އެމްޑީޕީގެ ޗެއާޕާސަން އިންތިޚާބުގައި ކޮންމެ ނަތީޖާއެއް ނުކުތް ނަމަވެސް އެމްޑީޕީގައި ދެމިހުންނަވާނެ ކަމަށާއި އެ ޕާޓީގެ މަސައްކަތް އެއް ގިއަރު މައްޗަށް ޖައްސަންޖެހޭ ކަމަށް ކުރީގެ ރައީސް އިބްރާހިމް މުހައްމަދު ޞާލިޙް މިއަދު ވިދާޅުވެއްޖެއެވެ.
މި އިންތިޚާބުގެ ވޯޓުލުން ފެށީ މިއަދު 14:30 ގައެވެ. އިންތިޚާބުގެ ވޯޓުލުން މިރޭ 20:30 އާ ހަމައަށް ކުރިއަށްގެންދަން އެ ޕާޓީން ވަނީ ނިންމާފައެވެ.
ފޯރިގަދަ ކެމްޕޭނަކާ އެކު މި އިންތިޚާބުގެ ވާދަވެރިކަން ބޮޑެވެ. އެ ގޮތުން، ކުރީގެ ރައީސް ނަޝީދަށް ތާއީދުކުރައްވާ ބޭފުޅުން ރޭ ވަނީ ފޯރިގަދަ ޕެރޭޑަކާ އެކު ކެމްޕޭން ނިންމާލާފައެވެ. ދެން ވާދަކުރައްވާ ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެންބަރު މީކާއިލް އަހުމަދު ނަސީމް ވެސް ވަނީ ފޯރިގަދަ ކެމްޕޭނެއް ބުރާސްފަތި ދުވަހު ނިންމާލާފައެވެ. ޞާލިޙް ތާއީދުކުރައްވަނީ މީކާއީލަށެވެ.
ވޯޓުލެއްވުމަށް ފަހު ނުކުމެވަޑައިގެން ނޫސްވެރިން ކުރެއްވި ސުވާލުތަކަށް ޖަވާބުދެއްވަމުން ޞާލިޙް ވިދާޅުވީ، މި އިންތިޚާބުގައި އެ މަނިކުފާނު ވަރަށް ސާފުކޮށް މީކާއީލާ އެކު ހުންނެވި ނަމަވެސް ކޮންމެ ނަތީޖާއެއް ނުކުތަސް ޕާޓީ ދޫކުރައްވާ ވަޑައިނުގަންނަވާނެ ކަމަށެވެ.
ޞާލިޙް ވޯޓުލާން ވަޑައިގެން: އެ މަނިކުފާނު ވިދާޅުވީ ޕާޓީގައި ދެމިހުންނަވާނެ ކަމަށް --- ސަން ފޮޓޯ/ އަހުމަދު އިޔާދު
"އަޅުގަނޑު ހުންނާނީ އެމްޑީޕީގައި، ކޮންމެ ލީޑާޝިޕަކާ އެކީގައި ވެސް. މި ސަރުކާރު ޖަވާބުދާރީކުރުވަން ކުރަންޖެހޭ މަސައްކަތްތައް ކުރާނަން،" އެ މަނިކުފާނު ވިދާޅުވިއެވެ.
އެ މަނިކުފާނު ވިދާޅުވި ގޮތުގައި އެމްޑީޕީގެ މަސައްކަތްތައް އޮތީ އެއް ގިއަރު ކުރިއަށް ޖައްސަން ޖެހިފައެވެ.
އެ ގޮތުން، މި ސަރުކާރަށް މިވީ ދެ އަހަރާ ބައިގެ ތެރޭގައި ޑިމޮކްރަސީގައި ރާއްޖެ ފަހަތަށް ސޮއްސާލަމުން ދަނީ ވަރަށް ބާރު ސްޕީޑެއްގައި ކަމަށް ޞާލިޙް ވިދާޅުވިއެވެ. އެހެންވެ، އެ ސްޕީޑާ އެއްވަރުކުރަން އެމްޑީޕީން ގިއަރު މަތިކުރަންޖެހޭ ކަމަށް އެ މަނިކުފާނު ވިދާޅުވިއެވެ.
"އަޅުގަނޑުމެން މި ދާ ސްޕީޑަށްވުރެ މާ ބާރު ސްޕީޑެއްގައި ރައީސް މުއިއްޒުގެ ސަރުކާރު ފަހަތަށް އެބަ ޖައްސަވާ. އެހެންވީމާ އެ ލެވެލްގައި އަޅުގަނޑުމެންނަށް ނުހިފެހެއްޓެނީ. އެއަށްވުރެ މާ ބާރު ސްޕީޑްގައި އެ މަނިކުފާނު އެ ވަޑައިގަންނަވަނީ ޚުދުމުޚުތާރު ވެރިކަމަކާ ދިމާއަށް. އެހެންވީމާ، އަޅުގަނޑުމެން އެއް ގިއަރު މައްޗަށް ޖައްސަން އެބަޖެހޭ،" އެ މަނިކުފާނު ވިދާޅުވިއެވެ.
