ކުރިއަށް އޮތް ރިޔާސީ އިންތިހާބުގައި މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ ފަރާތުން ވާދަކުރަން އެންމެ ގާބިލު ކެންޑިޑޭޓަކީ ކޮބައިތޯ ބެލުމަށް "ސަން އޮންލައިން" އިން ކުރިއަށްގެންދިޔަ ޕޯލް، އެ ޕާޓީގެ ކުރީގެ ރައީސް ޢަބްދުﷲ ޝާހިދު ކާމިޔާބުކުރައްވައިފިއެވެ.
މިދިޔަ ހޯމަ ދުވަހުން ފެށިގެން ރޭ 23:59 ގެ ނިޔަލަށް ކުރިއަށް ގެންދިޔަ މި ޕޯލްގެ ނަތީޖާ ދައްކާ ގޮތުން، ވޯޓުލީ މީހުންގެ ތެރެއިން އެންމެ ބޮޑު ތާއީދެއް ލިބިވަޑައިގަތީ ޝާހިދަށެވެ. އެގޮތުން އޭނާއަށް ވަނީ 58.3 އިންސައްތަ ވޯޓު ލިބިވަޑައިގެންފައެވެ.
https://www.sun.mv/polls/11/results
ދެވަނައަށް އެންމެ ގިނަ ވޯޓު ލިބިވަޑައިގަތީ ކުރީގެ ރައީސް އިބްރާހީމް މުހައްމަދު ސާލިހަށެވެ. އެމަނިކުފާނަށް 16 އިންސައްތަ ވޯޓު ލިބިވަޑައިގެންނެވިއިރު، ކުރީގެ ރައީސް މުހައްމަދު ނަޝީދަށް ލިބިވަޑައިގަތީ 13.9 އިންސައްތަ ވޯޓެވެ.
މީގެ އިތުރުން، ޑރ. އަހްމަދު ޝަމްހީދަށް 6.7 އިންސައްތަ، ފައްޔާޒު އިސްމާއީލަށް 4.9 އިންސައްތަ އަދި ފައިސަލް ނަސީމަށް 0.3 އިންސައްތަ ވޯޓު ވަނީ ލިބިވަޑައިގެންފައެވެ.
މި ޕޯލަކީ ވަރަށް ވާދަވެރިކޮށް ކުރިއަށްދިޔަ އަދި ގިނަ އަދަދެއްގެ ބަޔަކު ވޯޓުލީ ޕޯލެކެވެ. ވޯޓުލުމަށް ގިނަ ބަޔަކު އެއްފަހަރާ ވަނުމުގެ ސަބަބުން ސަންގެ ވެބްސައިޓަށް ބާރުބޮޑުވި އެތައް ފަހަރެއް ދިޔައެވެ.
ޝާހިދު މި ޕޯލް ކާމިޔާބުކުރެއްވިއިރު، އެމްޑީޕީގެ އެތެރޭގައި ޕްރައިމަރީގެ ވާދަވެރިކަން ވަނީ ވަރަށް ބޮޑުވެފައެވެ. އެ ޕާޓިގެ ކޮންގްރެސް އަންނަ މަހު ބާއްވާއިރު ޕްރައިމަރީ އަންނަ އަހަރުގެ ކުރީކޮޅު ބާއްވަން ދަނީ ތައްޔާރުވަމުންނެވެ.