ޑައިވިނަށް ގޮސް އުޅެނިކޮށް ގެއްލިގެން ހޯދަމުންދިޔަ އިޓަލީގެ ފަސް ފަތުރުވެރިންގެ ތެރެއިން ބާކީ ދެ މީހުންގެ ހަށިގަނޑު ވެސް މިއަދު ނަގައިފިއެވެ.
ސަރުކާރުގެ އިސް ތަރުޖަމާނު މުޙައްމަދު ޙުސައިން ޝަރީފް (މުންދު)ވަނީ 'ސަން'އަށް އެކަން ކަށަވަރުކޮށްދެއްވައިފައެވެ.
ތަރުޖަމާނު މިއަދު ވިދާޅުވީ، އިޓަލީވިލާތުގެ ފަތުރުވެރިން ޑައިވްކުރުމަށް ފޭބި ހޮހޮޅަ ކަމަށްވާ ވ. އަތޮޅުގެ އަލިމަތާ ކޭވްގައި އޮތް ހަތަރު ހަށިގަނޑުގެ ތެރެއިން އިއްޔެ ދެ ހަށިގަނޑު ނެގުމަށްފަހު، ބާކީ އޮތް ދެ ފަތުރުވެރިންގެ ހަށިގަނޑު މިއަދު ނަގައިފައިވާ ކަމަށެވެ.
މި ފުރުސަތުގައި، ފަތުރުވެރިންގެ ހަށިގަނޑުތައް ނެގުމަށް ކުރިއަށް ގެންދިޔަ އޮޕަރޭޝަންގައި އެހީތެރިކަން ފޯރުކޮށްދިން ފިންލޭންޑުގެ ޓެކްނިކަލް ޑައިވަރުންނާއި، ހިލޭ ސާބަހަށް އެހީވެދިން ދިވެހި ދެ ކުންފުނިން ކޮށްދިން މަސައްކަތް ތަރުޖަމާނު ފާހަގަކުރެއްވިއެވެ.
އޭނާ ވިދާޅުވީ، ކުރިއަށް ދެން އޮތީ މޯޗުއަރީއަށް ހަށިގަނޑުތައް ގެންދިއުން ކަމަށެވެ.
އަދި ފަތުރުވެރިންގެ ހަށިގަނޑުތައް އިޓަލީވިލާތަށް ފޮނުވައިލުމާ ގުޅޭ ގޮތުން އެ ގައުމުގެ ސަރުކާރާއެކީ މަޝްވަރާކުރަމުން އަންނަ ކަމަށް ވެސް ވިދާޅުވިއެވެ.
އިޓަލީވިލާތަށް ނިސްބަތްވާ ޖުމުލަ ފަސް ފަތުރުވެރިން ގެއްލުނީ މިދިޔަ ބުރާސްފަތި ދުވަހު ޑައިވިންއަށް ފޭބި ފަހުންނެވެ. އެ މީހުންގެ ޚަބަރެއް ނުވެގެން ފުލުހުންނަށާއި ސިފައިންނަށް ރިޕޯޓު ލިބުނީ އެ ދުވަހުގެ މެންދުރުފަހު 1:45 ހާއިރެވެ.
ފަސް މީހުންގެ ތެރެއިން އެކަކު ފެނުނީ އެ ދުވަހުގެ އިރުއޮއްސި 6:13 ހާއިރު، ގާތްގަނޑަކަށް 60 މީޓަރު އަޑިން ހަމަ އެ ހޮހޮޅައިން ކަމަށް އެމްއެންޑީއެފުން ބުންޏެވެ. އަދި ބާކީ ހަތަރު މީހުން ވެސް ވީ 200 ފޫޓު ދިގު އެ ހޮހޮޅައިގެ ތެރޭގައި ކަމަށް ބެލެވޭކަމަށް އެ ދުވަހު ބުންޏެވެ.
އެއާއެކު މިދިޔަ ހަފުތާ ބަންދުގައި ދިވެހި ސިފައިންގެ ޑައިވް ޓީމުން ވަނީ އެ ސަރަހައްދުގައި ރިކަވަރީ އޮޕަރޭޝަންތައް ކުރިއަށް ގެންގޮސްފައެވެ. ނަމަވެސް ހޮނިހިރު ދުވަހުގެ މެންދުރުފަހު އެ ނުރައްކާތެރި އޮޕަރޭޝަނުގައި ޑައިވްކުރި ސާޖަންޓް ފަސްޓް ކްލާސް މުޙައްމަދު މަހުދީ ނިޔާވުމާއެކު، އިތުރަށް އޮޕަރޭޝަން ކުރިއަށް ނުގެންގޮސް ވަގުތީގޮތުން މެދުކަނޑާލިއެވެ. އަދި އެ އޮޕަރޭޝަން އަނެއްކާ ވެސް ކުރިއަށް ގެންދިޔައީ އިޓަލީގެ ތަޖުރިބާކާރު ޑައިވަރުންގެ ޓީމު ރާއްޖެ އައުމަށްފަހެވެ.
މި ހާދިސާއަށް މުޅި ދުނިޔޭގެ ސަމާލުކަން ވަނީ ލިބިފައެވެ.