ސޮނީ އެންޓަޓެއިންމަންޓްއިން ގެނެސްދޭ މަޤުބޫލު ގޭމް ޝޯ "ކޯން ބަނޭގާ ކްރޯޑުޕަތީ"، (ކޭބީސީ)ގެ އެޕިސޯޑެއް ކުރިއަށްދަނިކޮށް އެ ޝޯގެ ހޯސްޓް އަދި އިންޑިއާގެ މެގަ ސްޓާ އަމީތާބް ބައްޗަންއަށް އަނިޔާވެއްޖެއެވެ.
އުމުރުން 83 އަހަރުގެ ބޮލީވުޑްގެ ސުޕަސްޓާރު އަމީތާބް އެ ޝޯގެ ސެޓުގައި ހަރަކާތްތެރިވަނިކޮށް ވެއްޓި ކަކުލަށް އަނިޔާ ލިބުނުކަން ހާމަކޮށްފައިވަނީ، މިދިޔަ ބުދަ ދުވަހު ދެއްކި އެ ޝޯގެ އެޕިސޯޑުގައެވެ. އާންމުކޮށް 'ކޭބީސީ'ގެ ކޮންމެ އެޕިސޯޑެއްގެ ފެށުމުގައި ސްޓޭޖު މެދުގައި ކޮޅަށް ހުރެ މަރުޙަބާގެ ބަސްތައް އިއްވާ އަމީތާބް، މި ފަހަރުގެ އެޕިސޯޑުގައި ފެނިގެންދިޔައީ ގޮނޑިއެއްގައި އިށީނދެއިނދެ ޝޯ ކުރިއަށްގެންދިޔަ މަންޒަރެވެ.
މި ޙާދިސާއާ ބެހޭގޮތުން ވާހަކަ ދައްކަމުން އަމީތާބް ބުނީ، ކުރީ ދުވަހުގެ ޝޫޓިން ތެރޭގައި ކައްސައިގެން ވެއްޓި ކަކުލަށް އަނިޔާވުމުގެ ސަބަބުން ކޮޅަށް ހުރުމަށް އުނދަގޫތަކެއް ކުރިމަތިވެފައިވާ ކަމަށެވެ. އެހެންކަމުން، މި ފަހަރުގެ ފެށުމުގެ ވާހަކަތައް އިށީނދެއިނދެ ގެނެސްދޭން ޖެހުނީ އެ ސަބަބާ ހުރެ ކަމަށް އޭނާ ބުންޏެވެ.
އަމީތާބް ފިލްމު "ކަލްކީ"ގެ ސެޓުގައި އެކްޓަރު ކަމަލް ހަސަންއާ އެކު--ފޮޓޯ/ފިލްމުފެއަނަމަވެސް، މިއީ މާ ސީރިއަސް އަނިޔާއެއް ނޫން ކަމަށާއި، ދާދި އަވަހަށް މުޅިން ރަނގަޅުވެގެންދާނެ ކަމަށް ބުނެ އަމީތާބް ވަނީ ސަޕޯޓަރުންނަށް ހިތްހަމަޖެހުން ހޯދައިދީފައެވެ. މި ދުވަސްވަރު ކޭބީސީގެ 18 ވަނަ ސީޒަން ހުށަހަޅައިދެމުން އަންނަ އަމީތާބް، ފިލްމީ ދާއިރާއިން ރިޓަޔާކުރަން އުޅޭ ކަމަށް ދެކެވުނު ވާހަކަތައްވެސް އެކްޓަރު ވަނީ ދާދިފަހުން ދޮގުކޮށްފައެވެ.
އެ ވާހަކަތައް ފެތުރެން މެދުވެރިވީ އޭނާގެ ބްލޮގް ޕޯސްޓެއްގައި "ރިޓަޔާވާން ބޭނުންވާ" ކަމަށް ލިޔެފައިވުމުންނެވެ. ނަމަވެސް ފަހުން އަމީތާބް ވަނީ އެއީ މަސައްކަތުން ރިޓަޔާވުމުގެ މާނައިގައި ލިޔުނު އެއްޗެއް ނޫން ކަމަށާއި، އެއީ ނިދަން ދާން ބޭނުންވާ ވާހަކަ ބުނުމުގެ ގޮތުން ލިޔުނު ޢިބާރާތެއް ކަމަށް ބުނެ މައްސަލަ ސާފުކޮށްދީފައެވެ.
އަމީތާބް އެންމެފަހުން ބެލުންތެރިންނަށް ފެނިގެންދިޔަ 2024 ވަނަ އަހަރުގެ ފިލްމު "ކަލްކީ 2898 އޭޑީ"ގެ ހައި-އެކްޝަން މަންޒަރެއް ހައިދަރުއާބާދުގައި ޝޫޓްކުރަނިކޮށްވެސް އެކްޓަރަށް ވަނީ ބޮޑު އަނިޔާއެއް ކުރިމަތިވެފައެވެ. އެ ހާދިސާގައި އަމީތާބްގެ އަރިކަށީގެ ކަށިގަނޑަކަށް އަނިޔާވެ، އަރިކަށީގެ މަސްގަނޑެއް ފަޅައިގެން ދިއުމުގެ ސަބަބުން ގޭގައި ގިނަ ދުވަސްތަކެއް ވަންދެން ބެޑްރެސްޓް ނަގަންޖެހުނެވެ. އަދި ހަމައެއާއެކު، އެ ދުވަސްވަރު ފިލްމުގެ ޝޫޓިންތައްވެސް ވަގުތީ ގޮތުން މެދުކަނޑާލަން ޖެހުނެވެ.
މީގެ ކުރިން 1982 ވަނަ އަހަރު "ކޫލީ" ފިލްމުގެ ސެޓުގައި ލިބުނު ފުރާނައަށް ނުރައްކާވި އަނިޔާއިންނާއި، އޭގެ ފަހުން ތަފާތު މަސައްކަތްތަކުގައި ލިބުނު އަނިޔާތަކުންވެސް ސަލާމަތްވެ، އަމީތާބް އަންނަނީ އޭނާގެ ޢުމުރުން ދުވަސްވީ ނަމަވެސް މަސައްކަތަށް އޮތް ޝައުޤުވެރިކަމާއި ހިތްވަރު ސާބިތުކޮށްދެމުންނެވެ.