ދުނިޔޭގެ ކުޅިވަރުގެ މަސްރަހަށް ބަލާލައިފިނަމަ މިދުވަސްކޮޅު އެންމެ ގަދައަށް ދެކެވެނީ އެއް ވާހަކައެކެވެ. 2023 ވަނަ އަހަރުގެ ފެބްރުވަރީ މަހުގައި މެންޗެސްޓާ ސިޓީއާ ދެކޮޅަށް އުފުލާފައިވާ 115 ދައުވާ ސާބިތުވެއްޖެކަމުގެ ވާހަކަތަކެވެ. ހަގީގަތުގައިވެސް އެހެން ވެއްޖެނަމަ އުފެދޭ ވަރަށް ބޮޑު އަދި މުހިންމު ސުވާލެއް އެބައޮތެވެ. މި މުއްދަތުގައި އެ ކުލަބުން ހޯދާފައިވާ ކާމިޔާބީތަކަށް ވާނީ ކިހިނެއް ހެއްޔެވެ؟ އެ ކުލަބަށް ދެވޭ އަދަބުގެ ބައެއްގެ ގޮތުގައި އެ ކާމިޔާބީތައް އަތުލާނެ ހެއްޔެވެ؟
މި ސުވާލު އުފައްދަނީ އާންމުންނާއި މީޑީއާތަކުން އެކަންޏެއްވެސް ނޫނެވެ. މެންޗެސްޓާ ސިޓީގެ އެންމެ ވާދަވެރި ކުލަބު ކަމަށޤވާ މެންޗެސްޓާ ޔުނައިޓަޑަށް، 2011 ވަނަ އަހަރާއި 2023 ވަނަ އަހަރާ ދެމެދު ޖުމްލަ 12 އަހަރުދުވަހު ކުޅެފައިވާ ގޯލްކީޕަރު، ޑޭވިޑް ޑެ ހެއާ ވެސް ވަނީ އޭނާގެ މީސް މީޑިއާގައި މި ސުވާލު އުފައްދާފައެވެ.
https://x.com/D_DeGea/status/2103559973540340178
ސިޓީއާ ދެކޮޅަށް އުފުލާފައިވާ ދައުވާތަކުގައިވާ މުއްދަތުގައި އެ ކުލަބުން ވަނީ ޖުމްލަ ހަތް ކާމިޔާބީއެއް ހޯދާފައެވެ. އެއީ:
- ތިން ޕްރިމިއާ ލީގު ތަށި (2011–12, 2013–14, 2017–18)
- އެއް އެފްއޭ ކަޕް (2010–11)
- ތިން ކަރަބާއޯ ކަޕް (2013–14, 2015–16, 2017–18)
އެހެންކަމުން މި ކާމިޔާބީތައް މެންޗެސްޓާ ސިޓީ އަތުން ނަގާ ކަމުގައިވާނަމަ އެ ކާމިޔާބީތައް ދެން އެންމެ ހައްގުވާނީ އެ މުބާރާތްތަކުގެ ދެވަނައަށް ގޮސްފައިވާ ކުލަބު ތަކަށެވެ. އެ ކުލަބު ތަކަކީ ކޮބާހެއްޔެވެ؟ އަދި މީގެ ތެރެއިން މެންޗެސްޓާ ޔުނައިޓަޑަށް ލިބޭނީ ކިތައް ތަށި ހެއްޔެވެ؟
ސިޓީއާ ދެކޮޅަށް ދައުވާ އުފުލާފައިވާ މުއްދަތުގައި އެ ކުލަބުން ކާމިޔާބުކުރި ފަހު ޕްރިމިއާ ލީގު ތައްޓާއެކު އުފާފާޅުކުރަނީ-- ފޮޓޯ: މެންޗެސްޓާ ސިޓީ ފޭސްބުކްމި ސުވާލުތަކުގެ ޖަވާބު ހޯދުމަށް، ސިޓީން ހޯދި ކާމިޔާބީތަކުގައި ދެވަނައަށް އައި ޓީމުތަކަކީ ކޮބާތޯ ބަލާލަމާ ހިނގާށެވެ. އެގޮތުން ވަކިވަކި މުބާރާތްތަކަށް ބަލާއިރު 2011-12 ސީޒަންގައި ޕްރިމިއާ ލީގުގެ ދެވަނައަށް ގޮސްފައިވަނީ މެންޗެސްޓާ ޔުނައިޓަޑެވެ. އަދި 2013-14 ސީޒަންގެ ދެވަނަ ލިވަޕޫލްއަށް ލިބުނުއިރު 2017-18 ސީޒަންގެ ދެވަނަ ލިބުނީވެސް މެންޗެސްޓާ ޔުނައިޓަޑަށެވެ.
