ސިއްހަތަށް ނުރައްކާތެރި ދުންފަތުގެ ބާވަތްތަކާއި ދުފާ ތަކެތީގެ އަގުތައް ރާއްޖޭގެ ބާޒާރުގައި ވަރަށް ބޮޑަށް ދަށްވެއްޖެއެވެ.
މޯލްޑިވްސް ސްޓެޓިސްޓިކްސް ބިއުރޯގެ ތަފާސްހިސާބުތަކުން އެނގޭ ގޮތުގައި، އަސާސީ މުދަލުގެ އަގުތަކުން 1.15 ޕަސެންޓު ވަނީ ދަށްވެފައެވެ.
އެ ބާވަތްތަކުގެ ތެރެއިން އެންމެ ބޮޑަށް މިދިޔަ މަހު އަގުތައް ދަށްވީ، ދުންފަތާއި ދުފުމުގެ ބާވަތްތަކުންނެވެ.
އެގޮތުން، މިދިޔަ ޖުލައި މަހާ އަޅާބަލާއިރު ނިމުނު އޮގަސްޓު މަހު، ދުންފަތާއި ދުފުމުގެ ބާވަތްތަކުން 22.63 ޕަސެންޓު ދަށްވިއެވެ. މިދިޔަ އަހަރުގެ މި މުއްދަތާ އަޅާބަލާއިރު، މި އަހަރުގެ މި މުއްދަތުގައި ދުންފަތާއި ދުފުމުގެ ބާވަތްތަކުން 26.17 ޕަސެންޓު ދަށަށް ވަނީ ގޮސްފައެވެ.
ސިނގިރޭޓުތަކެއް: މި ބާވަތުގެ އަގުތައް ވެސް ވަނީ ވަރަށް ބޮޑަށް ދަށްވެފައި --- ސަން ފޮޓޯ/ މާނިއު މުހައްމަދުރެސްޓޯރަންޓު ކެފޭތަކުގައި ސިނގިރޭޓު ވިއްކާ މިންވަރު މިދިޔަ ވަނީ، 17.76 ޕަސެންޓު ދަށްވެފައެވެ. އަދި، އާންމުކޮށް ސިނގިރޭޓު ވިއްކާ ތަންތަނުގައި އަގުތައް ވަނީ، 31.64 ޕަސެންޓު ދަށްވެފައެވެ.
ސްޓެޓިސްޓިކްސް ބިއުރޯއިން ބުނި ގޮތުގައި، އެ ބާވަތްތަކުގެ އަގުތައް ދަށްވީ، ސަރުކާރުން ނަގަން ފެށި އިމްޕޯޓު ޑިއުޓީތަކާ ހެދިއެވެ. ކުރިން ނަގަމުން އައި އިމްޕޯޓް ޑިއުޓީ ދެ ގުނަ ވަނީ ކުޑަކޮށްފައެވެ.
މި ސަރުކާރުން ފުރަތަމަ ވަނީ ސިނގިރޭޓުގެ އަގު ވަރަށް ބޮޑަށް އުފުލާފައެވެ. ނަމަވެސް އޭގެ ސަބަބުން ވަގު ސިނގިރޭޓުގެ ވިޔަފާރި އިންތިހާއަށް އިތުރުވެގެން ދިޔުމާ ގުޅިގެން، ދުނިޔޭގެ ޞިއްޙަތު ޖަމިއްޔާ (ޑަބްލިޔުއެޗްއޯ) ގެ ލަފާގެ މަތިން ކަމަށް ބުނެ ފަހުން ވަނީ ސިނގިރޭޓުގެ ޑިއުޓީ ކުޑަކޮށްފައެވެ. ޑިއުޓީ ކުޑަކުރުމާއެކު ރާއްޖޭގެ ބާޒާރުގައި ސިނގިރޭޓުގެ އަގު ދަށްވެފައިވާއިރު، މިއީ ގިނަ ބައެއްގެ ފާޑުކިޔުން އަމާޒުވި ކަމެކެވެ.
އޭގެއިތުރުން، ވޭޕު އެތެރެކުރުމާއި ގެންގުޅުން ވެސް މަނާކޮށްފައިވާއިރު، ޖެނެރޭޝަނަލް ބޭންއެއް ވެސް ވަނީ ތައާރަފުކޮށްފައެވެ.
ދުފުމަކީ ގިނަ ދިވެހީންތަކެއް ދެވިހިފާފައިވާ ކަމަކަށްވާއިރު އެކަމުގެ ސަބަބުން އެންމެ އާއްމުކޮށް ޖެހޭ އަނގައިގެ ކެންސަރު ރާއްޖޭގައި ވެސް އަންނަނީ އިތުރުވަމުންނެވެ. ދުނިޔޭގެ ސިއްހަތު ޖަމިއްޔާގެ ތަފާސްހިސާބުތައް ދައްކާ ގޮތުން ދެކުނު އޭޝިއާ ސަރަހައްދުގައި އާބާދީގެ ނިސްބަތުން އަނގައިގެ ކެންސަރު ޖެހިފައިވާ އެންމެ ގިނަ މީހުން ތިބީ ދިވެހިރާއްޖޭގައި ކަމަށްވާއިރު، ދުފުމާ ގުޅިގެން ދަތްތަކުގައި ރެނދުލުމަކީ ވެސް ރާއްޖޭގައި ވަރަށް އާންމު މައްސަލައެކެވެ.