ވ. އަލިމަތާ ކައިރީ އޮތް ކަނޑުއަޑީގެ ހޮހަޅައަކަށް ފީނަން ގޮސް އުޅެނިކޮށް އިޓަލީގެ ފަސް ފަތުރުވެރިން މަރުވި ހިތާމަވެރި ހާދިސާއާ ގުޅިގެން، މީގެ 40 އަހަރު ކުރިން ހަމަ އެ ސަރަހައްދަށް ފީނަން ގޮސް އުޅެނިކޮށް މަރުވި އަންހެނެއްގެ ވާހަކައަށް ބޮޑު ސަމާލުކަމެއް ލިބިއްޖެއެވެ.
އިޓަލީގެ ނޫހެއް ކަމަށްވާ "އިލް ގަޒެޓީނޯ"އަށް މައުލޫމާތު ދެމުން ޖޯޖިއޯ ބެޓިން ނަމަކަށް ކިޔާ މި މީހާ ބުނި ގޮތުގައި، އޭނާގެ އަންހެނުން މަރުވި ދުވަހު ފީނަން ހަމަޖެހިފައި އޮތީ އެންމެ 65 ފޫޓު ނުވަތަ ގާތްގަނޑަކަށް 20 މީޓަރު އަޑިއަށެވެ. ނަމަވެސް، އެ ދުވަހު ކަންތައް ދިމާވި ގޮތުން އޭނާގެ ފުރާނަ ގެއްލުނީ ކަމަށް ބެޓިން ކިޔައިދިނެވެ.
ބެޓިންގެ މި ވާހަކަތައް އެމެރިކާގެ "ނިއުޔޯކް ޕޯސްޓް"އާއި އިނގިރޭސިވިލާތުގެ "ދަ ސަން"ގައި ވެސް ރިޕޯޓުކޮށްފައެވެ. މި ނޫސްތަކުގައި ރިޕޯޓުކޮށްފައިވާ ގޮތުން، ދާދި ފަހުން ހިނގި ހާދިސާގެ ސަބަބުން ބެޓިންއަށް ވަނީ ނަފުސާނީ ގޮތުން ބޮޑެތި އަސަރުތަކެއް ކޮށްފައެވެ.
ބެޓިން ބުނި ގޮތުގައި މި މަހުގެ 14 ވަނަ ދުވަހު އިޓަލީގެ ފަސް ފަތުރުވެރިން ހަމަ އެ ސަރަހައްދަށް ފީނަން ގޮސް އުޅެނިކޮށް މަރުވި ޚަބަރު އެހުމާ އެކު، އޭނާއަށް ލިބުނީ ވަރަށް ބޮޑު ސިހުމެކެވެ. އަދި، މީގެ 40 އަހަރު ކުރިން އޭނާގެ އަންހެނުން މަރުވި ހާދިސާގެ ހަނދާންތައް އާވެ، އެ ހިތާމަ އަލުން ތަޖުރިބާކުރަން ޖެހުނު ކަމަށް އޭނާ ބުންޏެވެ.
"އެއީ އަހަރެންގެ ހަޔާތުގައި އައި އެންމެ ކަޅު އެއް ދުވަސް. އޭނާ ފީނަން ދިޔައީ އެންމެ 65 ފޫޓު އަޑިއަށް ދާން. އެކަމަކު އެނބުރި ނާދޭ،" ބެޓިންއާ ހަވާލާދީ އިޓަލީގެ ނޫހުގައި ރިޕޯޓުކޮށްފައިވެއެވެ.
އޭނާ ބުނި ގޮތުގައި، އެ ހާދިސާއަށް ފަހު އެތައް އަހަރެއް ފާއިތުވެގެން ދިޔަ ނަމަވެސް، އެ ހިތާމައިން އޭނާއަށް އަދިވެސް މުޅިން އަރައިގަނެވިފައެއް ނުވެއެވެ.
އިޓަލީގެ ނޫހަށް ދިން އިންޓަވިއުގައި ބެޓިން ވަނީ އޭނާގެ އަންހެނުންގެ މަރުގެ ހާދިސާ ހިނގި ދުވަހުގެ ބައެއް ތަފުސީލުތައް ވެސް ހިއްސާކޮށްފައެވެ. އޭނާ ބުނި ގޮތުގައި އެ ދުވަހު މޫސުން އޮތީ ވަރަށް ރީތިކޮށެވެ. އަދި، ޑައިވްކުރަން ދިޔައީ ވެސް ވަރަށް އުފާވެރި މާހައުލެއްގައެވެ. ނަމަވެސް، ކަނޑުއަޑީގައި ދިމާވި ކުއްލި ހާލަތެއްގެ ސަބަބުން ހުރިހާ ކަމެއް ބަދަލުވީ ކަމަށް އޭނާ ބުންޏެވެ.
"އަހަރެމެންނަށް ނޭނގޭ ކަނޑުއަޑީގައި ދިމާވާނެ ކަންތައްތަކެއް. އެއީ ވަރަށް ރީތި، އެކަމަކު ހަމަ އެހާމެ ނުރައްކާތެރި ތަނެއް،" ޖަނަވަރީ 11، 1983 ވަނަ އަހަރު ހިނގި އެ ހާދިސާއާ ގުޅިގެން ބެޓިން ބުންޏެވެ.
