ދެކުނު ކޮރެއާގެ އަސްކަރީ ހިދުމަތުގެ ގާނޫނާ ހިލާފުވިކަން ސާބިތުވުމާ ގުޅިގެން، މަޝްހޫރު ކޭ-ޕޮޕް ތަރި ސޮންގް މިން-ހޯގެ މައްޗަށް އެއް އަހަރު ދުވަހުގެ ޖަލު ހުކުމެއް އިއްވައި، އެ ހުކުމް ތަންފީޒުކުރުން ދެ އަހަރަށް ފަސްކުރުމަށް އެ ގައުމުގެ ކޯޓަކުން ނިންމައިފިއެވެ.
އުމުރުން 33 އަހަރުގެ ސޮންގް އަކީ ކޭ-ޕޮޕް ބޯއި ބޭންޑް 'ވިނާ' ގެ މެންބަރެކެވެ. އޭނާގެ މައްޗަށް ކުށް ސާބިތުވީ 2023 ވަނަ އަހަރުން ފެށިގެން 2024 ވަނަ އަހަރާ ހަމައަށް ސޯލްގެ ކޮމިއުނިޓީ ސެންޓަރެއްގައި އިޖުތިމާއީ ހިދުމަތްތެރިއެއްގެ ގޮތުގައި މަސައްކަތްކުރި މުއްދަތުގައި، ގިނަ ދުވަސްތަކެއް ވަންދެން ވަޒީފާއަށް ހާޒިރުވެފައި ނުވާތީއެވެ.
ދެކުނު ކޮރެއާގެ ގާނޫނުތައް ބުނާ ގޮތުން، ސިއްހަތު ސަލާމަތުން ހުރި ކޮންމެ ފިރިހެނަކު މަދުވެގެން 18 މަސް ދުވަހު އަސްކަރިއްޔާގައި ހިދުމަތް ކުރަން ޖެހެއެވެ. ނަމަވެސް ސިއްހީ ސަބަބުތަކާ ހުރެ ބައެއް މީހުންނަށް އަސްކަރިއްޔާގެ ބަދަލުގައި އިޖުތިމާއީ ހިދުމަތްތެރިންގެ ގޮތުގައި މަސައްކަތްކުރުމުގެ ފުރުސަތު ދެއެވެ.
މިއަދު ކޯޓުން އިއްވި އެއް އަހަރުގެ ޖަލު ހުކުމް ދެ އަހަރަށް ފަސްކޮށްފައިވާތީ، ކުރިއަށް އޮތް ދެ އަހަރުގެ ތެރޭގައި އިތުރު ކުށެއް ނުކުރާ ނަމަ އޭނާ ޖަލަށް ދާކަށް ނުޖެހޭނެއެވެ. ކޯޓުގައި ހާމަވި ގޮތުގައި، 'މިނޯ' ގެ ނަމުން ވެސް މަޝްހޫރުވެފައިވާ ސޮންގް ވަނީ އޭނާގެ 21 މަސް ދުވަހުގެ ހިދުމަތުގެ މުއްދަތުގައި ހުއްދަ ނުހޯދައި 102 ދުވަހު ވަޒީފާއަށް ހާޒިރުނުވެފައެވެ.
ކޯޓުން ބުނީ އަސްކަރީ ހިދުމަތަކީ ތެދުވެރިކަމާއެކު އަދާކުރަންޖެހޭ ވާޖިބެއް ކަމަށާއި، އިޖުތިމާއީ ހިދުމަތްތެރިން ވެސް އެކަމުން އިސްތިސްނާ ނުވާނެ ކަމަށެވެ. ނަމަވެސް ސޮންގް އޭނާގެ ކުށަށް އިއުތިރާފުވެ، އެކަމާ ހިތާމަކުރާކަން ކޯޓުން ފާހަގަކުރިއެވެ.
