އެންޑްރޮއިޑް 17 އަށް ބިނާކޮށް އާޓިފިޝަލް އިންޓެލިޖެންސް (އޭއައި) ގެ ގިނަ ފީޗާތަކާއެކު އުފައްދާފައިވާ ސެމްސަންގްގެ ވަން ޔޫއައި 9 އަޕްޑޭޓް، ގެލެކްސީ އެސް26 ފޯނު ބޭނުންކުރާ އިތުރު ފަރާތްތަކަށް ދޫކުރަން ފަށައިފިއެވެ.
ލަސްތަކެއްވުމަށްފަހު ދޫކުރަން ފެށި މި އަޕްޑޭޓް އެންމެ ފުރަތަމަ ދޫކުރަން ފެށީ އެމެރިކާގައި ތިބި ޓީ-މޮބައިލްގެ ޔޫޒަރުންނަށެވެ. ނަމަވެސް، މިހާރު ވަނީ ބީޓާ ޕްރޮގްރާމްގައި ބައިވެރިވެފައިވާ އަންލޮކްޑް ގެލެކްސީ އެސް26 ފޯނުތަކަށްވެސް ފޯރުކޮށްދީފައެވެ.
މީގެއިތުރުން މި އަޕްޑޭޓް ގެލެކްސީ ޒެޑް ފްލިޕް 7 އެފްއީ ބޭނުންކުރާ ބައެއް ފަރާތްތަކަށްވެސް މިހާރު ލިބެމުންދާ ކަމަށް ރިޕޯޓްތައް ބުނެއެވެ.
9ޓޫ5ގޫގުލްއިން އާންމުކުރި ރިޕޯޓެއްގައިވާ ގޮތުން މި އަޕްޑޭޓާއެކު ގެލެކްސީ އޭއައި، ޕްރައިވެސީ، ސެކިއުރިޓީ، ސެމްސަންގް ހެލްތު، އެކްސެސިބިލިޓީ، މަލްޓިޓާސްކިންގް، ބިކްސްބީ، ލޮކް ސްކްރީން އަދި ސެމްސަންގް ޑެކްސްއަށް ބޮޑެތި ބަދަލުތަކެއް ވަނީ ގެނެސްފައެވެ.
އާ އަޕްޑޭޓާއެކު ގެލެކްސީ އޭއައިގެ ގިނަ ފީޗާތަކެއް ތައާރަފުކޮށްފައިވާއިރު، "ނައު ނަޖް" ފީޗާ މެދުވެރިކޮށް މެސެޖު ނޯޓިފިކޭޝަންތަކުން ނުވަތަ ފްލޯޓިން ބަޓަނަކުން ރެޒަވޭޝަން މައުލޫމާތު އިތުރުކުރުމާއި، އެޑްރެސްތައް އެންޓަކުރުމާއި، ގޫގުލް މެޕްސްގައި ތަންތަން ސޭވްކުރުން ފަދަ ކަންކަމަށް އިރުޝާދުތައް ފޯރުކޮށްދެއެވެ.
މީގެއިތުރުން "މައި ފޭންކޭމް" ފީޗާއިން ވީޑިއޯއެއްގައިވާ ވަކި މީހަކަށް އޮޓޯއިން ފޯކަސްކޮށް ވަށައިގެންވާ ބައިތައް ކްރޮޕްކޮށްދޭއިރު، އިންޓަޕްރިޓާގެ ކޮންވަސޭޝަން މޯޑުން ވާހަކަދައްކަމުންދާއިރު ކުރީގެ މެސެޖުތައް ބަލާލުމުގެ ފުރުސަތު ލިބިގެންދެއެވެ. އަދި ފޯނު ކޯލްތަކުގައި އުޅޭއިރު ކުރިއަށްހުރި ހަރަކާތްތައް ފަދަ ގުޅުންހުރި މައުލޫމާތުތައް ފޯނުގެ ސްކްރީނުން ފެންނަން ހުންނާނެއެވެ.
