ވ. އަތޮޅު އަލިމަތާ ހޮހަޅައަށް ފީނަން އުޅުމުގެ ތެރޭގައި އިޓަލީގެ ފަސް ޑައިވަރުން މަރުވި ހާދިސާއާ ގުޅިގެން ޓޫރިޒަމް އެންޑް އޭވިއޭޝަން މިނިސްޓަރު މުޙައްމަދު އަމީނަށް، މަޖިލީހުގެ ގަލޮޅު އުތުރު ދާއިރާގެ މެމްބަރު މުޙައްމަދު އިބްރާހީމް (ކުޑޫ) 24 ސުވާލެއް ހުށަހަޅުއްވައިފިއެވެ.
މިނިސްޓަރު އަމީނަށް އެޑްރެސްކޮށް މެމްބަރު ކުޑޫ ފޮނުވާފައިވާ ސިޓީގައި ވަނީ ޑައިވް އެކްސިޑެންޓާ ގުޅުވައި ޖުމްލަ 24 ސުވާލެއް ކުރައްވައިފައެވެ.
އެގޮތުން ކުޑޫ ވަނީ ފާއިތުވި 10 އަހަރުގެ ތެރޭގައި ރާއްޖޭގައި ހިނގާފައިވާ ޑައިވް އެކްސިޑެންޓުތަކާއި، ޖުމްލަ އަދަދުގެ އިތުރުން ސީރިއަސް އަނިޔާ ލިބުނު މީހުންގެ ރަސްމީ ހިސާބުތަކާއި އެ ހިސާބުތައް އެ މިނިސްޓްރީއިން ބަލަމުންދޭތޯ ސުވާލުކުރައްވާފައެވެ.
އަދި ޑައިވިން ހާދިސާތަކާއި މަރުވާ މީހުންގެ އަދަދާއި ކުއްލި ހާލަތުގައި މީހުން އުފުލާފައިވާ ގޮތުގެ ގައުމީ ޑޭޓާ ބޭސްއެއް މިނިސްޓްރީއިން ބަލަމުންގެންދޭތޯ ވަނީ މިނިސްޓަރު އަމީނާ ސުވާލުކުރައްވާފައެވެ. އަދި ރެކޯޑުތަކުން އެ މައުލޫމާތު އެއްކުރެވިދާނެތޯ ވެސް ވަނީ އައްސަވާފައެވެ.
ކުޑޫ ވަނީ އިޓަލީގެ ފަސް ފަތުރުވެރިން މަރުވި ހާދިސާގައި 'މުރަކަ ދިރާސާކުރުމުގެ' ހުއްދަ ދޫކޮށްފައިވަނީ ކޮން އިދާރާއަކުންތޯ ވެސް އައްސަވާފައެވެ. އެ ފަތުރުވެރިންނަށް 50 މީޓަރާ ހަމައަށް ޑައިވްކުރުމަށް ހުއްދަ ދީފައިވާނަމަ އެކަމުގައި ރައްކާތެރިކަމުގައި ކަނޑައަޅާފައިވާ ރައްކާތެރިކަމުގެ ފިޔަވަޅުތަކަކީ ކޮބައިތޯ ވެސް ކުޑޫ ސުވާލުކުރައްވައިފައިވެއެވެ.
އަދި ހުއްދަ ދިނުމުގެ ކުރިން ޑައިވަރުންގެ ޓެކްނިކަލް ސެޓްފިކެޓްތަކާއި ތަޖުރިބާގެ ފެންވަރާއި ބޭނުންކުރާ ސާމާނުގެ ފެންވަރު ރަސްމީކޮށް ރިވިއުކޮށްފައިވޭތޯ ވެސް ވަނީ އައްސަވާފައެވެ.
ވ. އަތޮޅުގެ ކަނޑުގެ ވަރަށް ފުނުގައި އޮތް ހޮހަޅައަކަށް ފީނަން އުޅުމުގެ ތެރޭގައި މަރުވި އިޓަލީގެ ފަސް ފަތުރުވެރިންގެ ތެރެއިން ދެ މީހެއްގެ ނަން, އެ މީހުން ރާއްޖެ އައި ސަބަބު ކަމަށްވާ ރިސާޗަރުންގެ ލިސްޓްގައި ނެތް ކަމަށް ސަރުކާރުން މިއަދު ވަނީ ބުނެފައެވެ.
މި ހާދިސާއާ ގުޅިގެން ރާއްޖޭން ހިންގާ ތަހުގީގު މައިގަނޑު ގޮތެއްގައި އަމާޒުކުރަނީ، ދަތުރު އިންތިޒާމުކުރި ފަރާތްތަކުން ރަނގަޅު ރައްކާތެރިކަމުގެ ފިޔަވަޅުތައް އަޅާފައިވޭތޯއާއި، ބޭނުންވާ ފުރިހަމަ ޕްލޭންތައް ހަދާފައިވޭތޯ ބެލުމުގެ މައްޗަށް ކަމަށް ވެސް ރައީސް އޮފީހުގެ ތަރުޖަމާނު މުހައްމަދު ހުސައިން ޝަރީފު (މުންދު) ވަނީ ވިދާޅުވެފައެވެ.