ސެމްސަންގުން އަންނަ ޖުލައި މަހު ބާޒާރަށް ނެރުމަށް ތައްޔާރުވަމުންދާ ގެލެކްސީ ޒެޑްފޯލްޑް 8 އަދި ގެލެކްސީ ޒެޑްފްލިޕް 8 ފޯނުތަކާއެކު ގޫގުލްގެ އެންމެ ފަހުގެ އޭއައި ފީޗާސްތައް ހިމެނޭ "ޖެމިނައި އިންޓެލިޖެންސް" ތައާރަފްކުރާނެ ކަމަށް ރިޕޯޓްތައް ބުނެފިއެވެ.
ކޮރެއާގެ މީޑިއާ ރިޕޯޓްތައް ބުނާގޮތުން މި ފޯނުތައް ބާޒާރަށް ނުކުންނައިރު، ސެމްސަންގްގެ އާ ސޮފްޓްވެއާ "ވަން ޔޫއައި 9" މެދުވެރިކޮށް މި ޚިދުމަތްތައް ފުރަތަމަ ފަހަރަށް ބޭނުންކުރެވޭނެއެވެ.
މިދިޔަ ހަފުތާގައި ބޭއްވި "އެންޑްރޮއިޑް ޝޯ އައި/އޯ އެޑިޝަން" ގައި ގޫގުލްއިން ވަނީ މި އޭއައި ފީޗާސްތަކުގެ މައުލޫމާތު އާންމުކޮށްފައެވެ. ކުރިން ބެލެވިފައި އޮތީ މި ޚިދުމަތް އެންމެ ފުރަތަމަ ލިބޭނީ ސެމްސަންގް ގެލެކްސީ އެސް26 ސީރީޒް އަދި ގޫގުލް ޕިކްސެލް 10 ފޯނުތަކަށް ކަމަށެވެ. ނަމަވެސް އެންމެ ފަހުގެ މައުލޫމާތުތައް ބުނާގޮތުން ސެމްސަންގްގެ އާ ފޯލްޑަބަލް ފޯނުތަކާއެކު މި ޓެކްނޮލޮޖީ އެހެން ފޯނުތަކަށްވުރެ ކުރިން ފެނިގެންދާނެއެވެ.
ޖެމިނައި އިންޓެލިޖެންސްގެ އެންމެ ފާހަގަކޮށްލެވޭ އެއް ބަޔަކީ ފޯނުގައި އެއްވަގުތެއްގައި ގިނަ މަސައްކަތްތަކެއް ނުވަތަ މަލްޓިޓާސްކިން ފަސޭހަކޮށްދިނުމެވެ. މިސާލަކަށް، ނޯޓްސް އެޕްގައި ތައްޔާރުކޮށްފައިވާ ޝޮޕިން ލިސްޓެއް އޭއައި މެދުވެރިކޮށް ސީދާ ޑެލިވަރީ އެޕަކަށް ބަދަލުކޮށްލެވޭނެއެވެ. މި ނިޒާމުގެ ތެރެއިން އޭއައި އަމިއްލައަށް އެކި އެޕްތަކަށް ވަދެ، ބޭނުންވާ ތަކެތި ކާޓަށް އިތުރުކޮށް، ފައިސާ ދެއްކުމުގެ މަރުހަލާއާ ހަމައަށް ކަންކަން ފަސޭހަކޮށްދޭނެއެވެ.
މީގެ އިތުރުން ވަން ޔޫއައި 9 އާއެކު އިތުރު އާ ފީޗާސްތަކެއް ވެސް ތައާރަފްކުރާނެ ކަމަށް ބެލެވެއެވެ. އޭގެ ތެރޭގައި ސެމްސަންގް ނޯޓްސްގައި ބޭނުންކުރާ އެސް-ޕެން އިތުރަށް ފުރިހަމަކޮށްދޭ "މާސްކިން ޓޭޕް" ފީޗާ އާއި، ކޮންޓެކްޓްތަކާ ގުޅުވައިގެން ޕްރޮފައިލް ކާޑު ހެދޭ "ކްރިއޭޓިވް ސްޓޫޑިއޯ" ހިމެނެއެވެ. މި ސޮފްޓްވެއާ މިހާރު ދަނީ ދެކުނު ކޮރެއާ ފަދަ ގައުމުތަކުގައި ޓެސްޓްކުރެވެމުންނެވެ.
ގޫގުލްއިން ހާމަކޮށްފައިވާ ގޮތުގައި މި އޭއައި ޚިދުމަތްތައް މިއަހަރުގެ ހޫނު މޫސުމުގައި ނެރޭ ސެމްސަންގް އަދި ޕިކްސެލް ފޯނުތަކުން ފެންނަން ފަށާނެއެވެ. އަދި މިއަހަރުގެ ފަހުކޮޅު އެންޑްރޮއިޑް ބޭނުންކުރާ އެހެނިހެން ވަސީލަތްތައް ކަމަށްވާ ގަޑި، ކާރު، އައިނު އަދި ލެޕްޓޮޕްތަކަށް ވެސް ޖެމިނައިގެ މި ފީޗާސްތައް ތައާރަފްކުރުމަށް ވަނީ ރޭވިފައެވެ.