އެހެންކަމުން މި ކާމިޔާބީތައް ސިޓީ އަތުން ނަގައިފިނަމަ މެންޗެސްޓާ ޔުނައިޓަޑަށް އިތުރު ދެ ޕްރިމިއާ ލީގު ތަށި ލިބޭނެއެވެ. އެހެންކަމުން ޑެ ހެއާ އަށް 2012-13 ސީޒަނުގައި ލިބިފައިވާ ހަމައެކަނި ޕްރިމިއާ ލީގު ތަށީގެ އިތުރަށް ދެ ތަށި ލިބޭނެއެވެ.
އެފްއޭ ކަޕަށް ބަލާއިރު ސިޓީން 2010-11 ސީޒަންގެ މުބާރާތް ކާމިޔާބުކުރިއިރު ފައިނަލުގައި ބަލިކޮށްފައިވަނީ ސްޓޯކް ސިޓީއެވެ. އެހެންކަމުން އެ ތަށި ލިބޭނީ ސްޓޯކް ސިޓީއަށެވެ.
މި މުއްދަތުގައި ސިޓީން ދެން ކާމިޔާބުކޮށްފައިވަނީ ތިން ކަރަބާއޯ ކަޕެވެ. މި ތަށިތައް ލިބޭނެ ކުލަބުތަކަށް ބަލާއިރު 2013-14 މުބާރާތުގައި ސިޓީއާ ވާދަކޮށްފައިވަނީ ސަންޑަލޭންޑެވެ. 2015-16 ސީޒަންގެ ފައިނަލުގެ ފުރިހަމަ ވަގުތު ހަމަވިއިރު 1-1 ގެ ނަތީޖާއިން ލިވަޕޫލްއާ އެއްވަރުވުމުން ސިޓީން މުބާރާތް ކާމިޔާބުކުރީ ޕެނަލްޓީ ޖަހައިންނެވެ. އަދި 2017-18 ސީޒަންގެ ފައިނަލުގައި ސިޓީއާ ވާދަކުރީ އާސެނަލްއެވެ.
އެހެންކަމުން މެންޗެސްޓާ ސިޓީގެ މައްޗަށް އުފުލާފައިވާ ދައުވާތައް ސާބިތުވެއްޖެނަމަ، އެކަން ވެގެންދާނީ މި ކުލަބުތަކުގެ ޓްރޮފީ ކެބިނެޓަށް ލިބޭނެ އިތުރު މުއްސަނދިކަމަކަށެވެ.
މި ވާހަކަތައް ދެކެވޭޢިރު އެންމެ ފާހަގަކުރެވޭ ކަމަކީ، މެންޗެސްޓާ ސިޓީގެ މައްޗަށް އުފުލާފައިވާ 115 ދައުވާވެސް ސާބިތުވާކަމަށް ޕްރެމިއާ ލީގުގެ އިންޑިޕެންޑެންޓް ކޮމިޝަނަކުން ނިންމާފައިވާކަމެވެ.
https://sun.mv/228312
އެހެންކަމުން ސިޓީން މިހާރު އަންނަނީ މި ނިންމުން އިސްތިއުނާފުކުރަން ތައްޔާރުވަމުންނެވެ.