ޢަރަބި ދުނިޔޭގައި މަޤުބޫލު ލަވަކިޔުންތެރިޔާ ސާދު ލަމްޖަރަދުގެ މައްޗަށް 10 އަހަރުގެ ޖަލު ޙުކުމެއް އިއްވައިފިއެވެ.
ފަރަންސޭސިވިލާތުގެ ކްރެޓޭލް އިސްތިއުނާފު ކޯޓުން މޮރޮކޯގެ މަޝްހޫރު ލަވަކިޔުންތެރިޔާ ސާދު ލަމްޖަރަދުގެ މައްޗަށް 10 އަހަރުގެ ޖަލު ހުކުމެއް އިއްވައި، އޭނާ ވަގުތުން ބަންދުކުރުމަށް އަމުރުކޮށްފައިވާއިރު، މިއީ 2016 ވަނަ އަހަރު ޕެރިހުގެ ހޮޓަލެއްގެ ތެރޭގައި 20 އަހަރުގެ އަންހެނަކަށް ޖިންސީ ގޯނާކުރި ކަމަށް ސާބިތުވެ، 2023 ވަނަ އަހަރު ޕެރިސް އެސައިޒް ކޯޓުން އޭނާގެ މައްޗަށް އިއްވި ހަ އަހަރުގެ ޖަލު ހުކުމަށްވުރެ ބޮޑު ހުކުމެކެވެ.
އުމުރުން 41 އަހަރުގެ ސާދު ލަމްޖަރަދަކީ ޢަރަބި ދުނިޔޭގައި އެންމެ ބޮޑު މަގުބޫލުކަމެއް ހޯދާފައިވާ އެއް ފަންނާނެވެ. އޭނާގެ މައްޗަށް ކުށް ސާބިތުވި މައްސަލައަކީ ނައިޓްކްލަބަކުން ބައްދަލުވި ލޯރާ ބީ ނަމަކަށްކީ އަންހެންކުއްޖަކަށް، މަސްތުގެ ހާލަތުގައި ހުރެ އެ ކުއްޖާގެ ނުރުހުމުގައި ޖިންސީ ގޯނާކުރި މައްސަލައެކެވެ. މި މައްސަލައިގައި ދައުލަތުގެ ޕްރޮސެކިއުޓަރުން އޭނާއަށް 8 އަހަރުގެ ޖަލު ހުކުމެއް ދިނުމަށް އެދުނު ނަމަވެސް، ފަނޑިޔާރުންގެ މަޖިލީހުން ނިންމެވީ 10 އަހަރުގެ ހުކުމެއް އިއްވުމަށެވެ.
ސާދު ލަމްޖަރަދު ބޮލީވުޑްގެ އެކްޓަރު ސަލްމާން ޚާން އަދި ލަވަކިޔުންތެރިޔާ އިއުލިއާއާ އެކު. ސާދު ވަނީ ބޮލީވުޑްގެ ބައެއް ފަންނާނުންނާ އެކު މަސައްކަތްކޮށްފައި--ފޮޓޯ/މިޑްޑޭސާދު ލަމްޖަރަދު އަދިވެސް ކުށަށް އިންކާރުކުރަމުންދާއިރު، އޭނާގެ ޤާނޫނީ ވަކީލު މޭރީ ބާގުބުރު ވިދާޅުވި ގޮތުގައި ފަރަންސޭސިވިލާތުގެ އެންމެ މަތީ ކޯޓު ކަމަށްވާ ކޯޓް އޮފް ކަސޭޝަނަށް މި މައްސަލަ ހުށަހެޅުމަށް ވަނީ ނިންމާފައެވެ. ސިއްރުކޮށްގެން ކުރިއަށްގެންދިޔަ މި އިސްތިއުނާފު އަޑުއެހުންތަކަށްފަހު ޙުކުމް ބޮޑުވި ސަބަބުތަކުގެ ތެރޭގައި، ދިފާއީ ވަކީލުން އަނިޔާލިބުނު ފަރާތަށް އަމާޒުކޮށްގެން ގެންގުޅުނު ހަރުކަށި އުކުޅުތަކާއި، ތަޙުޤީޤުކުރި ފަރާތްތަކަށާއި މާހިރުންނަށް ކުރި ތުހުމަތުތައް ހިމެނޭ ކަމަށް އަނިޔާލިބުނު ފަރާތުގެ ވަކީލު ދާވުދު ޗިމީ ވިދާޅުވިއެވެ.
މި ޙުކުމް އިއްވާފައިވަނީ 2018 ވަނަ އަހަރު ސެންޓް ޓްރޯޕޭ ކައިރީގައި އެހެން އަންހެނަކަށް ޖިންސީ ގޯނާކުރި މައްސަލައެއްގައި ފަރަންސޭސިވިލާތުގެ ދެކުނު ކޯޓަކުން އޭނާގެ މައްޗަށް އިއްވި ފަސް އަހަރުގެ ޖަލު ހުކުމް އިސްތިއުނާފުކޮށްފައި ވަނިކޮށެވެ. މީގެއިތުރުން، 2016 ވަނަ އަހަރުގެ މައްސަލައިގައި އަނިޔާލިބުނު ފަރާތުގެ މައްސަލަ އަނބުރާ ނެގުމަށް އެދި ތިން މިލިއަން ޔޫރޯއަށް ބްލެކްމެއިލް ކުރަން އުޅުނު ފަސް މީހެއްގެ މައްޗަށްވެސް ސަސްޕެންޑެޑް ހުކުމްތަކެއް ވަނީ އިއްވާފައެވެ.
ކުރިންވެސް މޮރޮކޯ އާއި އެމެރިކާގައި މިފަދަ ތުހުމަތުތަކާ ކުރިމަތިލާންޖެހުނު ސާދު ލަމްޖަރަދުގެ މައްޗަށް ގުނާނުކުރެވޭހާ ގިނަ ގާނޫނީ މައްސަލަތަކެއް ހުރިނަމަވެސް، ސޯޝަލް މީޑިއާގައި އޭނާގެ މަގުބޫލުކަން ކުޑަވެފައެއް ނުވެއެވެ. އޭނާގެ އިންސްޓަގްރާމްގައި 15 މިލިއަނަށްވުރެ ގިނަ ފޮލޯވަރުން އަދި ޔޫޓިއުބްގައި 16 މިލިއަނަށްވުރެ ގިނަ ސަބްސްކްރައިބަރުން ތިއްބެވެ.