ރާއްޖޭގެ ޕްރޮސެކިއުޓާ ޖެނެރަލް (ޕީޖީ) އޮފީހާއި ރަޝިޔާގެ ޕީޖީ އޮފީހާ ދެމެދު ދެގައުމުގެ ގާނޫނީ ދާއިރާއަށް އެއްބާރުލުން ދިނުމުގެ އެއްބަސްވުމެއްގައި ސޮއިކޮށްފިއެވެ.
މިކަން ހާމަކުރައްވައި ޕީޖީ ޢައްބާސް ޝަރީފް ކުރެއްވި ޕޯސްޓެއްގައި ވިދާޅުވީ މި އޮނިގަނޑުގެ ސަބަބުން ބޯޑަރު ހުރަސްކޮށް ހިންގާ ކުށްތަކާ ދެކޮޅަށް މަސައްކަތް ކުރުމުގައި ދެ އޮފީހުގެ ދެމެދުގައި އޮތް ގާނޫނީ ގުޅުން އިތުރަށް ހަރުދަނާވެ، ކުރިއަށް އޮތް ތަނުގައި އިތުރަށް ގުޅިގެން މަސައްކަތްކުރުމަށް މަގުފަހިވެގެންދާނެ ކަމަށެވެ.
މި އެއްބަސްވުމުގައި ރާއްޖޭގެ ފަރާތުން ސޮއިކުރެއްވީ ޕީޖީ ޢައްބާސް ޝަރީފެވެ. އަދި ރަޝިޔާގެ ފަރާތުން ސޮއިކުރެއްވީ އެގައުމުގެ ޕްރޮސެކިއުޓާ ޖެނެރަލް އެލެކްސެންޑާ ގުސްޓާންއެވެ.
https://x.com/abbas_sharyf/status/2105388331471376730
ޕީޖީގެ ޕޯސްޓުގައި ފާހަގަކުރެއްވި ގޮތުގައި މި ބައްދަލުވުމުގެ ތެރެއިން ވަނީ ދެގައުމުގެ ދެމެދު އޮތް ގުޅުން ހަރުދަނާކުރުމުގެ މަޝްވަރާކޮށްފައެވެ. އަދި ޕީޖީއޯ 2.0 މަޝްރޫއާ ގުޅޭ ގޮތުން ވެސް ރަޝިޔާގެ ޕީޖީއާ މަޝްވަރާކޮށްފައި ވެއެވެ.
ޕީޖީއޯ 2.0 އަކީ އިންސާނުން ނިންމާ ނިންމުންތަކަށް އިސްކަންދީގެން މަސައްކަތުގެ ހިންގުންތެރިކަން 60 ޕަސެންޓަށް ވުރެ ބޮޑަށް އިތުރުކުރެވޭނެ ވަސީލަތެއް ކަމަށް ޕީޖީގެ ޕޯސްޓުގައި ވިދާޅުވެފައި ވެއެވެ.
ޕްރޮސެކިއުޓާ ޖެނެރަލް ޢައްބާސް ޝަރީފްގެ ޕޯސްޓު ނިންމާލައްވާފައި ވަނީ ރަޝިޔާގެ ޕީޖީގެ މެހެންދާރީއަށް ޝުކުރުއަދާކުރައްވައި، ދެގައުމުގެ މެދުގައި އޮތް ގުޅުން ކުރިއަށްއޮތް ތަނުގައިވެސް މިގޮތުގައި ކުރިއަށްދާނެ ކަމަށް އުންމީދު ކުރައްވަމުންނެވެ.