ސޮންގްގެ މައްސަލަ ކަމާބެހޭ ފަރާތްތަކުން ތަހުގީގުކުރަން ފެށީ 2024 ވަނަ އަހަރު އޭނާ ހިދުމަތުން ވަކިވިތާ ކުޑަ ދުވަސްކޮޅެއް ފަހުންނެވެ. އެއީ އޭނާ ގިނަގިނައިން ވަޒީފާއަށް ހާޒިރުނުވާ ކަމަށާއި، ހައްދަށް ވުރެ ގިނައިން ސަލާމް ބުނެފައިވާ ކަމަށް މީޑިއާތަކުން ރިޕޯޓުކުރުމާ ގުޅިގެންނެވެ. މީގެ އިތުރުން، ސޮންގް ވަޒީފާއަށް ހާޒިރުވިކަމަށް ދެއްކުމަށް ރެކޯޑުތައް އޮޅުވާލައި، އޭނާއަށް އެހީތެރިވި ކޮމިއުނިޓީ ސެންޓަރުގެ ސުޕަވައިޒަރުގެ މައްޗަށް ވެސް ކޯޓުން ވަނީ ޖަލު ހުކުމެއް އިއްވައި، އެ ހުކުމް ތަންފީޒުކުރުން ފަސްކޮށްފައެވެ.
ދެކުނު ކޮރެއާގެ މުނިފޫހިފިލުވުމުގެ ދާއިރާގައި ހަރަކާތްތެރިވާ ފަންނާނުން އަސްކަރީ ހިދުމަތް އަދާކުރުމުގެ މައްސަލައަކީ އެ ގައުމުގައި އަބަދުވެސް ބޮޑު ބަހުސެއް ހިނގާ ކަމެކެވެ. މީގެ ކުރިން 2003 ވަނަ އަހަރު އަސްކަރީ ހިދުމަތާ ގުޅުނު މަޝްހޫރު ލަވަކިޔުންތެރިޔާ 'ސައި' ވެސް ވަނީ 2007 ވަނަ އަހަރު ދެވަނަ ފަހަރަށް ހިދުމަތާ ގުޅެން ޖެހިފައެވެ. އެއީ އޭނާގެ ފުރަތަމަ ހިދުމަތުގެ މުއްދަތުގައި މުނިފޫހިފިލުވުމުގެ ހަރަކާތްތައް ކުރިއަށްގެންގޮސް، ވާޖިބުތަކަށް ފަރުވާކުޑަކުރިކަމަށް ސޯލްގެ ކޯޓަކުން ނިންމުމާ ގުޅިގެންނެވެ.
ހަމައެހެންމެ، 1990 ގެ އަހަރުތަކާއި 2000 ގެ ކުރީކޮޅު އެ ގައުމުގައި އެންމެ މަޝްހޫރުވި އެއް ޕޮޕް ތަރި ކަމަށްވާ ސްޓީވް ޔޫ ވަނީ 2002 ވަނަ އަހަރު އަސްކަރީ ހިދުމަތުން ރެކުނުކަން ފަޅާއަރައި ބޮޑު މައްސަލަގަނޑެއްގެ ތެރެއަށް ވެއްޓިފައެވެ. އޭނާ އަސްކަރިއްޔާއާ ގުޅެން ކުޑަދުވަސްކޮޅަކަށް ވެފައި ވަނިކޮށް ދެކުނު ކޮރެއާގެ ރައްޔިތުކަން ދޫކޮށް އެމެރިކާގެ ރައްޔިތަކަށް ވުމުން، ކަމާބެހޭ ފަރާތްތަކުން ވަނީ އޭނާ އެ ގައުމަށް އެތެރެވުން މަނާކޮށްފައެވެ.
ބުރާސްފަތި ދުވަހު ކޯޓުން ހުކުމް އިއްވުމުގެ ކުރިން ސޮންގް ނޫސްވެރިންނާ ވާހަކަދައްކަމުން ބުނީ އޭނާގެ އަމަލުތަކާ މެދު ހިތާމަކުރާ ކަމަށެވެ. ނަމަވެސް، މަޖުބޫރު ހިދުމަތް އަދާކުރުމަށް އަލުން އަސްކަރިއްޔާއާ ގުޅޭނެތޯ ނޫސްވެރިއަކު ކުރި ސުވާލަށް އޭނާ ޖަވާބެއް ނުދެއެވެ.