މާލެ ސަރަހައްދުގެ އާބާދީއަށް ބޭނުންވާ ވަރަށް ކަރަންޓު ފޯރުކޮށްދިނުމަށް ބޮޑު މަޝްރޫއެއް ފެށުމުގެ މަސައްކަތް ކުރަމުން އަންނަ ކަމަށް މާލެއަށް ކަރަންޓުގެ ޚިދުމަތް ފޯރުކޮށްދޭ ސްޓެލްކޯގެ މެނޭޖިން ޑިރެކްޓަރު ޑރ. އަލީ އަޒުވަރު ވިދާޅުވެއްޖެއެވެ.
ދައުލަތުގެ މީޑިއާ، ޕީއެސްއެމްއާ ވާހަކަދައްކަވަމުން އަޒުވަރު ވިދާޅުވީ، މާލެ ސަރަހައްދަކީ ކަރަންޓުގެ ޑިމާންޑު އާދަޔާ ޚިލާފަށް ބޮޑުވަމުންދާ ތަނެއް ކަމަށެވެ. އެގޮތުން އިމާރާތްތައް އުސްވެ، އާބާދީ ތޮއްޖެހެމުންދާއިރު، ކޮންމެ އަހަރަކު ވެސް ކަރަންޓު ބޭނުންކުރާ ނިސްބަތް އިތުރުވާ ކަމަށް އޭނާ ވިދާޅުވިއެވެ.
ޕީއެސްއެމްގައިވާ ގޮތުން، ޑރ. އަޒުވަރު ވަނީ، މާލޭ ސަރަހައްދުގެ އިތުރުވަމުންދާ ޑިމާންޑާ އެއްވަރަށް ކަރަންޓު ފޯރުކޮށްދިނުމަށް ބޮޑު މަޝްރޫއެއް ގެންނަން ޖެހޭ ކަމަށް ވިދާޅުވެފައެވެ. އަދި އެކަމާ ގުޅޭ މަސައްކަތްތައް މިހާރު ކުރަމުން އަންނަ ކަމަށް އޭނާ ވިދާޅުވި ކަމަށް އެ ނޫހުގައިވެއެވެ.
ފާހަގަކޮށްލެވޭ ގޮތުގައި މާލެއާއި ހުޅުމާލޭން ކަރަންޓު ކެނޑުމުގެ މައްސަލަތައް ވަނީ ބޮޑުވެފައެވެ. އެގޮތުން ހުރިހާ ސަރަހައްދުން ކަރަންޓު ކެނޑި 'ބްލެކްއައުޓް'އަކަށް ދިޔުމާއި، ހުޅުމާލެ ދެވަނަ ފިޔަވަހީގައި ގިނަ ބަޔަކު ދިރިއުޅޭ ޓަވަރުތަކުން ކަރަންޓު ކެނޑި ގިނައިރު ވުމުގެ މައްސަލަތައް ހިމެނެއެވެ.
މިދިޔަ ހޮނިހިރު ދުވަހު ވެސް، ހުޅުމާލެއާއި މާލޭން ކަރަންޓު ކެނޑި، ހުރިހާ ސަރަހައްދަކަށް އަލުން ކަރަންޓު ދެވުނީ ތިން ގަޑިއިރާއި 30 މިނެޓު ފަހުންނެވެ. އެ މައްސަލަ ދިމާވީ، ހުޅުމާލޭގެ އިންޖީނު ގޭގެ އަޕްގްރޭޑިން މަސައްކަތްކޮށް ނިންމިތާ އެއް ދުވަސް ނުވަނީސް ކަމުން ސްޓެލްކޯއަށް ފާޑުކިޔުން ވެސް އަމާޒުވިއެވެ.