އައްޑޫގައި ހުޅުޖެހި މައްސަލައިގައި ދައުވާ ކުރި 31 މީހަކު ދައުވާ އަށް އިންކާރުކޮށްފި

ފެބްރުއަރީ އަށް ވަަނަ ދުވަހު އައްޑޫ ސިޓީގައި ހުރި ދައުލަތުގެ އިމާރާތްތަކުގައި ހުޅުޖެހި މައްސަލައިގައި ދައުލަތުން ދައުވާ ކުރި 31 މީހަކު ދައުވާ އަށް އިންކާރުކޮށްފި އެވެ.

ކްރިމިނަލް ކޯޓުގެ މީޑިއާ އޮފިޝަލް އަހުމަދު މުހައްމަދު މަނިކު މިއަދު ވިދާޅުވީ މިއަދު ޝަރީއަތަށް ހާޒިރުވި 31 މީހެއްގެ މައްޗަށް ދައުލަތުން ކުރި ޓެރަރިޒަމްގެ ދައުވާ އަށް އެ އެންމެން ވެސް އިންކާރުކޮށްފައިވާކަމަށެވެ.

އޭނާ ވިދާޅުވީ އެ މީހުން ދައުވާ އަށް އިންކާރުކުރުމަށް ފަހު ދިފާއުގައި ހެކި ހުށަހަޅަން ފުރުސަތަކަށް އެދުމުން އެ އެންމެންނަށް ވެސް އެކަމަށް ތިން ދުވަހުގެ ފުރުސަތެއް ގާޒީ ދެއްވާފައިވާކަމަށެވެ.

"ފެބްރުއަރީ އަށް ވަނަ ދުވަހު ސ. އަތޮޅުގައި ހުރި ދައުލަތުގެ އެކިއެކި ތަންތަނުގައި ހުޅުޖަހާ އެތެތަންތާގެ މުދަލަށް ގެއްލުންދީ ފުލުހުންނާއި ސިފައިންނަށް ހަމަލާދީފައިވާކަމަށް ތުހުމަތު ކުރެވޭ 31 މީހެއްގެ މައްޗަށް ދައުލަތުން ކުރި ޓެރަރިޒަމްގެ ދައުވާ އަށް އެ އެންމެން ވެސް ވަނީ އިންކާރުކޮށްފައި. އަދި ދިފާއުގައި ހެކި ހުށަހެޅުމަށް އެ އެންމެވެސް އެދުމުން ގާޒީ ވަނީ ދިފާއީ ހެކި ހުށަހެޅުމަށް ތިން ދުވަހުގެ ފުރުސަތެއް އެ އެންމެންނަށް ދެއްވާފައި،" މަނިކު ވިދާޅުވި އެވެ.

ޓެރަރިޒަމްގެ ދައުވާ އަށް މިއަދު އިންކާރުކޮށްފައި ވަނީ މާލޭ ދަފްތަރު 4271 މުހައްމަދު އިބްރާހިމާއި ސ. ފޭދޫ ސަންޝައިން އަހުމަދު ނަބީލާއި ސްނޯވައިޓް އަހުމަދު ޝިހާޒާއި ތަރި، މޫސާ މަނިކުފާނާއި ރީތިގަސްދޮށުގޭ މުހައްމަދު އިމްތިޔާޒާއި ނިއުޒީފެހި ހުސެއިން ޝާމިނާއި ނާޒުކީގޭ އަބްދުﷲ ފާދިހާއި ހިރިގާ އަލީ އައްޒާމާއި ބީޗްވިލާ މުހައްމަދު ސައީދާއި ރައިހާނުގޭ އަލީ އާސިމާއި ސުވާސާގޭ އަބްދުﷲ ސައީދާއި ކާމަރަގަގޭ އިބްރާހިމް ނިޒާރާއި ޝާޒިލާމަންޒިލް ހަސަން ޝާނީޒާއި ސީރާޒީގޭ މުހައްމަދު ޖައިލަމް ސައީދާއި ސ. ހިތަދޫ ފިނިމާ ހަސަން ނާއިމާއި ބަދުރު މުހައްމަދު ރިޔާޒާއި ނީލޯފަރުގެ އަލީ ހަމީދާއި ކައުސަރު މުހައްމަދު މަނިކުފާނާއި ބަގީޗާވިލާ ޝަރަފް ރަޝީދާއި ޕްރިމްރޯޒް އަބްދުﷲ ރަމީޒާއި ޝީޝާ މުހައްމަދު ޝާން އާއި މެރިންގޯލްޑް އަހުމަދު ޝަރީފާއި ހެވަން ހުސެއިން ޒުހޭރާއި ސ. މަރަދޫފޭދޫ ރޯޝަނީ ހައުސް އަބްދުލް އަޒީޒާއި ނޫރު އަބްދުﷲ ޒުބައިރާއި ބީޗްފްލެޓް އަހުމަދު ރަޝީދާއި އިރަމާގޭ މުހައްމަދު ހަމީދާއި ސ. މަރަދޫ ލިވާޕޫލް އަލީ ރިމާޒާއި ރައިޓްފޭސް މުހައްމަދު ޝިފާޒާއި ޗިޗަންޑާގޭ މުހައްމަދު އާލިއު ގެ އިތުރުން ފޮރެސްޓް ނިޝާލް މޫސާ އެވެ.

އެ އެންމެންގެ މައްޗަށް ވެސް ދައުވާ ކޮށްފައި ވަނީ ރާއްޖޭގައި ޓެރަރިޒަމް މަނާކުރުމުގެ ގާާނޫނު ގެ ދެވަނަ މާއްދާގެ (ޅ) އާއި (ކ) އާ ހަވާލާދީ، އެގާނޫނުގެ ހަ ވަނަ މާއްދާގެ (ށ) ގެ ދަށުން ނެވެ.

އެ ގާނޫނުގައި ބުނާގޮތުން އެފަދަ ކުށެއް ސާބިތުވެއްޖެ މީހެއްގެ އަދަބަކީ 10 އަހަރާއި 15 އަހަރާއި ދެމެދުގެ މުއްދަތަކަށް ޖަލަށް ލުން ނުވަތަ އަރުވާލުމެވެ.