ރާއްޖޭގައި ފުރަތަމަ ފަހަރަށް، ނެވިގޭޝަން ޓެކްނޮލޮޖީގެ އެހީގައި ސިކުނޑީގެ އޮޕަރޭޝަނެއް ދަރުމަވަންތަ ހޮސްޕިޓަލުގެ ނިއުރޯސާޖަރީ ޑިޕާޓްމަންޓުން އިއްޔެ ކާމިޔާބުކަމާއެކު ކޮށްފިއެވެ.
އިންދިރާ ގާނދީ މެމޯރިއަލް ހޮސްޕިޓަލް (އައިޖީއެމްއެޗް) އިން ބުނި ގޮތުގައި، މިއީ ރާއްޖޭގައި ސިކުނޑީގެ ފަރުވާ ދިނުމުގައި ލިބުނު ވަރަށް ބޮޑު ކުރިއެރުމެކެވެ. މި އޮޕަރޭޝަންގައި ބޭނުންކޮށްފައިވަނީ މެޑްޓްރޯނިކްސް ކުންފުނީގެ "ސްޓެލްތްސްޓޭޝަން އެސް8" ނިޒާމެވެ. މިއީ ސީޓީ އަދި އެމްއާރުއައި ސްކޭންތަކުގެ އެހީގައި ބަލިމީހާގެ ސިކުނޑީގެ އެތެރެ ވަރަށް ތަފުސީލުކޮށް ދައްކައިދީ، އޮޕަރޭޝަން ކުރާ ވަގުތު ސާޖަރީގައި ބޭނުންކުރާ އާލާތްތައް ހުރި ތަން ޓްރެކްކޮށްދޭ ކޮމްޕިއުޓަރު ނިޒާމެކެވެ.
މެޑްޓްރޯނިކްސްއިން ބުނާ ގޮތުގައި މި ޓެކްނޮލޮޖީ މަސައްކަތްކުރަނީ ސިކުނޑީގެ އޮޕަރޭޝަންތަކަށް ޚާއްސަ ޖީޕީއެސް ނިޒާމެއް ފަދައިންނެވެ. އޮޕަރޭޝަން ފެށުމުގެ ކުރިން ޑޮކްޓަރުންނަށް ބަލިމީހާގެ ސްކޭންތައް ބޭނުންކޮށްގެން އޮޕަރޭޝަން ކުރިއަށްގެންދާނެ މަގު ރާވާލެވެއެވެ. އަދި އޮޕަރޭޝަން ކުރަމުންދާ ވަގުތު، ސިކުނޑީގެ މުހިންމު ހިސާބުތަކަށް ގެއްލުން ނުވާނެހެން އަމާޒުކޮށްފައިވާ ތަނަށް ވާސިލުވުމަށް މި ނިޒާމުން މަގުދައްކައިދެއެވެ.
ސިކުނޑީގެ އޮޕަރޭޝަންތަކަކީ ވަރަށް ނާޒުކު އޮޕަރޭޝަންތަކަކަށް ވާއިރު، ހަރަކާތްކުރުމާއި، ވާހަކަދެއްކުމާއި، ފެނުމުގެ އިތުރުން ހަނދާންކުރުން ފަދަ މުހިންމު ކަންކަން ކޮންޓްރޯލްކުރަނީ ސިކުނޑީގެ އެކި ހިސާބުތަކުންނެވެ. އެހެންކަމުން، މި ނިޒާމުގެ ސަބަބުން ސިކުނޑީގެ ޓިއުމަރު ނެގުމާއި، ބަޔޮޕްސީ ހެދުން ފަދަ ކަންކަމުގައި ސާޖަނުންނަށް އިތުރު ފަސޭހަތަކެއް ލިބިގެންދާނެއެވެ. ނަމަވެސް، މިއީ ސާޖަނުންގެ ބަދަލުގައި މަސައްކަތްކުރާ ނިޒާމެއް ނޫން ކަމަށާއި، މިއީ ހަމައެކަނި އެހީތެރިވެދޭ ވަސީލަތެއް ކަމަށް މެޑްޓްރޯނިކްސްއިން ފާހަގަކުރެއެވެ.
