ތިލަފުށީގައި ތަރައްގީކުރާ އާ ބައިނަލްއަގުވާމީ ބަނދަރުގެ މިލްކުވެރިކަމާއި ހިންގުމުގެ ފުރިހަމަ ކޮންޓްރޯލް ދެމިއޮންނާނީ ދިވެހި ސަރުކާރުގެ ދަށުގައި ކަމަށް މިނިސްޓްރީ އޮފް އިކޮނޮމިކް ޑިވެލޮޕްމަންޓް، ޓްރާންސްޕޯޓް އެންޑް ޓްރޭޑުން މިއަދު ބުނެފިއެވެ.
މިނިސްޓްރީން މިކަން ހާމަކުރީ، ބަނދަރު ތަރައްގީކުރުމުގެ މަޝްރޫއުގައި ސަރުކާރުން އިސްކަން ދެނީ އިންޑިއާއަށް ކަމަށް ކުރީގެ ރައީސް އަބްދުالله ޔާމީން މި ފަހުން ވިދާޅުވެފައި ވަނިކޮށެވެ.
މިނިސްޓްރީން ނެރުނު ބަޔާނުގައި ބުނި ގޮތުގައި، މި މަޝްރޫއު ހަވާލުކޮށްފައިވަނީ ރާއްޖޭގެ ގާނޫނުތަކާއި އުމްރާނީ ތަރައްގީގެ މަޝްރޫއުތަކަށް ކަނޑައަޅާފައިވާ އުސޫލުތަކުގެ ތެރެއިންނެވެ. އަދި މިއީ ރާއްޖޭގެ އެއްވެސް ބައިވެރިއަކާމެދު އޮތް ގުޅުމަށް އައި ބަދަލެއް ރަމްޒުކޮށްދޭ ކަމެއް ނޫން ކަމަށްވެސް އެ ބަޔާނުގައި ފާހަގަކޮށްފައިވެއެވެ.
އިކޮނޮމިކް މިނިސްޓަރު މުހައްމަދު ސައީދު ވިދާޅުވި ގޮތުގައި، ތިލަފުށީ ބަނދަރަކީ ދިވެހި ރައްޔިތުންނާއި ގައުމުގެ ދިގު މުއްދަތުގެ ފާގަތިކަމަށް ހިދުމަތްކުރާނެ ތަނެކެވެ.
"އެ މަޝްރޫއު ހަވާލުކުރެވިފައިވަނީ ސަރުކާރުން ކަނޑައަޅާފައިވާ އުސޫލުތަކުގެ ތެރެއިން. އަދި އެއީ އަޅުގަނޑުމެންގެ އެއްވެސް ބައިވެރިއަކާމެދު ދެވޭ މެސެޖެއް ކަމުގައި ދެކިގެން ނުވާނެ. ރާއްޖެއިން އަބަދުވެސް އެ ހުރިހާ ބައިވެރިންގެ އަގުވަޒަންކުރޭ،” މިނިސްޓަރު ވިދާޅުވިއެވެ.
އިކޮނޮމިކް މިނިސްޓަރު ސައީދު ރައީސް އޮފީހުގެ ނޫސްވެރިންގެ ބައްދަލުވުމެއްގައި -- ފޮޓޯ: ރައީސް އޮފީސްމީގެ އިތުރުން، ސަރުކާރުގެ 'މޯލްޑިވްސް ފަސްޓް' ހާރިޖީ ސިޔާސަތަކީ ރާއްޖޭގެ ސިޔާދަތާއި ގައުމީ މަސްލަހަތު އިސްކޮށްގެން ބައިނަލްއަގުވާމީ ހުރިހާ ފަރާތްތަކާއެކުވެސް ބިނާކުރަނިވި ގުޅުމެއް ބޭއްވުން ކަމަށް މިނިސްޓްރީން ބުނެފައިވެއެވެ.
