މާލޭ ވިޔަފާރި ބަނދަރު ކ. ތިލަފުއްޓަށް ބަދަލުކުރުމަށް ހިންގާ ބިޔަ މަޝްރޫއު ނިމުމާއެކު އާންމު ދިރިއުޅުމުގެ ހަރަދުތައް ކުޑަވެ، ތާޒާކަންމަތީގައި ކާބޯތަކެތި ލިބެން ފަށާނެކަމަށް އިކޮނޮމިކް މިނިސްޓަރު މުޙައްމަދު ސަޢީދު ވިދާޅުވެއްޖެއެވެ.
މިނިސްޓަރު މިފަދައިން ވިދާޅުވީ ވިޔަފާރި ބަނދަރު ތިލަފުއްޓަށް ބަދަލުކުރުމުގެ މަޝްރޫއު ކުރިއަށްދާ ގޮތް ބައްލަވައިލެއްވުމަށް ރައީސް ޑރ. މުހައްމަދު މުއިއްޒު ތިލަފުއްޓަށް އިއްޔެ ކުރެއްވި ޒިޔާރަތުގައި މީޑިއާއާ ވާހަކަދައްކަވަމުންނެވެ.
ސަރުކާރުގެ އަމާޒަކީ އެ މަޝްރޫއުގެ ފުރަތަމަ ފިޔަވަހީގެ މަސައްކަތް ނިންމައި އަންނަ އަހަރުގެ ނޮވެމްބަރު 11 ގައި ތިލަފުށި ޕޯޓު ހުޅުވުމެވެ. އަދި މުޅި މަޝްރޫއު ނިންމަން އަމާޒު ހިފާފައި ވަނީ ނޮވެމްބަރު 2028 އަށެވެ.
ނަމަވެސް މާލޭގެ ވިޔަފާރި ބަނދަރުގެ ހާލަތު ހުރި ގޮތުން އެކަށީގެންވާ ވަސީލަތްތައް ނެތުމުގެ ދަތިތަކުން އަރައިގަތުމަށްޓަކައި މި މަހުގެ 28 ގައި ތިލަފުށީގައި ޕޯޓު އޮޕަރޭޝަން ފަށާނެކަމަށް އެމްޕީއެލް އިން އިއުލާނުކޮށްފައި ވެއެވެ.
ރާއްޖޭގައި ބައެއް ބާވަތުގެ މުދަލުގެ އަގު އިންތިހާއަށް އުފުލޭ މައިގަނޑު އެއް ސަބަބުކަމަށް ވެފައިވަނީ މާލޭ ވިޔަފާރި ބަނދަރަށް ކައިރިކުރާ ބޯޓުތަކުން މުދާ ހުސްކުރުމަށް ދިގު މުއްދަތެއް ހޭދަވުމެވެ. އެގޮތުން މިވަގުތު މިކަމަށް ހަތް ދުވަހާއި 14 ދުވަހާ ދެމެދުގެ މުއްދަތެއް ހޭދަވެއެވެ. ނަމަވެސް ތިލަފުށީ ޕޯޓު ހުޅުވުމާއެކު އެންމެ ދުވަހެއްގެ ތެރޭ މުދާތައް ހުސްކޮށް ނިންމާލެވޭނެކަމަށް މިނިސްޓަރު ސަޢީދު ވިދާޅުވިއެވެ.
"މިކަމުގެ އާހިރު ނަތީޖާއަކަށް ވާނީ އާންމު ރައްޔިތުން ގޭގޭގައި ދިރިއުޅުއްވާ ބޭފުޅުންގެ ކޮސްޓް އޮފް ލިވިންއަށް ވަރަށް ބޮޑު ލުޔެއް ލިބިގެންދިއުން. ކާބޯތަކެތި، ތަރުކާރީ މިހެން ގޮސް އެކި ބާވަތްބާވަތް ތާޒާކަންމަތީގައި ބޯޓުފަހަރުން ގެނެސް ވަގުތު ބޭލޭނެ،" މިނިސްޓަރު ވިދާޅުވިއެވެ.
ތިލަފުއްޓަށް ޕޯޓު ބަދަލުކުރުމުގެ ސަބަބުން އެންމެ ބޮށު އުފަލެއް ލިބޭނީ ދިވެހި ވިޔަފާރިވެރިންނަށް ކަމަށް މިނިސްޓަރުގެ ވާހަކައިގައި ފާހަގަކުރެއްވިއެވެ.
ރާއްޖެއަށް ގެންނަ މުދާ ބޭލުމުގައި އޮތީ ވާރުތަވަމުން އައި ދަތިތަކެއް ކަމަށާއި އެކަމަކު ރައީސް މުޢިއްޒުގެ އަމާޒަކަށްވީ ވެރިކަމާ ހަވާލުވެވަޑައިގެން ފުރަތަމަ ދުވަހުން ފެށިގެން ވެސް މައްސަލަ ހައްލުކުރެއްވުން ކަމަށް މިނިސްޓަރު ވިދާޅުވިއެވެ.
މުޅި މަޝްރޫއު ނިމޭއިރު މާލޭގެ ބާޒާރުގައި މިހާރު ހިންގާ އަތޮޅު ފިހާރަތަކާއި ގުދަންތައްވެސް ތިލަފުއްޓަށް ބަދަލުކޮށް، ފްރީ ޒޯންތައް ގާއިމްކުރާނެކަމަށް މިނިސްޓަރު ވިދާޅުވިއެވެ.
ތިލަފުއްޓަށް މާލޭ ވިޔަފާރި ބަނދަރު ބަދަލުކުރުމުގެ މަސައްކަތުގައި، އެތެރޭގެ އުޅަނދުފަހަރަށް ހާއްސަ ކީ-ވޯލްގެ ފުރަތަމަ 100 މީޓަރުގެ މަސައްކަތް މިހާރު ވަނީ ނިމިފައެވެ. އަދި އެތެރޭގެ ކީ-ވޯލްގެ ހިއްކި ސަރަޙައްދު ބެކްފިލް ކުރުމުގެ ގާތްގަނޑަކަށް 40 ޕަސެންޓު މަސައްކަތްވެސް މިހާރު ވަނީ ނިމިފައެވެ.