ހެލްތު ޕްރޮޓެކްޝަން އޭޖެންސީ (އެޗްޕީއޭ)ގެ ޑިރެކްޓަރު ޖެނެރަލުގެ މަގާމަށް މިމަހުގެ ތެރޭ މީހަކު އައްޔަންކުރެވޭނެ ކަމަށް، ސިވިލް ސާވިސް ކޮމިޝަނުން މިއަދު ބުނެފިއެވެ.
އެޗްޕީއޭގެ ޑިރެކްޓަރު ޖެނެރަލްގެ މަގާމު ހުސްވީ، އެ މަގާމު ފުރުއްވަމުން ގެންދެވި މައިމޫނާ އަބޫބަކުރު، މި އަހަރުގެ ފުރަތަމަ ދުވަހު މަގާމުން ރިޓަޔާކުރެއްވުމާ ގުޅިގެންނެވެ. އެހެންވެ، އެ މަގާމަށް މީހަކު ހޯދުމަށްޓަކައި ސިވިލް ސާވިސް ކޮމިޝަނުންވަނީ، މިދިޔަ ފެބްރުވަރީ މަހު އިއުލާނުކޮށްފައެވެ.
އެ ކޮމިޝަންގެ ނައިބު ރައީސް މުޙައްމަދު ނާސިޙް 'ސަން'އަށް މިއަދު ވިދާޅުވީ، އެޗްޕީއޭގެ ޑިރެކްޓަރު ޖެނެރަލްގެ މަގާމަށް މި މަހު ތެރޭ މީހަކު އައްޔަންކުރެވޭނެ ކަމަށެވެ.
"ޑިރެކްޓަރު ޖެނެރަލް ޕަބްލިކް ހެލްތުގެ ޕޯސްޓުގެ ރިކްރޫޓްމަންޓް ޕްރޮސެސް ނިމި، އެ މަގާމަށް މީހަކު މިމަހު އައްޔަންކުރެވޭނެ،" ނާސިޙް ވިދާޅުވިއެވެ.
އެޗްޕީއޭގެ ޑިރެކްޓަރު ޖެނެރަލްގެ މަގާމުން ރިޓަޔާކުރެއްވިކަން މައިމޫނާ ހާމަކުރެއްވީ މިދިޔަ ޖަނަވަރީ މަހުގެ ހަތްވަނަ ދުވަހެވެ. 'ސަން'އިން ސުވާލުކުރުމުން މައިމޫނާ ވިދާޅުވީ، ރިޓަޔާކުރެއްވީ، އުސޫލުތަކާ އެއްގޮތަށް އަމިއްލަ ސަބަބަކަށްޓަކައި ކަމަށެވެ.
މައިމޫނާ، އެޗްޕީއޭގެ ޑިރެކްޓަރު ޖެނެރަލްގެ މަގާމަށް އައްޔަނުކުރެއްވީ ނޮވެމްބަރު 17، 2016ގައެވެ. ތިރީސް ފަސް އަހަރަށް ވުރެ ގިނަ ދުވަހު ސިއްހީ ދާއިރާއަށް ޚިދުމަތްކޮށްދެއްވި، މައިމޫނާގެ މަސައްކަތް އެންމެ ބޮޑަށް ފާހަގަކުރެވުނީ ކޮވިޑް-19ގެ ދުވަސްވަރެވެ.
ސިއްހީ ދާއިރާއަށް މުހިންމު މަސައްކަތްތަކެއް އޭނާ ވަނީ ކޮށްދެއްވައިފައެވެ.
ކޮވިޑްގެ އާލަމީ ވަބާ، ރާއްޖެއަށް ހަލުވިކަމާއެކު ފެތުރެމުންދިޔައިރު މައިމޫނާ ވަނީ އުނދަގޫ ނިންމެވުންތަކެއް ނިންމަވައި، އާންމުންގެ ސަލާމަތާއި ރައްކާތެރިކަމަށްޓަކައި ގިނަ ގުނަ މަސައްކަތްތަކެއް ކުރައްވައިފައެވެ. އަދި އެ ދުވަސްވަރު އާންމުންނަށް ސައްހަ މައުލޫމާތު ފޯރުކޮށްދިނުމުގައި ވެސް އިސް ދައުރެއް އަދާކުރެއްވެވިއެވެ.