ސެމްސަންގް ކުންފުނިން އެންޑްރޮއިޑް 17 ގެ މައްޗަށް ބިނާކޮށް ނެރުމަށް ތައްޔާރުވަމުންދާ "ވަން ޔޫއައި 9" ސޮފްޓްވެއާގެ އެތެރޭގެ ޓެސްޓްތައް ކުރިއަށްވުރެ ގިނަ ގެލެކްސީ ފޯނުތަކާއި ޓެބްލެޓްތަކަށް ފޯރުކޮށްދިނުމަށް ފަށާފައިވާ ކަމަށް ރިޕޯޓްތައް ބުނެފިއެވެ.
މި އާ އަޕްޑޭޓްގެ ދާއިމީ ވާޝަން މި އަހަރުގެ ޖުލައި މަހުގެ ތެރޭގައި އެ ކުންފުނިން އަލަށް ބާޒާރަށް ނެރުމަށް ތައްޔާރުވާ ފަތްޖެހި ފޯނުތަކާއެކު ދައްކާލާނެ ކަމަށް ބެލެވެއެވެ.
މިހާރު ކުރިއަށްދާ އިންޓާނަލް ޓެސްޓްތަކުގެ ތެރެއިން ސެމްސަންގްގެ އެންމެ ފަހުގެ ފްލެގްޝިޕް ސީރީޒް ކަމަށްވާ ގެލެކްސީ އެސް26 ގެ ފޯނުތަކަށް ބީޓާ ޕްރޮގްރާމް ވަނީ ހުޅުވާލާފައެވެ. މީގެ އިތުރުން ގެލެކްސީ އެސް25، އެސް24 ސީރީޒްގެ ފޯނުތަކާއި، އޭ ސީރީޒްގެ ބައެއް ފޯނުތަކުގެ އިތުރުން ގެލެކްސީ ޓެބްލެޓްތަކުގައިވެސް މި ސޮފްޓްވެއާ ޓެސްޓްކުރުމުގެ މަސައްކަތް މިހާރު ދަނީ ކުރަމުންނެވެ.
އާ ސޮފްޓްވެއާ އަޕްޑޭޓްގައި ބޮޑެތި ބަދަލުތަކެއް ފެނުމުގެ ބަދަލުގައި، ބޮޑަށް އިސްކަންދީފައިވަނީ ސޮފްޓްވެއާގެ ހިނގުން އިތުރަށް އޮމާންކުރުމަށާއި، ބޭނުންކުރަން ފަސޭހަ ލޭއައުޓްތަކެއް ގެނައުމަށެވެ.
މީގެ އިތުރުން އެޕަލްގެ އެއާޑްރޮޕް ފަދައިން ސެމްސަންގް ފޯނުތަކުގެ މެދުގައި ފަސޭހައިން ފައިލް ޓްރާންސްފާ ކުރެވޭނެ "ޓެޕް ޓު ޝެއާ" ފީޗާ މި އަޕްޑޭޓާއެކު ތައާރަފްވެގެންދާނެ ކަމަށް ބެލެވެއެވެ.
ގެލެކްސީ އެސް26 ސީރީޒްގެ ފޯނުތައް ބޭނުންކުރާ ފަރާތްތަކަށް ސެމްސަންގް މެމްބާސް އެޕްލިކޭޝަން މެދުވެރިކޮށް މިހާރުވެސް ބީޓާ ވާޝަން ޓެސްޓްކުރުމުގައި ބައިވެރިވުމުގެ ފުރުސަތު ވަނީ ހުޅުވާލާފައެވެ. ނަމަވެސް މިއީ އަދި ތަރައްޤީކުރުމުގެ ކުރީކޮޅުގެ މަރުހަލާއެއް ކަމުން، ރަސްމީކޮށް ސޮފްޓްވެއާ ނެރޭއިރު ބައެއް ފީޗާތަކަށް ބަދަލު އައުން އެކަށީގެންވެއެވެ.
"ވަން ޔޫއައި" އަކީ އެންޑްރޮއިޑް އޮޕަރޭޓިންގް ސިސްޓަމްގެ މައްޗަށް ބިނާކޮށް، ސެމްސަންގްގެ ގެލެކްސީ ފޯނުތަކާއި ޓެބްލެޓްތަކަށް ޚާއްޞަކޮށްގެން އެ ކުންފުނިން ފަރުމާކޮށްފައިވާ ސޮފްޓްވެއާ އިންޓަފޭހެކެވެ. ކޮންމެ އަހަރަކުވެސް ގޫގުލްއިން ނެރޭ އާ އެންޑްރޮއިޑް ވާޝަނާ ގުޅުވައިގެން ސެމްސަންގުން ވަން ޔޫއައިގެ އާ އަޕްޑޭޓްތައް ތައާރަފްކުރަމުން އަންނައިރު، މިއީ ފޯނު ބޭނުންކުރާ ފަރާތްތަކަށް ލޭއައުޓްތައް ބަދަލުކުރުމާއި، ސެކިއުރިޓީ ވަރުގަދަކުރުމުގެ އިތުރުން ފޯނުގެ ހިނގުން ހަލުވިކުރުމަށް މުހިންމު ބަދަލުތަކެއް ގެނެސްދޭ އަޕްޑޭޓެކެވެ.
އާންމުގޮތެއްގައި ސޮފްޓްވެއާގެ ދާއިމީ ވާޝަން ރަސްމީކޮށް ނެރުމުގެ ކުރިން، ދިމާވާ ބަގްތައް ހައްލުކުރުމަށްޓަކައި "ސެމްސަންގް މެމްބާސް" އެޕްލިކޭޝަން މެދުވެރިކޮށް ބީޓާ ވާޝަން ޓެސްޓްކުރުމުގެ ފުރުސަތު އެ ކުންފުނިން އަބަދުވެސް ހުޅުވާލައެވެ.