ފިލިޕީންސްގެ ދެކުނަށް އައި ބާރުގަދަ ބިންހެލުމެއްގައި 37 މީހުން މަރުވެ، 400 އަށް ވުރެ ގިނަ މީހުންނަށް އަނިޔާވެއްޖެއެވެ.
އިއްޔެ 7.8 މެގްނިޓިއުޑްގެ މި ބިންހެލުން އައިސްފައިވަނީ މިންޑަނާއޯ ޖަޒީރާގެ ސަރަންގާނީ ޕްރޮވިންސްގެ އައްސޭރިފަށަށެވެ. މި ހާދިސާގައި އެންމެ ބޮޑު ގެއްލުމެއް ލިބިފައިވަނީ 720،000 މީހުންގެ އާބާދީއެއް އޮންނަ ޖެނެރަލް ސަންޓޯސް ސިޓީއަށެވެ. އެ ސިޓީގެ ގިނަ އިމާރާތްތަކެއް ވެއްޓިފައިވާއިރު، މިހާރު ވަނީ ކުއްލި ނުރައްކަލުގެ ހާލަތު އިއުލާނުކޮށްފައެވެ.
ވެއްޓިފައިވާ އިމާރާތްތަކުގެ ދަށުގައި ތާށިވެފައިވާ މީހުން ސަލާމަތްކުރުމުގެ މަސައްކަތް ކަމާބެހޭ ފަރާތްތަކުން ދަނީ ކުރަމުންނެވެ. ޖެނެރަލް ސަންޓޯސްގައި ވެއްޓިފައިވާ ވިޔަފާރި އިމާރާތެއްގެ ދަށުގައި ތާށިވެފައިވާ މީހުން ހޯދުމުގެ މަސައްކަތް ކުރިއަށްދާއިރު، އެތަނުގައި ތާށިވެފައިވާ މީހެއްގެ މަންމައެއް ކަމަށްވާ ޑިއޮސްލިންޑާ ޑެލޫވިއޯ ބުނި ގޮތުގައި، އޭނާގެ ދަރިފުޅު އެތަނުގައި ތާށިވެފައި އޮތުމަކީ ގަބޫލުކުރަން ދަތި ކަމެކެވެ. އަދި އޭނާ އެދެނީ ހިތްހަމަޖެހުމެއް ހޯދުމަށްޓަކައި މިއަދުގެ ވަގުތެއްގައި ދަރިފުޅު ސަލާމަތްކުރުމަށެވެ.
މި ބިންހެލުމާ ގުޅިގެން 20،000 އަށް ވުރެ ގިނަ މީހުންގެ ގެދޮރު ގެއްލިފައިވާ ކަމަށް ރިޕޯޓުތައް ބުނެއެވެ. އަދި 2،000 އަށް ވުރެ ގިނަ ގެއަށާއި ސަރުކާރުގެ 117 އިމާރާތަކަށް ގެއްލުންވެފައިވެއެވެ.
މީގެ އިތުރުން، ޖެނެރަލް ސަންޓޯސްގެ ބައިނަލްއަގުވާމީ އެއާޕޯޓު ބަންދުކޮށް، އެތެރޭގެ 63 އުދުހުން ވަނީ ކެންސަލްކޮށްފައެވެ.
އަލްޖަޒީރާއިން ރިޕޯޓުކޮށްފައިވާ ގޮތުގައި، މީހުން ސަލާމަތްކުރުމުގެ މަސައްކަތަށް އޮތް އެންމެ ބޮޑު ގޮންޖެހުމަކީ ބިންހެލުމަށްފަހު އަންނަމުންދާ ލޮޅުންތަކާއި، ފަރުބަދަމަތީ ސަރަހައްދުތަކަށް ދަތުރުކުރުމަށް ހުރި ހުރަސްތަކެވެ.
ފިލިޕީންސްގެ ރައީސް ފާޑިނަންޑް މާކޯސް ޖޫނިއާ ވިދާޅުވި ގޮތުގައި، ކުއްލި ހާލަތުގައި ހަރަކާތްތެރިވާ އިދާރާތަކުން މިހާރު ދަނީ މިންޑަނާއޯގެ ރައްޔިތުންނަށް އެހީތެރިކަން ފޯރުކޮށްދެމުންނެވެ.