މި އަހަރު ރާއްޖެއަށް ފަތުރުވެރިން އައި އަދަދު މިލިއަނަކާ ގާތްވެއްޖެއެވެ.
ޓޫރިޒަމް މިނިސްޓްރީން ހޮނިހިރު ދުވަހުގެ ނިޔަލަށް އާންމުކޮށްފައިވާ ތަފާސްހިސާބުގައިވާ ގޮތުން، ރާއްޖެއަށް މި އަހަރުތެރޭ ވަނީ 994,901 ފަތުރުވެރިން ޒިޔާރަތްކޮށްފައެވެ. އެއް މިލިއަން ހަމަކުރުމަށް މިހާރު ބޭނުންވަނީ 5,099 ފަތުރުވެރިން ކަމަށްވާއިރު، ރާއްޖެއަށް ދުވާލަކަށް އެވަރެޖުކޮށް 6,066 ފަތުރުވެރިން އަންނަ ކަމަށް ތަފާސްހިސާބުގައިވެއެވެ.
މިދިޔަ އަހަރެކޭ އެއްގޮތަށް، ރާއްޖެއަށް އެންމެ ގިނަ ފަތުރުވެރިން އަންނަމުންދަނީ ޗައިނާ، ރަޝިއާ އަދި އިނގިރޭސިވިލާތުންނެވެ. އެ ލިސްޓުގެ އެންމެ ކުރީގައި އުޅޭ ގައުމުތަކުގެ ނަންބަރުތަކަށް ބަލާއިރު:
- ޗައިނާ: 153,790 ފަތުރުވެރިން
- ރަޝިއާ: 136,495 ފަތުރުވެރިން
- އިނގިރޭސިވިލާތް: 82,850 ފަތުރުވެރިން
- އިޓަލީ: 70,888 ފަތުރުވެރިން
- ޖަރުމަނު: 64,075 ފަތުރުވެރިން
- އިންޑިއާ: 57,184 ފަތުރުވެރިން
ރާއްޖެ އައިސްފައިވާ ފަތުރުވެރިންގެ ތެރެއިން 694,411 މީހުން ޗުއްޓީ ހޭދަކޮށްފައިވަނީ ރިސޯޓުތަކުގައެވެ. އަދި 231,189 މީހުން ގެސްޓްހައުސްތަކަށް ދިޔައިރު، ހޮޓެލްތަކާއި ޓޫރިސްޓު އުޅަނދުތަކުގައި 40،000އަށް ވުރެ ގިނަ ފަތުރުވެރިން ޗުއްޓީ ހޭދަކޮށްފައިވެއެވެ.
މިދިޔަ އަހަރުގެ މި މުއްދަތުގައި ރާއްޖެއަށް ވަނީ އެއް މިލިއަނަށް ވުރެ ގިނަ ފަތުރުވެރިން ޒިޔާރަތްކޮށްފައެވެ. މި އަހަރުގެ މިހާތަނަށް ރާއްޖެ އައިސްފައިވާ ފަތުރުވެރިންގެ އަދަދަކީ މިދިޔަ އަހަރަށް ވުރެ 4.9 ޕަސެންޓް މަދު އަދަދެކެވެ.
ރާއްޖެ އައި ފަތުރުވެރިއެއް: ފަތުރުވެރިން އައި އަދަދު ވަނީ މިލިއަނަކާ ގާތްވެފައި -- ފޮޓޯ/ ވެލާނާ އެއާޕޯޓް
މި ދުވަސްވަރަކީ ފަތުރުވެރިން ރާއްޖެއަށް މަދުން އަންނަ ދުވަސްވަރެވެ. މީގެ އިތުރުން، މިދިޔަ ފެބްރުވަރީ މަހުގެ 28ގައި މެދުއިރުމަތީގައި ފެށި ހަނގުރާމައާ ގުޅިގެން ވެސް ރާއްޖެ އަންނަ ފަތުރުވެރިންގެ އަދަދު ވަނީ މަދުވެފައެވެ. އޭގެ ސަބަބުން ސިނާއަތަށް ގެއްލުންވެ، ގައުމަށް ޑޮލަރު ލިބޭ މިންވަރު ވެސް އަންނަނީ މަތިވަމުންނެވެ.
އެ ހަނގުރާމައިގެ ސަބަބުން، މިދިޔަ މާރިޗު މަހު ރާއްޖެ އައި ފަތުރުވެރިންގެ އަދަދު ވަނީ މިދިޔަ އަހަރުގެ އެ މަހާ އަޅައިބަލާއިރު 20.7 ޕަސެންޓް ދަށްވެފައެވެ. އޭޕްރިލް މަހު ވެސް ފަތުރުވެރިންގެ އަދަދު 24.4 ޕަސެންޓް ދަށްވިއިރު، މިދިޔަ މެއި މަހު 1.7 ޕަސެންޓްގެ ކުޑަ އިތުރުވުމެއް ފެނިފައިވެއެވެ.
އެހެންނަމަވެސް، މި މަހުގެ އެކަކުން މިދިޔަ ހޮނިހިރު ދުވަހުގެ ނިޔަލަށް ރާއްޖެއަށް ފަތުރުވެރިން އައިސްފައިވާ މިންވަރަކީ މިދިޔަ އަހަރުގެ މި މުއްދަތާ އަޅައިބަލާއިރު 20 ޕަސެންޓްގެ ދަށްވުމެކެވެ.
މަރުކަޒީ ބޭންކް، އެމްއެމްއޭއިން ދިވެހި ވިޔަފާރިތަކުގެ މައުލޫމާތު ހިމަނައިގެން ހަދައިފައިވާ ސާވޭއަކުން ދެއްކި ގޮތުގައި، ފަތުރުވެރިކަމުގެ ސިނާއަތުގައި ހަރަކާތްތެރިވާ ވިޔަފާރިތަކުން ވަނީ، މި ހިނގަމުންދާ ދެވަނަ ކުއާޓަރުގައި ވިޔަފާރިތަކުގެ ކުރިއެރުން މަޑުޖެހޭނެ ކަމަށް ލަފާކޮށްފައެވެ.