ތިމާ ހުރި ހިސާބުން ފަށާށެވެ.
ތިމާ އަދި ތައްޔާރުނޫންކަމަށް ގަބޫލުކުރެވޭތީ ކަމެއްފަށަން ފަސްޖެހުނު ފަހަރެއް ހަނދާންވޭހެއްޔެވެ؟
އަމިއްލަ ނަފްސާމެދު އިތުބާރު އުފެދެންދެން، ނުވަތަ ބޭނުންވާ ފައިސާއާއި ތަކެއްޗާއި ކަންކަން ހަމަޖެހެންދެން، ނުވަތަ ރަނގަޅުވަގުތާއިހާލަތަށް ކަންކަން ފެށުން ފަސްކުރުމަކީ ވަރަށްގިނަ ފަހަރަށް އެތައްބަޔަކު ކަންކުރާގޮތެވެ. އެހެންނޫނީ މާނަހުރި ކުރިއެރުމެއް ނުލިބޭނެކަށް ނުވަތަ ކާމިޔާނުވާނެކަމަށް ގަބޫލުކުރެވޭތީއެވެ. މިގޮތަށް ގަބޫލުކުރެވުމުން، އެދުވަސް އަންނަންދެން އަޅުގަނޑުމެން ތިބެނީ ތާށިވެފައެވެ.
ކާމިޔާބީ ހާސިލުކުރުމަށް ފަށާ ދަތުރަކީ ހުރިހާކަމެއް ފުރިހަމަވުމުން ފަށަންޖެހޭ ދަތުރެއް ނޫނެވެ. އަޅުގަނޑުގެ ތަޖުރިބާގައި – ކާމިޔާބުވެފައިވާ ގިނަކަންކަން ފެށެނީ ނުތަނަވަސްކަމާއި ކުރިމަގާއި މެދު ފުރިހަމަ މައުލޫމާތުނެތި، އެކަށީގެންވާ ވަސީލަތްތައް ވެސް ނެތިއެވެ. އެކަމަށް ތިމާއަށް ބޭނުންވިވަގުތު، ތިމާ ހުރި ހިސާބަކުން ތިމާއަށް ލިބިފައިވާ ވަސީލަތްތަކާއިއެކު ފެށުން އެއީ ކާމިޔާބު ހޯދުމަށް ފަށާ ދަތުރުފަށަން އެންމެ ރަނގަޅު ވަގުތެވެ.
އެކަމަށްޓަކާ ބޭނުންވަނީ ކުޑަ ހިތްވަރަކާއި ސާފުނިޔަތަކާއި ތިމާގެ އަމިއްލަ ނަފުސުގެ މައްޗަށް ފުރިހަމަ އިތުބާރު އޮތުމާއި، ތިމާއަށް އިތުބާރުކުރާ ބައިވެރިންނެވެ. އަދި އުނގެނި ދަސްކުރުމުގެ ވިސްނުމާއި އެކަމުގެ ޝައުގުވެރިކަމެވެ. ބައެއް ފަހަރު، އެވަރުން ފުދެއެވެ.
ހުރިހާކަމެއް ފުރިހަމަވުން ފުރިހަމަވުން ލާޒިމެއް ނޫން
އަޅުގަނޑުގެ ތަޖުރިބާގައި، ހަގީގީ ކުރިއެރުމަކީ ސާފުސީދާ މަގަކުން ހާސިލުކުރެވޭ އެއްޗެއް ނޫނެވެ. އެއީ ރޭވުންތެރިކަމާއެކު ތިމާކުރާ ކަންތައްތަކާއި ހޯދާ ކުދިކުދި ކާމިޔާބީތަކުގެ ތެރެއިން ވާސިލުވެވޭ ނަތީޖާއެކެވެ. މިކަމުގައި ތިމާއަށް ކުރެވޭ ކުށްތަކުން ހޯދާ އިބުރަތްތައް ވެސް މުހިންމެވެ.
