އައްޑޫ ސިޓީގެ ހިތަދޫ އުތުރު ދާއިރާގެ ބައި-އިލެކްޝަންގެ ވޯޓުލެވޭ ގަޑި 5އަށް އިތުރުކޮށްފިއެވެ.
ހިތަދޫ އުތުރު ދާއިރާގެ ބައި އިލެކްޝަންގެ ވޯޓުލުން ފަށައިފައި ވަނީ 8:00ގައެވެ. އެ އިންތިޚާބުގައި ވޯޓުލުން ކުރިއަށްގެންދަން އޮތީ 16:00އާ ހަމައަށެވެ.
އިލެކްޝަންސް ކޮމިޝަން (އީސީ)ން މައުލޫމާތު ދިން ގޮތުގައި، ވޯޓު ލެވޭ ގަޑި މިހާރު ވަނީ 17:00އަށް އިތުރުކޮށްފައެވެ.
މި ބައި އިލެކްޝަންގައި ވޯޓުލުމުގެ ހައްގު ލިބިފައިވާ މީހުންގެ އަދަދު 4،121އަށް އަރައެވެ. އަދި މި އިންތިޚާބުގައި ވޯޓުލުމަށް ޖުމުލަ ހަތް ވޯޓު ފޮއްޓެއް ބަހައްޓައިފައިވާއިރު އޭގެ ތެރޭގައި ހިމެނެނީ މާލޭގެ ދަރުމަވަންތަ ސްކޫލުގައި ބަހައްޓާފައިވާ ދެ ފޮއްޓާއި އައްޑޫގެ ހިތަދޫ ސްކޫލުގައި ބަހައްޓާފައިވާ ފަސް ފޮއްޓެވެ.
އީސީން އެންމެ ފަހުން އާންމުކޮށްފައިވާ ތަފާސްހިސާބަށް ބަލާއިރު، 15:00އާ ހަމައަށް ވޯޓުލައިފައި ވަނީ 2055 މީހުން ނުވަތަ 49.87 ޕަސެންޓް މީހުންނެވެ. އޭގެ ތެރޭގައި ހިމެނެނީ 1,079 އަންހެނުންނާއި 976 ފިރިހެނުންނެވެ. އަދި ވޯޓުނުލާ މީހުންގެ އަދަދު 2،066އަށް އަރައެވެ.
މި އިންތިޚާބުގައި ވާދަކުރައްވަނީ ދެ ކެންޑިޑޭޓުންނެވެ. އެއީ ވެރިކަން ކުރާ ޕީއެންސީން، ހިތަދޫ މޫލެކެޑެ ދާއިރާގެ ކުރީގެ ކައުންސިލަރު އަޙްމަދު ސަޢީދު (ސޮޑާ)އާއި، އިދިކޮޅު އެމްޑީޕީގެ ޓިކެޓުގައި ވާދަކުރައްވާ އައްޑޫގެ ކުރީގެ މޭޔަރު ޢަބްދުالله ޞާދިޤް (ސޯބެ)އެވެ.
މި ބައި އިލެކްޝަން ބާއްވަނީ، އެ ދާއިރާގެ މެންބަރު ކަމުގައި އެންމެ ފަހުން ހުންނެވި މުހައްމަދު ސިނާނުގެ ގޮނޑި ގެއްލުމާ ގުޅިގެންނެވެ. އެއީ، އޭނާގެ މައްޗަށް ސާބިތު ދަރަންޏެއް އޮތް ކަމަށް ބުނެ، އޭނާގެ ގޮނޑި ގެއްލިފައިވާ ކަމަށް ސުޕްރީމް ކޯޓުން މިދިޔަ އޭޕްރިލް މަހު ހުކުމް ކުރުމާ ގުޅިގެންނެވެ.
މި ބައި އިލެކްޝަނަށް ޕީއެންސީން ބޭއްވި ޕްރައިމަރީގައި އަޙްމަދު ސަޢީދާ ވާދަކުރައްވައި، ޓިކެޓް ހޯއްދެވީ ސިނާނެވެ. ނަމަވެސް ފަހުން އޭނާ ވަނީ ދާއިރާގެ ރައްޔިތުންނާ ބައްދަލުކުރެއްވުމަށްފަހު، ބައި-އިލެކްޝަނަށް އެންމެ ރަނގަޅު ގޮތަކީ އޭނާ ފަހަތަށް ޖެހިވަޑައިގަތުން ކަމަށް ވިދާޅުވެ ޓިކެޓު ދޫކޮށްލައްވައިފައެވެ.
ރައްޔިތުންގެ މަޖިލީހުގައި މިހާރު ޕީއެންސީގެ 74 މެންބަރުން ތިއްބަވާއިރު، އެމްޑީޕީއަށް ނިސްބަތްވެވަޑައިގަންނަވަނީ 12 މެންބަރުންނެވެ.