މީގެ 40 އަހަރު ކުރިން މަރުވި އަންހެން މީހާގެ ފިރިމީހާ: އެ މީހުން ވެސް މަރުވީ އެއް ސަރަހައްދެއްގައި --
އަންހެނުން އެނާ މާރިއާ ޕިސްޓެލާޓޯއާ އެކު ބެޓިން ވެސް ރާއްޖެއައީ ކައިވެންޏަށް ފަހު ހަނީމޫނަށެވެ. އޭނާގެ އަންހެނުންނަކީ ކަނޑުއަޑީގެ ފޮޓޯ ނަގާ، ފޮޓޯގްރަފަރެއް ކަމަށް ނޫސްތަކުގައި ރިޕޯޓްކޮށްފައިވެއެވެ.
"އަހަރެން އެހާ ޑައިވްކުރަން ފޯރިއެއް ނުހުރޭ. އެންމެ ބޮޑަށް ވެސް ދެތިން މީޓަރަށް ޑައިވްކުރިޔަސް ކުރަނީ. އެކަމަކު، އެ ދުވަހުގެ ފަހުން ދުވަހަކު ވެސް ޑައިވްކުރާކަށް ނުދަން،" އަލަތު އަނބިމީހާ މަރުވި ހިތާމަވެރި ހާދިސާގެ ހަނދާންތައް އާކުރަމުން އޭނާ ބުނެފައިވެއެވެ.
މާރިއާ ގެއްލިގެން ހޯދަމުން ދަނިކޮށް އޭނާގެ ހަށިގަނޑު ފެނުނީ އޭގެ 20 ދުވަސް ފަހުންނެވެ. ބެޓިން ބުނި ގޮތުގައި ހަށިގަނޑު ފެނުނުއިރު ކާކުކަން ވެސް ނޭނގެއެވެ. މި ހާދިސާއާ ގުޅިގެން އެ ދަތުރުގައި ބައިވެރިވި މީހެއްގެ ފަރާތުން ބަދަލު ދިނުމަށް ކޯޓުން އެންގި ނަމަވެސް، އެ ފައިސާއަކީ އޭނާ އެއްވެސް ވަރަކަށް ބޭނުންވި އެއްޗެއް ނޫން ކަމަށް ބެޓިން ބުންޏެވެ.
"ފަސް ޑައިވަރުންގެ ޚަބަރު، ޚާއްސަކޮށް [އިޓަލީގެ ސިޓީއެއް ކަމަށްވާ] ޕަޑުއާއަށް ނިސްބަތްވާ ޖިއަންލޫކާގެ ޚަބަރާ އެކު، އަހަރެންނަށް އެނބުރި އެ ދުވަސްތަކަށް ދެވުނު،" އިޓަލީގެ ނޫހަށް ދިން އިންޓަވިއުގައި ބެޓިން ބުންޏެވެ.
އެ ހިތާމަވެރި ދުވަހުގެ ހަނދާންތައް އާކުރަމުން ބެޓިން ބުނީ، އެ ދުވަހު އޭނާގެ މުޅި ދިރިއުޅުން ބަދަލުކޮށްލި ކަމަށެވެ. އޭނާގެ އަންހެނުން މަރުވީ އެ ހޮހޮޅައިގެ ތެރޭގައި ނޫން ނަމަވެސް، އެ ސަރަހައްދުގައިކަމުން މި ހާދިސާއިން އޭނާއަށް ފުން އަސަރެއް ކުރުވިއެވެ. އަދި، 40 އަހަރު ކުރީގެ އެ ހަނދާންތައް އާވިއެވެ.
ހަމަ އެ ސަރަހައްދުގައި މި މަހު މަރުވި އިޓަލީގެ ފަސް ފަތުރުވެރިންގެ ހަށިގަނޑު ވެސް މިހާރު ވަނީ ކަނޑުއަޑިން ނަގާފައެވެ. އެ މީހުން ތިބީ އަލިމަތާ ކައިރި އޮންނަ މިޔަރުކަނޑު ކޭވް ކިޔާ ކަނޑުއަޑީގެ ހޮހޮޅައެއްގައެވެ. އެ މީހުންގެ ހަށިތައް ނަގަން އައި ފިންލޭންޑްގެ ތަޖުރިބާކާރު ޑައިވަރުންގެ ޓީމުން ލަފާކުރާ ގޮތުގައި އެ މީހުން މަރުވީ ހޮހޮޅައިގެ ތެރޭގައި މަގުއޮޅިގެންނެވެ. އެންމެންގެ ހަށިގަނޑު ވެސް ފެނުނީ ހޮހޮޅައިގެ އެއް ސަރަހައްދަކުން ކަމަށް އެ މީހުން ބުނެފައިވެއެވެ.
ފަސް ފަތުރުވެރިންގެ ހަށިގަނޑާއި އެ މީހުންގެ އިލެކްޓްރޯނިކް ސާމާނުތައް ވެސް މިހާރު ވަނީ އިޓަލީއަށް ގެންގޮސްފައެވެ. އެ ގައުމުން އަންނަނީ އެ މީހުން މަރުވި ހާދިސާއާ ގުޅިގެން ޖިނާއީ ތަހުގީގެއް ހިންގަމުންނެވެ.
އެ ފަތުރުވެރިންގެ ހަށިގަނޑު ނަގަން އުޅުމުގެ ތެރޭގައި ދިވެހި ސިފައިންގެ އެންމެ ތަޖުރިބާކާރު އެއް ޑައިވަރު، ސާޖަންޓް ފަސްޓް ކްލާސް މުހައްމަދު މަހުދީ ވެސް ވަނީ މަރުވެފައެވެ. އެހެންވެ، މިއީ ރާއްޖޭގެ ތާރީޚުގައި ވެސް ހިނގި މި ފަދަ ޑައިވިންގެ އެންމެ ހިތާމަވެރި އެއް ހާދިސާއެވެ.