އިމިގްރޭޝަންސްގެ ކުރީގެ ކޮންޓްރޯލާ ޖެނެރަލް މުހައްމަދު ޝައްމާން ވަހީދުގެ މައްޗަށް ކުށް ސާބިތުވެ، 25 އަހަރަށް ޖަލަށްލާން ކްރިމިނަލް ކޯޓުން ކުރި ހުކުމް، ހައިކޯޓުގައި އިސްތިއުނާފުކޮށްފިއެވެ.
ތިން މައްސަލައެއްގައި ޖުމްލަ، 25 އަހަރަށް ޝައްމާން ޖަލަށްލާން ހުކުމް ކުރީ، މިދިޔަ ޖޫން މަހުއެވެ. އޭނާގެ މައްޗަށް ސާބިތުވީ، ފޭރުމުގައި ބައިވެރިވުމާއި، ރަސްމީ ހައިސިއްޔަތު ނަހަމަ ގޮތުގައި ބޭނުންކުރުމުގެ އިތުރުން މަނީ ލޯންޑްރިންގެ ކުށުގެ ދައުވާއެވެ.
އެއީ އިމިގްރޭޝަންގެ ބައެއް މުވައްޒަފުންނާ ގުޅިގެން ގަވައިދާ ޚިލާފު އޮޕަރޭޝަނެއްގައި ބިދޭސީ މަސައްކަތްތެރިންގެ ބަޔަކު ހައްޔަރުކޮށް އޭގެ ތެރެއިން އެކަކުގެ އަތުން 530،000 ރުފިޔާ ނެގި ކަމަށް ތުހުމަތު ކޮށެވެ.
ޝައްމާންގެ މައްޗަށް ކުރި ހުކުމްތައް ހައިކޯޓުގައި އިސްތިއުނާފު ކުރިނަމަވެސް، އެ މައްސަލަތައް ހައިކޯޓަށް ބަލައިގަތް ކަމެއް އަދި ނޭނގެއެވެ.
މި މައްސަލައިގައި ޝައްމާންގެ އާއިލާއިން ކުރިން ބުނެފައި ވަނީ އޭނާ ހައްޔަރުކޮށްފައިވަނީ ހޯމް މިނިސްޓަރު އަލީ އިހުސާންގެ ކޮރަޕްޝަންގެ މައްސަލަތައް ރައްޔިތުންނަށް ހިއްސާކުރާނެ ކަމުގެ ބިރަށް، އެ ކަމަށް ފަސް އެޅުމުގެ ގޮތުން ކަމަށެވެ. އަދި ޝައްމާން ބަންދުކުރަން އިހުސާން މަސައްކަތް ފެށި އަނެއް ސަބަބަކީ، އޭނާގެ އަތުގައި އިހުސާންގެ "ވީޑިއޯ"އެއް އޮތްކަން އިހުސާނަށް އެނގިލެއްވުމުން ކަމަށް އެ އާއިލާއިން ތުހުމަތު ކުރެއެވެ.
ޝައްމާން އުމުރަށް ޖަލަށް ހުކުމް ކުރީ މި ސަރުކާރާ ގުޅޭގޮތުން ބޮޑެތި ތުހުމަތުތަކެއްކޮށް، އޭނާ ކޯޓަށް ހާޒިރުވި ދުވަހެއްގައެވެ.
އިމިގްރޭޝަންސްގެ ކުރީގެ ކޮންޓްރޯލާ ޖެނެރަލް މުހައްމަދު ޝައްމާން ވަހީދު 25 އަހަރަށް ޖަލަށްލާން ކުރި ހުކުމަކީ ކުށާ ނުބައްދަލު ބޭއިންސާފު، ސިޔާސީ ހުކުމެއް ކަމަށް ކުރީގެ ރައީސް އަބްދުﷲ ޔާމީން އަބްދުލްގައްޔޫމްވަނީ ތުހުމަތު ކުރައްވާފައެވެ. އަދި ޝައްމާން ވަހީދުގެ މައްޗަށް އިއްވި 25 އަހަރުގެ ޖަލު ހުކުމަކީ ރައީސް ޑރ. މުހައްމަދު މުއިއްޒުގެ ސަރުކާރުގެ އަސްލު ހަގީގަތް އޭނާ ކިޔައިދެއްވުމާ ގުޅިގެން ކުރި ހުކުމެއް ކަމަށް ކުރީގެ އިކޮނިމިކް މިނިސްޓަރު ފައްޔާޒް އިސްމާއީލްވަނީ ވިދާޅުވެފައެވެ.