ތިލަފުށީގައި ތަރައްގީކުރާ އާ ބަނދަރަކީ ގާތްގަނޑަކަށް 250 މިލިއަން ޑޮލަރުގެ މަޝްރޫއެކެވެ. މި މަޝްރޫއުގެ ފުރަތަމަ ފިޔަވަހީގެ މަސައްކަތް މި އަހަރުގެ ފެބްރުއަރީ މަހު ވަނީ ޗައިނާ ހާބާ އިންޖިނިއަރިން ކޮމްޕެނީ (ސީއެޗްއީސީ) އާ ހަވާލުކޮށްފައެވެ. މޯލްޑިވްސް ޕޯޓްސް ލިމިޓެޑް (އެމްޕީއެލް) އިން މައުލޫމާތު ދީފައިވާ ގޮތުގައި، 20 ހެކްޓަރުގެ ބިމެއްގައި ތަރައްގީކުރާ މި ބަނދަރު ނިމުމުން، އަހަރަކު ތިން ލައްކަ ޓީއީޔޫ (ކޮންޓެއިނަރު) ހެންޑްލް ކުރުމުގެ ގާބިލުކަން ލިބިގެންދާނެއެވެ. މިއީ މިދިޔަ އަހަރު މާލޭގެ ބަނދަރުން ހެންޑްލްކުރި 135،000 ޓީއީޔޫއާ އަޅައި ބަލާއިރު ދެގުނައަށް ވުރެ ބޮޑު އަދަދެކެވެ. ސަރުކާރުން އަމާޒު ހިފާފައިވަނީ އަންނަ އަހަރުގެ ނޮވެންބަރު 11ގެ ނިޔަލަށް މާލޭގެ ވިޔަފާރި ބަނދަރު އެއްކޮށް ތިލަފުއްޓަށް ބަދަލުކުރުމަށެވެ.
މާލޭގެ ވިޔަފާރި ބަނދަރު ތިލަފުއްޓަށް ބަދަލުކުރުމަކީ، މިހާރު މާލޭގެ ބަނދަރަށް ދިމާވެފައިވާ ޖާގައިގެ ދަތިކަމާއި ތޮއްޖެހުމުގެ މައްސަލައަށް އޮތް ދާއިމީ ހައްލު ކަމަށް ކަމާބެހޭ ފަރާތްތަކުން ފާހަގަކުރެއެވެ. އެންމެ ފަސް ހެކްޓަރުގެ ބިމެއްގައި 1980 ގެ އަހަރުތަކުގައި ތަރައްގީކޮށްފައިވާ މާލޭގެ ބަނދަރު ތޮއްޖެހުމުގެ ސަބަބުން، މުދާ ކްލިއާ ކުރުމަށް ބައެއް ފަހަރު ދެ ހަފުތާއަށް ވުރެ ގިނަ ދުވަސް ނަގައެވެ. މިކަމުގެ ސަބަބުން ޑެމަރޭޖް ޗާޖުގެ ގޮތުގައި ވިޔަފާރިވެރިންނަށް ބޮޑެތި ގެއްލުންތަކާ ކުރިމަތިލާން ޖެހި، މުދަލުގެ އަގު އުފުލުމަށް މަގުފަހިވާ ކަމަށް ވިޔަފާރިވެރިންނާ ހަވާލާދީ މީޑިއާތަކުން ރިޕޯޓުކޮށްފައިވެއެވެ.
މި ދަތިތަކަށް ވަގުތީ ހައްލެއް ހޯދައިދިނުމުގެ ގޮތުން، މުދާ ކްލިއާ ކުރުމުގެ ހިދުމަތް 24 ގަޑިއިރަށް ބަދަލުކޮށް، ޑެމަރޭޖް ފްރީ މުއްދަތު 80 ގަޑިއިރުން 124 ގަޑިއިރަށް މި ސަރުކާރުން ވަނީ އިތުރުކޮށްދީފައެވެ. މި އަހަރުގެ ކުރީކޮޅު ބަނދަރު ތޮއްޖެހުމުގެ ސަބަބުން ރާއްޖެއަށް މުދާ ހިފައިގެން އައި 4،200 އެއްހާ ކޮންޓެއިނަރު ސްރީލަންކާގެ ކޮލަމްބޯ ބަނދަރުގައި ތާށިވެފައި އޮތްކަންވެސް ފާހަގަކޮށްލެވެއެވެ. އާ ބަނދަރު ހުޅުވުމާއެކު، މުދާ ކްލިއާ ކުރުމަށް މިހާރު ނަގާ ހަތް ދުވަހުގެ މުއްދަތު 48 ގަޑިއިރަށް ކުޑަކުރެވޭނެ ކަމަށް ސަރުކާރުން ވަނީ އިއުލާންކޮށްފައެވެ.