ޝޯން އޭކޯގެ "ޒޯރޯ ސާކަލް" ގެ ތަޞައްވުރުގައި ބާރުއަޅާފައިވަނީ އަހަރެމެންނަށް ބާރު ފޯރުވޭ ކުޑަ މިންވަރަކުން ކަންކަން ފެށުމުގެ މުހިންމުކަމުގެ މައްޗަށެވެ. ބަދަލުކުރަންޖެހޭ ހުރިހާ ކަމެއްގެ ބުރަކަން ހިތަށްގެނެސް މާޔޫސްވުމުގެ ބަދަލުގައި، އެންމެ ފުރަތަމަ ސަމާލުކަން ދޭންވީ ކުރެވެން އޮތް އެންމެ ކުޑަ ކަމަކަށެވެ. އެ ގޮތުން ކަނޑައަޅާ ކުޑަކަމެއް ކޮންޓްރޯލް ކުރެވުމުން، އަމިއްލަ ނަފްސަށް އޮންނަ އިތުބާރު ބޮޑުވާން ފަށައެވެ. އޭގެ ފަހުން ކުރިއެރުން އަންނާނެއެވެ. މިއީ ކަމެއް ފަށަންބޭނުންވާއިރު އެ މަސައްކަތުގެ ބޮޑުކަން ހިތަށްވަދެ އެކަން ނުކުރެވިފައި ތިބޭ މީހުންނަށް އޮތް މުހިންމު ފިލާވަޅެކެވެ.
އެއްރޭ ތެރޭގައި މުޅި ދިރިއުޅުމުގެ ވައްޓަފާޅި ބަދަލު ނުކުރެވިދާނެއެވެ. ނަމަވެސް މިރޭ ފަންސަވީސް މިނެޓަށް ހިނގާލަން ދެވިދާނެއެވެ. ފުރަތަމަ ފިޔަވަޅަކީ ދަތުރު ނިންމާލަންޖެހޭ ފިޔަވަޅެއް ނޫނެވެ. އެއީ ހަމައެކަނި ދަތުރު ފަށައިގަތުމަށް ބޭނުންވާ ފިޔަވަޅެކެވެ.
ހަނދާން ބަހައްޓަންވީ، އިތުބާރު އަންނަނީ ކަމެއް ފެށުމަށްފަހުގައި ކަމެވެ. އިތުބާރަކީ އާންމުކޮށް ކަމެއް ކުރުމުގެ ނަތީޖާއެވެ. އެއީ ކަމެއް ކުރުމުގެ ކުރިން އޮންނަންޖެހޭ ޝަރުތެއް ނޫނެވެ.
އިޚްތިޔާރު ފެށެނީ ތިމާ ނިންމާ ނިންމުމަކުންނެވެ.
ދިރިއުޅުމުގެ ނިންމުންތައް ނިންމުމުގެ މިނިވަންކަން އޮތުމުގެ މާނައަކީ، ދިރިއުޅުމުގައި ދިމާވާ ކޮންމެ ކަމެއްގެ މައްޗަށް ފުރިހަމަ ބާރު އޮތުމެއް ނޫނެވެ. ދިމާވާ ކޮންމެ ހުރަހަކީ، ނުވަތަ ގެއްލުމަކީ، ނުވަތަ ނުތަނަވަސްކަމަކީ އަޅުގަނޑުމެން އަމިއްލައަށް އިޚްތިޔާރުކުރާ ކަންކަމެއް ނޫނެވެ. އަދި އެހެން މީހުން ނިންމާ ނިންމުންތަކާއި، އިގްތިސާދީ ބަދަލުތަކާއި، ނުވަތަ ކުއްލިއަކަށް ދިމާވާ ދަތިތަކަކީ އަޅުގަނޑުމެންގެ ބާރުގެ ދަށުގައިވާ ކަންކަމެއް ނޫނެވެ.
