއްވާނެ ކަމަށް ރައީސް ޑރ. މުހައްމަދު މުއިއްޒު ރޭ ވިދާޅުވެއްޖެއެވެ.
ރައްޔިތުންގެ އަޑު ޕްރޮގްރާމުގައި، ޑައުންސިންޑްރޯމް ހުންނަ ފާތިމަތު ސާރާއާއި އޭނާގެ މަންމަ ފާތިމަތު ފައިރޫޒާ އާދަމް ވަނީ ރައީސް މުއިއްޒާ ބައްދަލުކުރައްވާފައެވެ.
އެ ބައްދަލުވުމުގައި ފައިރޫޒާ ވަނީ، ސާރާއަށް އެކި ކަންކަމުގައި ދިމާވެފައިވާ ގޮންޖެހުންތައް ރައީސާ ހިއްސާކޮށްފައެވެ.
"ފުރަތަމަ ޕްރައިވެޓް ސުކޫލުތަކަށް ބަލާއިރު، ސާރާއަށް ފަސް ސުކޫލުން ބުނީ ނޫނެކޭ ނުކުޅެދުންތެރިކަން ހުންނާތީ. އެއީީ، ސާރާގެ އުމުރުން އެއް އަހަރުން ހަ އަހަރާ ހަމައަށް" ފައިރޫޒާ ބުންޏެވެ.
ސާރާގެ މަންމަ ފައިރޫޒާއާއި ރައީސް މުއިއްޒާއި ސާރާ ---- ފޮޓޯ/ ރައީސް އޮފީސްފައިރޫޒާ ކިޔައިދިން ގޮތުގައި، އެ ސުކޫލުތަކުން ޚާއްސަ އެހީއަށް ބޭނުންވާ ކުދިންނަށް ކިޔަވައިދޭ ކަމަށް ޕްރޮމޯޓުކުރެއެވެ. އެކަމަކު، އެ ސުކޫލުތަކުގައި ކިޔެވުމުގެ ފުރުސަތު ދެނީ، މަތިން މާކްސް ހޯދޭ ލެވެލްގެ ދަރިވަރުން ކަމަށް އޭނާ ބުންޏެވެ.
ސާރާއަށް ޕްރައިވެޓް ސުކޫލުތަކުން ކިޔަވައިދޭން ޚަރަދުކުރެވޭ ވަރުވި ނަމަވެސް އެ ފުރުސަތު ނުލިބުނުކަން އޭނާ ފާހަގަކުރިއެވެ.
އެހެންވެ، ފައިރޫޒާ ދެން ބެލީ، ސަރުކާރު ސުކޫލުތަކެވެ. އޭގެތެރެއިން، ބައެއް ސުކޫލުތަކުގައި ދަރިވަރުންނަށް އެކަށީގެންވާ ވަރަށް ކިޔައިވެދެވޭ ވަރަށް ޓީޗަރުން ނެތް ކަމުގެ ކަންބޮޑުވުން އޭނާ ފާހަގަކުރިއެވެ. އަދި، ނުކުޅެދުންތެރިކަން ހުންނަ ކުދިންނަށް ސަރުކާރު ސުކޫލުތަކުގައި ކިޔެވުމަށް ދަތިވާކަން ފާހަގަކޮށް، އެ ކުދިންނަށް ކިޔެވޭނެ ގޮތަށް އެ ސުކޫލުތަކުގައި ކަންކަން އިންތިޒާމު ކުރުމަށް ފައިރޫޒާ ވަނީ އެދިފައެވެ.
ތާޖުއްދީން ސުކޫލުގައި ގްރޭޑު ހަތަރެއްގައި ސާރާ ކިޔަވަމުން އަންނައިރު، ފައިރޫޒާ ވަނީ، ސާރާގެ ކިޔެވުން ކުރިއަރަމުން އަންނަކަން ފާހަގަކޮށްފައެވެ.
ފައުރޫޒާގެ ކަންބޮޑުވުންތައް ރައީސާ ހިއްސާކުރަނީ --- ފޮޓޯ/ ރައީސް އޮފީސްމި ކަމުގެ އިތުރުން ފައިރޫޒާ ވަނީ، ތެރަޕީއާއި ބޯހިޔާވަހިކަމާއި އެހެނިހެން ކަންކަމުގައި ނުކުޅެދުންތެރިކަން ހުންނަ ކުދިންނަށް ދިމާވާ ދަތިތައް ތަފުސީލީ ގޮތެއްގައި ރައީސަށް ކިޔައިދެއްވާފައެވެ.
މި ކަންބޮޑުވުންތަކާއެކު ރައީސް ވިދާޅުވީ، ހިއްސާކުރެއްވި ހުރިހާ ކަންކަމެއް ވީ އެންމެ އަވަހަށް ވަރަށް ރަނގަޅަށް ބަލައިދެއްވާނެ ކަމަށެވެ.
"ޖުމުލަކޮށް ވަކި ކުއްޖަކަށް ނުވަތަ ވަކި އާއިލާއަކާ ބެހޭ ކަމެއް ނޫން މިއީކީ. މި ކަމުގައި ޝާމިލުވާ ހުރިހާ އެންމެނަށް، މުޅި މުޖުތަމައުއަށް ފައިދާވާ ގޮތަށް ކަންކަން ކުރަން އަޅުގަނޑު ބޭނުމީ" ރައީސް ވިދާޅުވިއެވެ.
އެ މަނިކުފާނު ވިދާޅުވީ، ރާއްޖޭގެ ހުރިހާ ރައްޔިތުންނަށް ހަމަހަމަ ގޮތުގައި ވީ އެންމެ ރަނގަޅަށް ކަންކަން ވާން ބޭނުންވާ ކަމަށެވެ. އަދި، މައްސަލަތައް ހައްލުކުރުމަށް ކުރެވިދާނެ ކަންކަން ކިޔައިދެއްވީތީ ރައީސް ވަނީ ފައިރޫޒާއަށް ޝުކުރު ދަންނަވާފައެވެ.
ފާހަގަކުރެވޭ ގޮތުގައި، ނުކުޅެދުންތެރިކަން ހުންނަ ކުދިންނަށް އެކި ކަންކަމުގައި ދަތިތަކާއި ތަފާތުކުރުން ދިމާވާ ކަމުގެ ކަންބޮޑުވުންތައް އަބަދުވެސް އޮވެއެވެ. އެކަމަކު، އެ ކަމަށް ދާއިމީ ހައްލެއް މިހާތަނަށް އައިސްފައެއް ނުވެއެވެ.