ދެކުނު އިންޑިއާގެ ކުޅަދާނަ އެކްޓަރު މޯހަންލާލްގެ ކްރައިމް ތުރިލާ 'ދްރިޝްޔަމް 3'އަށް ފުރަތަމަ ދުވަހު ދުނިޔޭގެ ބާޒާރުން 40 ކްރޯޑަށް ވުރެ ގިނަ ރުޕީސް ލިބިއްޖެއެވެ.
މޯހަންލާލް ލީޑް ރޯލުން ކުޅެފައިވާ މަލަޔާޅަމް ކްރައިމް ތުރިލާ 'ދްރިޝްޔަމް 3' ސިނަމާތަކަށް އައި ފުރަތަމަ ދުވަހު މިހާ ބޮޑު އާމްދަނީއެއް ލިބިފައިވަނީ ދުނިޔޭގެ އެކި ކަންކޮޅުތަކުގައި ފިލްމު ދައްކައިގެންނެވެ. މި ފިލްމު ރިލީޒްކުރުމުގެ ކުރިން ވެސް އެޑްވާންސްކޮށް ޓިކެޓް ވިއްކައިގެން ފިލްމަށް 35 ކްރޯޑު ރުޕީސްގެ އާމްދަނީއެއް ވަނީ ހޯދިފައެވެ.
ފިލްމީ ތަފާސްހިސާބުތައް ބަލާ 'ސެކްނިލްކް'އިން ހާމަކޮށްފައިވާ ގޮތުގައި، އިންޑިއާއިން އެކަނި ވެސް ފުރަތަމަ ދުވަހު 18.37 ކްރޯޑް ރުޕީސް ލިބިފައިވާއިރު، ފުރަތަމަ ދުވަހު ސިނަމާތަކުގެ 51.3 އިންސައްތަ ގޮނޑި ވެސް ވަނީ ފުރިފައެވެ.
މަޅަޔާލަމް ފިލްމު "ދްރިޝްޔަމް 3"ގެ ޕޯސްޓަރެއް--ފޮޓޯ/އިންޑިއަންއެކްސްޕްރެސް
ބެލުންތެރިންގެ މެދުގައި ވަރަށް ބޮޑަށް މަގުބޫލު މި ފްރެންޗައިސްގެ ތިންވަނަ ފިލްމުގައި ދައްކުވައިދަނީ ކުރީގެ ހާދިސާތަކުގެ ސަބަބުން ކުރިމަތިވެފައިވާ ނަފްސާނީ ބުރައާއި، ފުލުހުންގެ ކިބައިން އާއިލާ ސަލާމަތްކުރުމަށް ޖޯޖްކުޓީ (މޯހަންލާލް) ކުރާ ވަރުގަދަ މަސައްކަތްތަކެވެ.
މި ފިލްމުގައި މޯހަންލާލްގެ އިތުރުން މީނާ، އަންސިބާ ހަސަން އަދި އެސްތާ އަނިލްގެ އިތުރުން ސިއްދީގު، އާޝާ ޝަރަތު އަދި މުރާލީ ގޯޕީ ވެސް މުހިންމު ރޯލުތައް ކުޅެފައިވެއެވެ.
މި ފިލްމަށް ލިބުނު ކާމިޔާބީއާ ގުޅިގެން މި ފްރެންޗައިސްގެ ދަށުން އުފެއްދި ބޮލީވުޑް ފިލްމުތަކަކީ ވެސް ބެލުންތެރިންގެ މެދުގައި ބޮޑު މަގުބޫލުކަމެއް ހޯދަމުން އަންނަ ފިލްމުތަކެކެވެ. މަޅަޔާލަމް ފިލްމަށް ފަހު ބެލުންތެރިން މިހާރު އެންމެ ބޮޑަށް އިންތިޒާރުކުރަނީ ވެސް އަޖޭ ދޭވްގަން، ތައްބޫ އަދި ޖައިދީޕް އަހްލަވާތު މުހިއްމު ރޯލް ކުޅޭ ހިންދީ ރިމޭކަށެވެ.
ދާދި ފަހުން ރިޕޯޓުތަކުން ބުނެފައިވާ ގޮތުގައި ހިންދީ ރިމޭކްގައި ގެނެސްދޭ ވާހަކައަކީ މުޅިން ތަފާތު ވާހަކައެކެވެ. އެހެންކަމުން "ދްރިޝްޔަމް 3"ގެ މުޅީން ތަފާތު ވާހަކައެއް އަނެއްކާ ވެސް ސްކްރީނުން ބަލާލުމަށް ބެލުންތެރިން ތިބީ ކެތްމަދުވެފައެވެ. ހިންދީ ފިލްމު ސިނަމާތަކަށް ގެންނަން ނިންމާފައިވަނީ މި އަހަރުގެ އޮކްޓޫބަރު މަހުގެ ދެވަނަ ދުވަހެވެ.