ނަމަވެސް، ކިތަންމެ ދަތި ހާލަތެއްގައިވެސް، އަބަދުވެސް އިޚްތިޔާރުކުރެވޭނެ ކަމެއް އޮވެއެވެ. އަހަރެމެންނަށް ކަމަކަށް އިޖާބަދޭނެ ގޮތެއް އިޚްތިޔާރު ކުރެވިދާނެއެވެ. އެހީއަށް އެދޭނެތޯ ނުވަތަ ނޫންތޯ ނިންމިދާނެއެވެ. ނާކާމިޔާބީން ފިލާވަޅު ލިބިގަންނާނީތޯ، ނުވަތަ އެއީ މަސައްކަތް ހުއްޓާލަންވީ ސަބަބެއް ކަމަށް ބަލާނީތޯ އިޚްތިޔާރު ކުރެވިދާނެއެވެ. ހިތްނުބައި މީހަކަށް ވާނީތޯ ނުވަތަ އޯގާތެރިކަން އިސްކުރާނީތޯ ނިންމިދާނެއެވެ.
ޝައުގުވެރިކަން އުފެދެންދެން މުއްދަތެއް ނެތް ގޮތަށް މަޑުކުރާނީތޯ ނުވަތަ އެއްވެސް ޝައުގުވެރިކަމެއް ނެތް ނަމަވެސް ކުޑަ ފިޔަވަޅެއް ކުރިއަށް އަޅާނީތޯ އިޚްތިޔާރު ކުރެވިދާނެއެވެ. އަމިއްލަ އިޚްތިޔާރު ފެށެނީ މި ހިސާބުންނެވެ. އެއީ މުޅި ދަތުރުގެ މައްޗަށް ބާރު ހިންގުމަކުން ނޫނެވެ، ނަމަވެސް ދެން އަޅާނެ ފިޔަވަޅަކަށް ޒިންމާދާރުވުމުންނެވެ.
ބައެއް ފަހަރު އަޅުގަނޑުމެން މާޔޫސްވަނީ، އަޅުގަނޑުމެންގެ "ފެށުން"، އެހެން މީހެއްގެ "މެދުތެރެއާ" އަޅާކިޔޭތީއެވެ. އަޅުގަނޑުމެން އަޅާކިޔަނީ އަމިއްލަ ނަފްސަށް އިތުބާރު އޮތް، ކާމިޔާބު މީހުންނާއެވެ. ނަމަވެސް އެ މީހުންގެ އެ ކާމިޔާބީގެ ފަހަތުގައި އޮތް ނުތަނަވަސްކަމުން ފުރިގެންވާ އަހަރުތަކެއް އަޅުގަނޑުމެންނަކަށް ނުފެނެއެވެ.
ކޮންމެ ކާމިޔާބު މީހަކީވެސް، ކޮންމެވެސް ދުވަހަކު ފުރަތަމަ ފަހަރަށް އެ މަސައްކަތް ކުރަން ފެށި މީހެކެވެ. ކޮންމެ ވަރުގަދަ އާދައަކީވެސް، ފުރަތަމަ ފެށިއިރު ބީރައްޓެހި ކަމެކެވެ. ކޮންމެ މާނަހުރި މަޝްރޫއަކީވެސް، ފުރަތަމަ ހަމައެކަނި ޚިޔާލެކެވެ.
ތަފާތަކީ، ބައެއް މީހުން އަތުގައި ހުރިހާ އެއްޗެއް ފެށުނީއްސުރެ ހުރުމެއް ނޫނެވެ. އެ މީހުންގެ ތަފާތަކީ، އަތުގައި ހުރި އެއްޗަކުން މަސައްކަތް ފަށައި، ދަތުރުގެ ތެރެއިން ދަސްކުރަންޖެހޭ ކަންކަން ދަސްކުރުމުގެ ފުރުސަތު ދިނުމެވެ.
