ބަންގްލަދޭޝްގައި ހަލުވިކަމާ އެކު ފެތުރެމުންދާ ހިމަބިހި ބަލިޖެހިގެން މާރިޗު މަހުގެ 15 އިން ފެށިގެން މިހާތަނަށް 500 އަށްވުރެ ގިނަ ކުދިން މަރުވެފައިވާ ކަމަށް ކަމާބެހޭ ފަރާތްތަކުން ބުނެފިއެވެ.
ހިމަބިހި ޖެހިގެން މަރުވާ މީހުންގެ އަދަދު އިތުރުވަމުން އަންނައިރު، އިއްޔެ އެކަނި ވެސް 13 ކުއްޖަކު މަރުވެ، ޖުމުލަ 512 އަށް އިތުރުވެފައިވާ ކަމަށް ބަންގްލަދޭޝްގެ ހެލްތު ޑިޕާޓްމަންޓުން ވަނީ ހާމަކޮށްފައެވެ. ވެރިރަށް ޑާކާގެ ހޮސްޕިޓަލްތަކުގައި ބަލި ޖެހިފައިވާ މީހުންނަށް ޚާއްސަ ވޯޑްތަކެއް ބަހައްޓާފައި ހުރި ނަމަވެސް އެކަށީގެންވާ އަދަދަކަށް އެނދު އަދިވެސް ނެތް ކަމަށް އެ ޑިޕާޓްމަންޓުން ބުނެއެވެ.
ޖުމުލަ 175 މިލިއަނަށް ވުރެ ގިނަ މީހުން ދިރިއުޅޭ ބަންގްލަދޭޝްގައި ހިމަބިހި ކޮންޓްރޯލުކުރަން ވެކްސިން ދިނުގެ ޕްރޮގްރާމެއް ފަށާފައިވާއިރު، މިހާތަނަށް 18 މިލިއަން ކުދިންނަށް ވެކްސިން ދީފައިވާ ކަމަށް އދ. ގެ ކުޑަކުދިންނާ ބެހޭ އޭޖެންސީ، ޔުނިސެފުން އެ ގައުމަށް ކަނޑައަޅާފައި ހުންނަ ވެރިޔާ ރަނާ ފްލާވާސް ވަނީ ވިދާޅުވެފައެވެ.
ނަމަވެސް، ވެކްސިންގެ ފުރިހަމަ އަސަރުކުރަން މަސްތަކެއް ނަގާނެ ކަމަށް ހެލްތު ޑިޕާޓްމަންޓުން ބުނެއެވެ.
ދުނިޔޭގެ ސިއްހަތު ޖަމިއްޔާ (ޑަބްލިޔުއެޗްއޯ)އިން ބުނާ ގޮތުގައި ހިމަބިއްސަކީ ދުނިޔޭގައި އެންމެ ހަލުވިކަމާ އެކު ފެތުރޭ އެއް ބައްޔެވެ. ބަންގްލަދޭޝްގައި 2024 ވަނަ އަހަރުގެ ޖޫން މަހު ހިންގަން އޮތް ވެކްސިން ކެމްޕޭނެއް ވަނީ، އޭރު އޮތް ޝައިޚް ޙަސީނާގެ ސަރުކާރު ވެއްޓުމާ ގުޅިގެން ހިނގި ހަމަނުޖެހުންތަކާ ހެދި ލަސްވެފައެވެ. މީގެ ނަތީޖާއެއްގެ ގޮތުން، މިދިޔަ އަހަރުގެ ނިޔަލަށް ހިމަބިހި ނައްތާލުމަށް ކަނޑައަޅާފައިވާ އަމާޒަށް ވާސިލުނުވެވުނު ކަމަށް ކަމާބެހޭ ފަރާތްތަކުން ވަނީ އެއްބަސްވެފައެވެ.
ހުމުގެ އިތުރުން ބިހި ނަގައި، ކެއްސުމާއި އެހެނިހެން އަލާމާތްތައް ފެންނަ ހިމަބިހި ޖައްސާ ވައިރަހަކީ ނިއުމޯނިއާ، ސިކުނޑި ދުޅަވުން ފަދަ ފުރާނައަށް ނުރައްކާވާ ފަދަ ބަލިތައް ޖައްސާ ވައިރަހެކެވެ. ހިމަބިއްސަކީ ގައިން ގަޔަށް އަރާ ބައްޔަކަށްވާއިރު، މި ވައިރަސް އެންމެ ބޮޑަށް ޖެހެނީ ފަސް އަހަރުން ދަށުގެ ކުދިންނަށެވެ. ބަލިން ދިފާއުވުމަށް ދެ ޑޯޒް ވެކްސިން ދޭންޖެހެއެވެ.
ރާއްޖޭގައި ވެސް އަންނަނީ ހިމަބިހީގެ ކޭސްތައް ފެންނަ މިންވަރު އިތުރުވަމުންނެވެ. އެހެންވެ، ބަލީގެ އަލާމާތްތައް ފެންނަ މީހުންނަށް އެހީވާން އައިޖީއެމްއެޗްގައި ޚާއްސަ 'ހެލްޕް ޑެސްކް'އެއް ވެސް ވަނީ ގާއިމުކޮށްފައެވެ.
ހިމަބިއްސަކީ ކުރިން ރާއްޖޭން ނައްތާލާފައިވާ ބައްޔެކެވެ. ނަމަވެސް، މި އަހަރުގެ މިހާތަނަށް ޖުމުލަ ހަތް ކޭހެއް ރާއްޖޭން ވަނީ ފެނިފައެވެ. އެ ކޭސްތަކުގެ 74 އަށް ވުރެ ގިނަ ކޮންޓެކްޓުން ވަނީ ފާހަގަވެފައެވެ.