މީގެ ތިން އަހަރު ކުރިން ރިލީޒްކޮށް ބޮކްސް އޮފީހުގައި ބޮޑު ކާމިޔާބީއެއް ހޯދި ޑައިރެކްޓަރު އެޓުލީގެ ފިލްމު "ޖަވާން"ގެ ދެވަނަ ބައެއް އުފެއްދުމާ ބެހޭގޮތުން މަޝްވަރާތަކެއް ކުރާ ކަމަށް ރިޕޯޓުތަކުން ބުނެފިއެވެ.
ބޮލީވުޑްގެ ރިޕޯޓުތަކުން ބުނެފައިވާ ގޮތުން ޑައިރެކްޓަރު އެޓުލީއާއި އެ ފިލްމުގެ ލީޑް އެކްޓަރު ޝާހްރުކް އަންނަނީ "ޖަވާން 2"ގެ ސްކްރިޕްޓްގެ މަސައްކަތް ވެސް ފެށުމަށް ތައްޔާރުވަމުންނެވެ. ސިނެމާއެކްސްޕްރެސްގެ ރިޕޯޓެއްގައިވާ ގޮތުން މި ފިލްމުގެ ސްކްރިޕްޓް މުތާލިއާކުރުމަށް ފަހު ޝާހު ވަނީ ފިލްމުގެ ސްކްރިޕްޓް އެކްޓަރަށް ކަމުދާކަމުގެ ފެހި ސިގްނަލް ދީފައެވެ.
މި އަހަރުގެ ޑިސެންބަރު ސިމަނާތަކަށް ގެންނާނެކަން އިއުލާނުކޮށްފައިވާ ޝާހުގެ ފިލްމު "ކިންގް"ގެ މަސައްކަތް ނިމުނުހާ އަވަހަށް އެޓުލީއާ އެކު "ޖަވާން 2"ގެ މަސައްކަތް އެކްޓަރު ފަށަން ނިންމާފައިވާ ކަމަށް ވެސް ފިލްމީ ޚަބަރުތައް ބުނެއެވެ.
ފިލްމު "ޖަވާން"ގެ ބައެއް މަންޒަރުތައް ދައްކުވައިދޭ ފޮޓޯ ކޮލާޖްއެއް--ފޮޓޯ/ސިނެމާއެކްސްޕްރެސް
ޝާހުގެ އާއިލީ ކުންފުނި ރެޑް ޗިލީޒް އެންޓަޓެއިމަންޓް ބެނާގެ ދަށުން ގެނެސްދިން "ޖަވާން"ގެ ޕްރޮޑިއުސަރަކީ ގޯރީ ޚާންއެވެ. ޝާހުއާ އެކު 2023ގެ ފިލްމުން ނަޔަންތާރާ، ދީޕިކާ ޕަދުކޯން، ވިޖޭ ސެތުޕަތީ، ޕްރިޔާމާނީ، ސާންޔާ މަލްހޯތުރާ އަދި ސުނިލް ގްރޯވަރު މުހިއްމު ރޯލްތަކުން ފެނުނެވެ.
ފިލްމު "ޖަވާން"ގެ ދެވަނަ ބައެއް އުފެއްދުމުގެ އަޑުތަކެއް އަރާފައިވީ ނަމަވެސް އެ ފިލްމާގުޅޭ ތަފުސީލީ އެއްވެސް މައުލޫމާތެއް މިހާތަނަށް ރަސްމީކޮށް ހާމަކޮށްފައެއް ނުވެއެވެ.
ޖުމުލަ 300 ކްރޯޑު ރުޕީސްގެ ބަޖެޓަކުން އުފެއްދި "ޖަވާން" ސިނަމާތަކުން ނެގިއިރު އާމްދަނީގެ ގޮތުގައި ފިލްމަށް 1،148.32 ކްރޯޑު ރުޕީސް ވަނީ ލިބިފައެވެ. މިއީ ޝާހްރުކް ޚާންގެ ދިގު ފިލްމީ ކެރިއަރުގައި އެންމެ ބޮޑު ކާމިޔާބީއެއް ހޯދި ފިލްމުގެ އިތުރުން އެކްޓަރަށް ނެޝަނަލް އެވޯޑު ވެސް ކާމިޔާބުކޮށްދިން ފިލްމެވެ.