ދަރުމަވަންތަ ހޮސްޕިޓަލުގައި މި ޓެކްނޮލޮޖީ ތައާރަފުކޮށްފައިވަނީ، މާލެ ސިޓީ ގްރޫޕް އޮފް ހޮސްޕިޓަލްސްގެ ދަށުން ޚާއްސަ ބަލިތަކުގެ ފަރުވާ ފުޅާކުރުމަށް ކުރަމުންދާ މަސައްކަތްތަކުގެ ތެރެއިންނެވެ. އެގޮތުން، މި އަހަރުގެ ފެބްރުއަރީ މަހު އައިޖީއެމްއެޗްގައި ވަނީ "ނޭޝަނަލް ސެންޓާ ފޯ ނިއުރޯސައިންސަސް އެންޑް ސްޓްރޯކް" ހުޅުވާފައެވެ. އައިޖީއެމްއެޗުން ބުނި ގޮތުގައި މި މަރުކަޒުގެ ބޭނުމަކީ ސިކުނޑިއާއި މައިބަދައިގެ އޮޕަރޭޝަންތަކާއި ސްޓްރޯކްގެ ފަރުވާ ރާއްޖޭގައި ފުޅާކުރުމެވެ. މި މަރުކަޒާއެކު، ރާއްޖެއިން ބޭރަށް ފަރުވާ ހޯދަން ދާންޖެހޭ މިންވަރު މަދުކުރެވޭނެ ކަމަށް އެ ހޮސްޕިޓަލުން ވަނީ ފާހަގަކޮށްފައެވެ.
މީގެ އިތުރުން، ފާއިތުވި ދުވަސްތަކުގައި އައިޖީއެމްއެޗް އަދި ދަރުމަވަންތަ ހޮސްޕިޓަލުން ވަނީ ގިނަ އައު ޚިދުމަތްތަކެއް ތައާރަފުކޮށްފައެވެ. އޭގެ ތެރޭގައި ލޭނާރުގެ ސާޖަރީއާއި، ކުޑަކުދިންގެ ދަތުގެ ފަރުވާއާއި، ދުވަސްނުފުރާ އުފަންވާ ކުދިންނަށް ދޭ ޚާއްސަ ފަރުވާ ހިމެނެއެވެ. އަދި މިދިޔަ މެއި މަހު އެ ދެ ހޮސްޕިޓަލުން ވަނީ ލޭޒާ ޓެކްނޮލޮޖީ ބޭނުންކޮށްގެން ފުރަތަމަ ފަހަރަށް އޮޕަރޭޝަންތަކެއް ވެސް ފަށާފައެވެ. މީގެ ތެރޭގައި ފައިގެ ނާރު ފުއްޕުމާއި ބަވާސީރު ފަދަ ބަލިތަކަށް ދޭ ލޭޒާ ފަރުވާ ހިމެނެއެވެ. ހަމައެއާއެކު، ދަރުމަވަންތަ ހޮސްޕިޓަލުގެ ކެތެޓަރައިޒޭޝަން ލެބޯޓަރީ މަރާމާތުކޮށް، ހިތާއި ލޭނާރުގެ ބަލިތަކަށް ފަރުވާދޭން ވަނީ ފަށާފައެވެ.
މާލެ ސިޓީ ގްރޫޕް އޮފް ހޮސްޕިޓަލްސްގެ ސީއީއޯ އިބްރާހީމް އަބްދުއްރައްޒާގު ހަލީމް ކުރިން ވިދާޅުވި ގޮތުގައި، މި އަހަރުގެ ތެރޭގައި 16 ސްޕެޝަލިސްޓް އަދި ސަބް-ސްޕެޝަލިސްޓް ޑޮކްޓަރުން ވަނީ އެ ހޮސްޕިޓަލްތަކާ ގުޅިފައެވެ. މީގެ ތެރޭގައި ނިއުރޯއިންޓަވެންޝަނަލް ރޭޑިއޮލޮޖީއާއި ކްލިނިކަލް ހީމަޓޮލޮޖީ ފަދަ ދާއިރާތަކުން ތަމްރީނުވެފައިވާ ޑޮކްޓަރުން ހިމެނެއެވެ.
ރައީސް އޮފީހުން ހާމަކޮށްފައިވާ ގޮތުގައި، ކުރިއަށް އޮތް ތާނގައި އިންޓަވެންޝަނަލް ރޭޑިއޮލޮޖީއާއި، ކާޑިއޯތޮރެސިކް އަދި ވެސްކިއުލާ ސާޖަރީގެ އިތުރުން ރޮބޮޓިކް ސާޖަރީގެ ޚިދުމަތްތައް ވެސް ސަރުކާރުގެ ހޮސްޕިޓަލްތަކަށް ތައާރަފުކުރުމަށް ވަނީ ރާވާފައެވެ.