'ވޯލްޑް ހެޕިނަސް ރިޕޯޓް' އިން ބުނެދޭ ފިލާވަޅު
ވޯލްޑް ހެޕިނެސް ރިޕޯޓުން، މީހުންގެ ދިރިއުޅުމުގެ އުފާވެރިކަން ވަޒަންކުރާ މިންގަނޑުތަކުގެ ތެރޭގައި އިޖުތިމާއީ އެހީތެރިކަމާއި، ދިރިއުޅުމުގެ ނިންމުންތައް ނިންމުމުގެ މިނިވަންކަމާއި، އަދި ދީލަތިކަން ހިމެނެއެވެ. މި ހޯދުންތަކުން އެނގެނީ އުފާވެރިކަމަކީ ހަމައެކަނި މާއްދީ ތަނަވަސްކަމެއް ނޫން ކަމެވެ. އެއީ އެހެން މީހުންގެ އެހީތެރިކަން ލިބުމާއި، އަމިއްލަ ދިރިއުޅުމުގެ މައްޗަށް ބާރު އޮތުމާއި، އަދި އެހެން މީހުންނަށް އެހީތެރިވެވުމުން ލިބޭ އިހުސާސެކެވެ.
2025 ވަނަ އަހަރުގެ ވޯލްޑް ހެޕިނަސް ރިޕޯޓުގައި ހާއްސަ ސަމާލުކަމެއް ދީފައިވަނީ އަޅާލުމާއި ހިއްސާކުރުމުގެ މައްޗަށެވެ. އެހީތެރިވުމުގެ ސަބަބުން އެހީ ލިބޭ މީހާގެ އިތުރުން އެހީވާ މީހާއަށްވެސް އޭގެ ފައިދާ ކުރާކަން އެ ރިޕޯޓުގައި ބަޔާންކޮށްފައިވެއެވެ. އެހެން ގޮތަކަށް ބުނާނަމަ، ދީލަތިކަމަކީ ހަމައެކަނި އެހެން މީހަކަށްޓަކައި ވާ ގުރުބާނީއެއް ނޫނެވެ. އެއީ ދޭ މީހާގެ ނަފްސާނީ ދުޅަހެޔޮކަން އިތުރުކޮށްދޭ ކަމެކެވެ.
މިއީ "ތިމާ ހުރި ހިސާބުން ފެށުން" މި ވިސްނުމާ ވަރަށް ބޮޑަށް ގުޅިފައިވާ ކަމެކެވެ. އަހަރެމެންގެ އަތުގައި ބޮޑު މުއްސަނދިކަމެއް ނެތަސް، ވަގުތު އޮވެދާނެއެވެ. ނުފޫޒެއް ނެތަސް، އޯގާތެރިކަން އިޚުތިޔާރު ކުރެވިދާނެއެވެ. ހުރިހާ ޖަވާބެއް ނޭނގުނު ކަމުގައި ވިޔަސް، އަނެކާގެ ވާހަކަ އަޑުއެހުމުގެ ގާބިލުކަން ހުރެދާނެއެވެ. އަނެކާގެ ދަތިތައް އެއްކޮށް ފިލުވާ ނުދެވުނުކަމުގަވިޔަސް، އެއީ އެކަނިވެރިއެއް ނޫންކަމުގެ އިހުސާސް ފޯރުކޮށްދެވިދާނެއެވެ.
ތިމާގެ އަތުގައި ދެވެންހުރި އެއްޗަކީ ކުޑަ އެއްޗެއް ކަމަށް ހީވި ނަމަވެސް، އެއީ އަނެކަކަށް އެންމެ ބޭނުންޖެހިފައިވާ އެއްޗަކަށް ވެދާނެއެވެ. އެހެންކަމުން، އުފާވެރިކަމަކީ ހާލަތު ބަދަލުވަންދެން މަޑުކުރަންޖެހޭ އެއްޗެއް ނޫނެވެ. އެއީ މިހާރު އަހަރެމެންނަށް ލިބިފައިވާ އިޚްތިޔާރުތަކާއި، ގުޅުންތަކާއި، އަދި އެހެން މީހުންނަށް ފޯރުކޮށްދޭ އެހީތެރިކަމުގެ ތެރެއިން ފެށިދާނެ ކަމެކެވެ.
