މިއަދު ސިނަމާތަކަށް ގެނެސްދިން ބޮލީވުޑްގެ އެކްޓަރު އަޖޭ ދޭވްގަންގެ ކެރިއަރުގެ އެންމެ މަޤުބޫލު ފްރެންޗައިސް "ދްރިޝްޔަމް"ގެ ތިން ވަނަ ފިލްމުގައި ހައިރާންކުރުވަނިވި ގިނަ ކަންތައްތަކެއް އެކުލެވިގެންވީ ނަމަވެސް، މުޅި ސިލްސިލާ ނިންމައިލި ގޮތުން ބެލުންތެރިން އުންމީދުކުރި ފަދަ ފުރިހަމަ ކްލައިމެކްސެއް ގެނެސްދެވިފައެއް ނުވާ ކަމަށް ބުނެ ގިނަ ބަޔަކު ސޯޝަލް މީޑިއާގައި ބޮޑު ބަހުސެއް ވަނީ ފަށައިފައެވެ.
ވޭތުވެދިޔަ ދެ ފިލްމުގައިވެސް އަޖޭ ކުޅެފައިވާ ކެރެކްޓަ 'ވިޖޭ ސާލްގާއޮންކަރު' ވަނީ ޤާނޫނު ތަންފީޒުކުރާ ފަރާތްތަކަށްވުރެ 10 ފިޔަވަޅު ކުރީގައި ހުރެ، ދޮގު ބަޔާންތަކާއި ސައްޙަ ނޫން ހެކިތަކުގެ އެހީގައި އަމިއްލަ ދިފާޢީ އައްޑަނައެއް ބިނާކޮށްފައެވެ.
އެހެންކަމުން، ދެވަނަ ބަޔަށްފަހު ހަތަރު އަހަރުގެ ދިގު އިންތިޒާރަކަށްފަހު "ދުރިޝްޔަމް: ދަ ކޮންކްލޫޝަން" ރިލީޒްވެ، މި މައްސަލައަށް ފުރިހަމަ ނިމުމެއް އަންނާނެކަމުގެ ޔަޤީންކަން ލިބުމުން، ބެލުންތެރިން އިންތިޒާރުކުރީ ހަމައެކަނި އާދައިގެ ތުރިލާއަކަށް ނޫނެވެ. ބެލުންތެރިން އެދުނީ ވިޖޭގެ މި ނުރައްކާތެރި ސިކުނޑީގެ ކުޅިވަރު ނިމިގެންދާއިރު، ޙައިރާންކަމާއެކު އަތްތިލަބަޑި ޖަހައިލެވޭ ފަދަ ވަރުގަދަ، ޖަޒުބާތީ ނިންމުމަކަށެވެ.
ފިލްމު "ދްރިޝްޔަމް 3"ގެ މުހިއްމު ރޯލްތަކުން ފެންނާނެ ތަރިން ދައްކުވައިދޭ ޕޯސްޓަރެއް--ފޮޓޯ/ޕިންކްވިލާމިއީ މޮޅު ފިލްމެއް ކަމަށާއި، ވިސްނުންތެރި، ފޫހިކަމެއް ނެތި ބަލައިލެވޭ، އަދި ޝައުޤުވެރިކަން ދަމަހައްޓައިދޭ ގިނަ ސަސްޕެންސްތަކެއް އެކުލެވޭ އުފެއްދުމަކަށްވީ ނަމަވެސް އެފަދަ ފުރިހަމަ އިޙްސާސެއް މި ފަހަރު ބެލުންތެރިންނަށް ލިބިފައި ނެތްކަމަށް މިހާތަނަށް ފިލްމު ބެލި ގިނަބަޔަކު ވަނީ ބުނެފައެވެ.
ބޮލީވުޑްގެ އެންމެ ކާމިޔާބު އެއް ތުރިލާ ސިލްސިލާގެ ފަހު ބައިގެ ގޮތުގައި އިޝްތިހާރުކުރެވުނު މި ފިލްމަށް، ކުރީގެ ބައިތަކުން ދެއްކި ފަދަ އުސްމިންތަކަކަށް ވާޞިލެއް ނުވެވުނުއިރު މިއީ ގޯސް ފިލްމެކޭ ނުބުނެވުނަސް، މިއީ ސަޕޯޓަރުން އުންމީދުކުރި ފަދަ ކުލަގަދަ ވަދާޢީ ނިންމުމެއް ނޫން ކަމަށްވެސް އެއްބަޔަކު އިއްތިފާގުވެއެވެ.
ފިލްމު ކުރިއަށްދިޔައީ ވަރަށް ސާބިތުކަމާއެކުގައި ކަމަށްވީނަމަވެސް މައްސަލައަކީ، ބައެއް މަންޒަރުތައް މާބޮޑަށް ދިގުދެމިގެން ގޮސް، ބޭކާރު ވާހަކަތަކުން ފުރިފައިވުމަށް ކަމަށް ބެލުންތެރިޔަކު ސޯޝަލްމީޑިއާގައި ބުނެފައިވެއެވެ. ސްކްރީންޕްލޭ ލިޔުނު ފަރާތްތަކުން އެމީހުންގެ އަމިއްލަ ވިސްނުންތެރިކަމާމެދު މާބޮޑަށް ބޮޑާވެގަނެގެން އުޅޭ ފަދަ އިޙްސާސެއް ބައެއް ޑައިލޮގްތަކުން ކުރެވޭ ކަމަށްވެސް އެއްބަޔަކު ބުނެފައިވެއެވެ.
ފާހަގަކޮށްލަންޖެހޭ އަނެއް ކަމަކީ، މި ފިލްމުގައި ހިނގާ ކަންކަން ފުރިހަމައަށް ދެނެގަތުމަށްޓަކައި ކުރީގެ ބައިތައް ބަލައިފައި ހުރުން މަޖުބޫރުވުމެވެ. މީގެ ސަބަބުން މުޅިން އަލަށް ފިލްމު ބަލާ ފަރާތްތަކަށް ވާހަކަ ދެނެގަންނަން އުނދަގޫވި ނަމަވެސް، މި ފްރެންޗައިޒްގެ ސަޕޯޓަރުންނަށް މިއީ ވަރަށް ފުރިހަމަ ގުޅުވައިލުމެކެވެ.
ވިޖޭ ސާލްގާއޮންކަރުގެ ވާހަކަ ނިމޭގޮތް ބެލުމަށް ހަތަރު އަހަރުގެ ދިގު އިންތިޒާރެއް ކުރުމަށްފަހު، ބެލުންތެރިން އެދުނީ ފޯރީގައި އަތްތިލަބަޑި ޖަހައި އުފާފާޅުކުރާނެ ފަދަ ނިންމުމަކަށެވެ. އޭގެ ބަދަލުގައި، ފިލްމު ނިމިގެންދާއިރު ކުރެވެނީ ހަމައެކަނި އާދައިގެ ގޮތަކަށް އަތްޖަހައިލުމުގެ އިޙްސާސެކެވެ.
ފިލްމު "ދްރިޝްޔަމް" ފްރެންޗައިސްއަކީ ހަމަ އެ ނަމުގައި 2013 ވަނަ އަހަރު ރިލީޒްކުރި މަޅަޔާލަމް ފިލްމު އަސްލަކަށް ބަލައިގެން ގެނެސްދެމުން އަންނަ އޭގެ ހިންދީ ވާޝަންގެ ފްރެންޗައިސްއެކެވެ.