ރައްކާތެރިކަމާއި ޕްރައިވެސީއަށް ބަލާއިރު، ސެޓިންސްގެ ތެރޭގައި "ވޮރަންޓީ އެންޑް ކެއާ" ސެކްޝަނެއް ހިމަނައި، ވޮރަންޓީ މައުލޫމާތާއި، ޑައިގްނޯސްޓިކް ޓޫލްސްގެ އިތުރުން މެއިންޓަނަންސް އިރުޝާދުތައް ހިމަނާފައިވެއެވެ. އަދި ފޯނުގެ ވޮލިއުމް މައިނަސް ބަޓަނާއި ސައިޑް ބަޓަން އެއްކޮށް ފިތާލައިގެން ނުވަތަ ކުއިކް ޕެނަލްގައިވާ ޕަވަ ބަޓަނަށް ފިތާލައިގެން، ދެން ފޯނު ހުޅުވާ ފަހަރަށް ބަޔޯމެޓްރިކް އަންލޮކް ވަގުތުން ބަންދުކޮށްލެވޭނެއެވެ. އެޕްލިކޭޝަނަކުން ލޮކޭޝަން ބޭނުންކުރާނަމަ ނޫކުލައިގެ އިންޑިކޭޓަރެއް ފެންނާނެއެވެ. އަދި "ނައު ބްރީފް" މެދުވެރިކޮށް މެލްވެއާގެ ނުރައްކާތަކާއި، ނޭނގޭ ވަސީލަތްތަކުން އިންސްޓޯލްކުރާ އެޕްތަކާއި، ބޭނުމެއްނެތް ހުއްދަތަކާ މެދު އިންޒާރުދޭނެއެވެ. މީގެއިތުރުން އޭއައި ބޭނުންކޮށްގެން އަމިއްލަ މައުލޫމާތަށް މޫނުބަލާ އެޕްތައް ފާހަގަކޮށް، ނުރައްކާތެރި އެޕްތައް ހުޅުވުން ހުއްޓުވައިދޭނެއެވެ.
ސެމްސަންގް ހެލްތު އެޕްލިކޭޝަންވެސް އާ ޑިޒައިނަކަށް ބަދަލުކޮށްފައިވާއިރު، އެކްޓިވިޓީ، ސްލީޕް، މައިންޑްފުލްނެސް އަދި ނިއުޓްރިޝަން ކާޑުތަކުގެ ސައިޒު ބަދަލުކޮށް ތަރުތީބުކުރެވޭނެއެވެ.
ކެމެރާ ބޭނުންކޮށްގެން ކެއިންބުއިންތަކާއި މޫޑު އަވަހަށް ރެކޯޑުކުރެވޭއިރު، ސިއްހީ މައުލޫމާތުގެ ޓްރެންޑްތައް ގަޑިއިރުން، ދުވަހުން ނުވަތަ ހަފްތާއިން ބަލާލައި، ގިނަ ޗާޓުތައް އަޅާކިޔާލެވޭނެއެވެ. ގެލެކްސީ ވޮޗް އަދި ގެލެކްސީ ރިންގް މެދުވެރިކޮށް ނިދުމުގެ މައުލޫމާތު އެއްކުރެވޭއިރު، ނިދުމާއި، ކަސްރަތާއި، ބީއެމްއައި އަދި ބްލަޑް ޕްރެޝަރަށް ބަލައި ދުވަހުގެ ހުރިހާ މައުލޫމާތެއް އެއްކޮށް "ހާޓް ހެލްތު ސްކޯ" އެއް ތައްޔާރުކޮށްދޭނެއެވެ.
މީގެއިތުރުން "ކާޑިއޯ ލޯޑް ޓްރެކިން" އިން ކަސްރަތުގެ އަސަރު ދައްކައިދީ، "ފިޓްނެސް އިންޑެކްސް" އިން ހަށިގަނޑުގެ ބައްޓަމާއި، ވަރުގަދަކަމާއި، ދެމެހެއްޓެނިވިކަން ވަޒަންކޮށްދޭނެއެވެ. ގެލެކްސީ ވޮޗް އަދި ހެޑްފޯނުން އަޑުގެ މިންވަރު ބަލާ "ހިއަރިން ޓްރެކާ" އާއި، މައްސަރުގެ ކަންކަން ބަލަހައްޓާ ކަލަންޑަރު ވިއުއެއްވެސް ވަނީ ހިމަނާފައެވެ.