"އަޅުގަނޑު ހިތުން އިރާދަކުރެއްވިއްޔާ ކުރިއަށް އޮތް ތަނުގައި އެކަން ފެނިގެންދާނެ،"
ޞާލިޙް ވިދާޅުވީ، މި އިންތިޚާބުން މީކާއީލް މޮޅުވެއްޖެ ނަމަ ޕާޓީގެ ލީޑާޝިޕާ ހަވާލުވާނީ ޒުވާން، އާ ޓީމަކުން ކަމަށެވެ. އެއީ ވެސް ޕާޓީއަށް ލިބޭނެ ކުރިއެރުމެއް ކަމަށާއި ހަމަ އެގޮތަށް ނަޝީދު ކާމިޔާބުކުރައްވައިފިނަމަ އެ މަނިކުފާނު އެ މަގާމަށް ވަޑައިގަންނަވާނީ ވެރިކަމާއި އެ ނޫން ވެސް ގިނަ ތަޖުރިބާއާ އެކުކަން ފާހަގަކުރެއްވިއެވެ.
އެ މަނިކުފާނު ވިދާޅުވީ، ޚިޔާލު ތަފާތުވުންތަކަށް ވުރެ ސަރުކާރު ޖަވާބުދާރީކުރުވުން މުހިންމު ކަމަށެވެ.
މީގެ ކުރިން 2023 ވަނަ އަހަަރުގެ ރިޔާސީ ޕްރައިމަރީން ނާކާމިޔާބުވެވަޑައިގަތުމަށް ފަހު، ނަޝީދު އެމްޑީޕީ ދޫކުރެއްވި ދޫކުރެއްވުން ތަކުރާރުވެދާނެތޯ ނޫސްވެރިއަކު ސުވާލުކުރުމުން ޞާލިހް ވަނީ އެ މިސްޓޭކް ދެން ތަކުރާރުވެދާނެ ކަމަށް ގަބޫލު ނުކުރައްވާ ކަމަށް ވިދާޅުވެފައެވެ.
"އަޅުގަނޑު ހިތުން އެ މިސްޓޭކް ދެން އަޅުގަނޑުމެންގެ ތެރޭގައި ހަދައިގެން ނުވާނެ،" އެ މަނިކުފާނު ވިދާޅުވިއެވެ.
ނަޝީދު ވެސް ތަކުރާރުކޮށް ވިދާޅުވާ ފަދައިން މި ސަރުކާރު ބަދަލުކުރަން ޖެހޭ ކަމަށް ޞާލިޙް ވެސް މިއަދު ވިދާޅުވިއެވެ. ދެ ބޭފުޅުން ވެސް ގެންދަވަނީ މި ސަރުކާރު ބަދަލުކުރަން ޖެހޭ ކަމަށް ތަކުރާރުކުރައްވަމުންނެވެ.
ޞާލިޙަށް ތާއީދުކުރާ ފަރާތްތަކުން ތުހުމަތުކުރާ ގޮތުގައި، ރިޔާސީ އިންތިޚާބުގައި އެމްޑީޕީއަށް ނާކާމިޔާބީއާ ކުރިމަތިލާން ޖެހުނީ ނަޝީދު އެމްޑީޕީ ދޫކުރައްވާ ޑިމޮކްރެޓްސް އުފައްދަވައިގެން އެމްޑީޕީއާ ދެކޮޅަށް ނުކުންނެވުމުންނެވެ.
ނަމަވެސް، ނަޝީދަށް ތާއީދުކުރާ ފަރާތްތަކުން ބުނާ ގޮތުގައި ޞާލިޙުގެ ވެރިކަމުގައި ޕާޓީގެ އަސްލު ފިކުރާ ދުރަށް ގޮސް، ނަޝީދު ވަނީ އެކަހެރިކޮށްފައެވެ. އެހެންވެ، ޗެއާޕާސަންގެ މަޤާމަށް ނުކުމެވަޑައިގެން ތިއްބެވި ކެންޑިޑޭޓުންގެ މެދުގައި އޮތް ވާދަވެރިކަމަކީ، ޕާޓީގެ ކޮންޓްރޯލް ކުރިއަށް އޮތް ތަނުގައި އޮންނާނީ ކޮން ފެކްޝަނެއްގެ އަތުގައިކަން ކަނޑައަޅައިދޭނެ މުހިންމު ނިންމުމެކެވެ.