އެހީތެރިކަން ހޯދުމުގެ މުހިންމުކަން
ތިމާހުރި ހިސާބަކުން ފެށުމުގެ މާނައަކީ ހުރިހާ ކަމެއް އެކަނި ކުރުމެއް ނޫނެވެ. "ވޯލްޑް ހެޕިނަސް ރިޕޯޓް" ގައި ތަކުރާރުކޮށް ބާރުއަޅާފައިވަނީ އިޖުތިމާއީ އެހީތެރިކަމުގެ މުހިންމުކަމުގެ މައްޗަށެވެ. އެއީ ދަތި ވަގުތުތަކުގައި ބަރޯސާވެވޭނެ މީހަކު ހުރުމެވެ. އެހީތެރިކަމުގެ ސަބަބުން މީހުންނަށް ހިތްވަރާއި ކަންކަމުން އަރައިގަތުމުގެ ބާރާއި ނުތަނަވަސް ހާލަތްތަކާ ކުރިމަތިލުމުގެ ގާބިލުކަން ލިބެއެވެ.
ބައެއް ފަހަރު، ތިމާ ހުރި ހިސާބުކަމަށް ބުނާއިރު، އޭގެތެރޭގައި ތިމާގެ ވަށައިގެންވާ މީހުން ހިމެނެއެވެ. އެއީ މަގުދައްކައިދޭނެ މެންޓަރ އަކަށް ވެދާނެއެވެ. ވާހަކަ އަޑުއަހާނެ ރަހުމަތްތެރިއަކަށް ވެދާނެއެވެ. ހިތްވަރުދޭނެ މަސައްކަތުގެ ބައިވެރިއަކަށް ވެދާނެއެވެ. ނުވަތަ އުންމީދު ދޫކޮށްނުލުމަށް ހަނދާންކޮށްދޭ އާއިލާގެ މެންބަރަކަށް ވެދާނެއެވެ.
އެހީތެރިކަމަށް އެދުމަކީ ބަލިކަށިކަމުގެ ނިޝާނެއް ނޫނެވެ. އެއީ ގިނަ ފަހަރަށް، މިހާރު ހުރި ވަސީލަތްތައް ބޭނުންކުރުމުގައި ގެންގުޅޭ ބުއްދިވެރި ގޮތެކެވެ. އަދި އަހަރެމެންނަށް އެހީތެރިކަން ބޭނުންވާ ފަދައިން، އަހަރެމެންނަކީވެސް އެހެން މީހަކަށް އެހީތެރިވެދޭނެ ބަޔަކަށް ވެވިދާނެއެވެ.
އިޚްލާޞްތެރިކަމާއެކު ބުނާ ހިތްވަރުގެ ބަހަކުން މީހަކަށް ކަމެއް ފަށަން އެހީތެރިވެދެވިދާނެއެވެ. ކެތްތެރިކަމާއެކު ދައްކާ ވާހަކައަކުން މީހެއްގެ އިތުރުބާރު އަނބުރާ ހޯދައިދެވިދާނެއެވެ. "މިކަން ކޮށްލަމާ ހިނގާ. އަހަރެންގެ ފުރިހަމަ އެހީތެރިކަން އޮންނާނެ." މިހެން ބުނާ ލީޑަރަކަށް، ބިރުވެރިކަމުގެ ސަބަބުން ފޮރުވިފައިވާ ގާބިލުކަން ނެރެދެވިދާނެއެވެ.
އަހަރެމެންގެ އަތުގައި ހުރި އެއްޗެއް ބޭނުންކޮށްގެން އެހެން މީހުންނަށް އެހީތެރިވުމުން، އުފާވެރިކަމާއި ކުރިއެރުމަކީ އެންމެންގެ މެދުގައި ހިއްސާކުރެވޭ ތަޖުރިބާއަކަށް ވެގެންދެއެވެ.