ވޮއިސް އެސިސްޓެންޓް ބިކްސްބީއަށް ބަލާއިރު، "ވޭކް ވާޑް" އެއް ބޭނުންނުކޮށް، ފޯނު އަނގަޔާ ކައިރިކޮށްލުމަށްފަހު ވާހަކަދައްކައިގެން ބިކްސްބީ އެކްޓިވޭޓް ކުރެވޭނެއެވެ. އަދި ބިކްސްބީގެ ކޮންވަސޭޝަން ހިސްޓްރީ ސާޗްކުރުމާއި، ނަން ބަދަލުކުރުމާއި، ޕިންކުރުމާއި، ކްލިއާކުރުމުގެ ފުރުސަތު ލިބިގެންދެއެވެ. މީގެއިތުރުން ހޯމް ސްކްރީނަށް އިތުރުކުރެވޭ އާ ވިޖެޓެއް މެދުވެރިކޮށް ކުރީގެ އަދި އާ ވާހަކަތަކަށް އަވަހަށް ވާސިލްވެވޭނެއެވެ.
އެކްސެސިބިލިޓީ ފީޗާތަކުގެ ތެރެއިން "ޓެކްސްޓް ސްޕޮޓްލައިޓް" މެދުވެރިކޮށް ސްކްރީނުގައިވާ ލިޔުންތައް ބޮޑުކޮށް ހައިލައިޓް ކުރެވޭނެއެވެ. އެކްސްޓާނަލް ކީބޯޑު ބޭނުންކުރާ ފަރާތްތަކަށް ޝޯޓްކަޓްތަކުން އެކްސެސިބިލިޓީ ސެޓިންސްއަށް ވަދެވޭއިރު، "މައުސް ކީސް" އަށް ޕޮއިންޓާ ސްޕީޑާއި ނަމްބަރު ޕެޑް ސަޕޯޓް ވަނީ އިތުރުކޮށްފައެވެ. އަދި "ސްވައިޕްގެ ބަދަލުގައި ސިންގަލް ޓެޕް" ކުރާ ފީޗާ ވަނީ "ޑެކްސްޓެރިޓީ އެންޑް އިންޓަރެކްޝަން" މެނޫއަށް ބަދަލުކޮށްފައެވެ. "ސިލެކްޓް ޓޫ ސްޕީކް" އިން ލިޔުންތައް ކިޔައިދީ، ފޮޓޯތައް ސިފަކޮށްދޭއިރު، ޓޯކްބެކް އަޕްޑޭޓްތައް ޕްލޭ ސްޓޯރުން ލިބޭނެއެވެ. އަދި އާ ފީޗާތައް ބަލާލުމަށް "ވަޓްސް ނިއު" ސެކްޝަނެއް ވަނީ ތައާރަފްކޮށްފައެވެ.
ފޯނުގެ އިތުރު ފީޗާތަކަށް ބަލާއިރު، ކުއިކް ޕެނަލްގެ ބްރައިޓްނެސް، ވޮލިއުމް ކޮންޓްރޯލް އަދި މީޑިއާ ޕްލޭޔަރުގެ ސައިޒު ބަދަލުކުރެވޭ ގޮތަށް ވަނީ ސެޓިންސް އިތުރުކޮށްފައެވެ. އަދި ވޮލިއުމް ސްލައިޑާއިން ސައުންޑް މޯޑް ބަޓަން ވަކިކޮށްލެވޭނެއެވެ.
ސެމްސަންގް ޑެކްސްގައި އެޕް ވިންޑޯތައް ޑެސްކްޓޮޕްތަކުގެ މެދުގައި ބަދަލުކުރުން ފަސޭހަކޮށްދީފައިވާއިރު، ޑިފޯލްޓް ލޮކް ސްކްރީން ގަޑި ވަނީ ވޯލްޕޭޕަރާ ގުޅޭގޮތަށް ބަދަލުވާގޮތަށް އަލުން ޑިޒައިންކޮށްފައެވެ.