އިންޑޮނޭޝިއާގެ މަޝްހޫރު ފަތުރުވެރި މަންޒިލެއް ކަމަށްވާ ބާލީގައި ހިނގި އެކްސިޑެންޓެއްގައި، ބޮލީވުޑްގެ ކުޅަދާނަ ބަތަލާ ނުސްރަތު ބަރޫޗާއަށް ސީރިއަސް އަނިޔާތަކެއް ވެއްޖެއެވެ.
މަސައްކަތުގެ ބޭނުމަކަށާއި ޗުއްޓީ ހޭދަކޮށްލުމަށް އޭނާ ބާލީއަށް ކުރި ދަތުރުގައި ހިނގި މި ޙާދިސާގައި، ބުރަކަށީގެ މައިބަދައިގެ ކަށިގަނޑެއް ބިންދައިގެން ގޮސްފައިވާ ކަމަށް ޚަބަރު ލިބެއެވެ. ނުސްރަތަށް މިވަގުތު ފަރުވާ ދެމުންދަނީ ޑޮކްޓަރުންގެ ޚާއްޞަ ބެލުމުގެ ދަށުން ބާލީގެ ހޮސްޕިޓަލެއްގައެވެ. އަދި އިތުރު ފަރުވާއަށާއި ކުރަންޖެހޭ ސާޖަރީތަކަށް، އެއާ އެމްބިއުލާންސެއްގައި އޭނާ މުމްބާއީއަށް ގެންދިއުމުގެ އެންމެ ފަހުގެ އިންތިޒާމުތައް ބަތަލާގެ ޓީމުން ހަމަޖައްސަމުންދާ ކަމަށް ރިޕޯޓުތަކުން ބުނެއެވެ.
މި ހާދިސާ ހިނގި ޚަބަރު ފުރަތަމަ ފެތުރުނުއިރު އަނިޔާގެ ތަފްސީލެއް ހާމަކޮށްފައި ނުވި ނަމަވެސް، ފަހުން އޭނާގެ ޓީމުން ނެރުނު ރަސްމީ ބަޔާނެއްގައި ވަނީ މައިބަދައިގެ ކަށިގަނޑެއް ބިންދައިގެން ގޮސްފައިވާތީ އަވަސް އޮޕަރޭޝަނެއް ކުރަން ޖެހިފައިވާކަން ކަށަވަރުކޮށްދީފައެވެ.
ނުސްރަތުގެ ޓީމުން ފާހަގަކުރި ގޮތުގައި، މިވަގުތު އެންމެ ބޮޑު އިސްކަމެއް ދެނީ ނުސްރަތުގެ ޞިއްޙީ ހާލަތަށާއި އަވަސް ފަރުވާއަށެވެ. އަނިޔާގެ ސީރިއަސްކަމުންނާއި، ސާޖަރީއަށްފަހު ފަސޭހަވުމަށް ދިގު މުއްދަތެއް ނަގާނެތީ، ކުރިއަށް އޮތް ހަފުތާތަކަށް ތާވަލުކުރެވިފައި ހުރި ބަތަލާގެ ހުރިހާ މަސައްކަތްތަކެއް މިހާރު ވަނީ ވަގުތީ ގޮތުން މެދުކަނޑާލާފައެވެ.
ބާލީގައި ހިނގި އެކްސިޑެންޓުގައި އަނިޔާވި ބަތަލާ ނުސްރަތު އަވަސް ފަރުވާއަށް ހޮސްޕިޓަލަށް ގެންދަނީ -- ފޮޓޯ/އިންސްޓަގްރާމްމި އެކްސިޑެންޓް ހިނގަން މެދުވެރިވި ސަބަބާއި ވަގުތުގެ ތަފްސީލެއް ހާމަކޮށްފައެއް ނުވެއެވެ. އަދި މި ނާޒުކު ދަނޑިވަޅުގައި ނުސްރަތުގެ ޒާތީ މިނިވަންކަމަށް އިޙްތިރާމްކުރުމަށް އެދި، ހެޔޮއެދޭ އެންމެހައި ފަރާތްތަކުން ދެއްވާ އެއްބާރުލުމަށް އޭނާގެ ޓީމުން ވަނީ ޝުކުރު އަދާކޮށްފައެވެ.
މީގެ ހަފުތާއެއްހާ ދުވަސް ކުރިން ނުސްރަތު ވަނީ ބާލީގައި ހޭދަކުރި އުފާވެރި ވަގުތުތަކުގެ ފޮޓޯތައް ސޯޝަލް މީޑިއާގައި ހިއްސާކޮށްފައެވެ. މަސައްކަތުގެ ދާއިރާއަށް ބަލާއިރު، އޭނާ އެންމެ ފަހުން ސޮއިކޮށްފައި ވަނީ ކުޅަދާނަ ޑައިރެކްޓަރު ރެމޯ ޑިސޫޒާ ޑައިރެކްޓްކޮށް، ޓައިގާ ޝްރޮފް މުހިންމު ރޯލަކުން ފެނިގެންދާ އެކްޝަން ފިލްމަކަށެވެ. މިއީ މި ދެ ތަރިން އެކުގައި ފެންނާނެ ފުރަތަމަ ފިލްމު ވެސް މެއެވެ.
ނުސްރަތު ބޮލީވުޑަށް ތަޢާރަފްވީ 2006 ވަނަ އަހަރު ނެރުނު 'ޖޭ ސަންތޯޝީ މާ'އިންނެވެ. އޭގެ ފަހުން އޭނާއަށް ބޮޑު މަޤްބޫލުކަމެއް ލިބިގެންދިޔައީ ޑައިރެކްޓަރު ލަވް ރަންޖަންގެ 'ޕިޔާރް ކާ ޕަންޗްނާމާ' ސީރީޒް އަދި 'ސޯނޫ ކޭ ޓީޓޫ ކީ ސްވީޓީ' ފަދަ ކާމިޔާބު ފިލްމުތަކުންނެވެ.