މިއަހަރު މިހާތަނަށް ރިލީޒްކުރި ބޮލީވުޑް ފިލްމުތަކުގެތެރެއިން ބޮކްސް އޮފީހުގައި ބޮޑު ކާމިޔާބީއެއް ހޯދަމުން އަންނަ ފިލްމު "ދުރަންދަރު 2"ގެ ޓިކެޓް ނުލިބި އެ ފިލްމު ބަލާލުމުގެ ފުރުސަތު ނުލިބޭ މީހުން ފިލްމު "ޑެކޮއިޓް" ބަލާލަން ދިއުމަށް އެކްޓަރު އަދިވީ ސޭޝް ގޮވާލައިފިއެވެ.
ތެލުގޫ އެކްޓަރު އަދިވި ސޭޝް ބުނީ ފިލްމު "ދުރަންދަރު: ދަ ރިވެންޖް" ކުރިއަށް އޮތް ތިން ހަތަރު މަސް ދުވަހު ސިނަމާތަކުގައި ދައްކާނެ ކަމަށް ބެލެވޭ ކަމަށެވެ. އެހެންވެ އޭނާ އެ ފިލްމު ސިފަކުރަނީ އިންޑިއަން ޕްރިމިއާ ލީގު (އައިޕީއެލް) ފަދަ، އާއްމުންގެ ގިނަ ބައެއްގެ ތަރުހީބު ލިބޭ ބޮޑު ހަރަކާތެއްގެ ގޮތުގައި ކަމަށް ވަނީ ބުނެފައެވެ.
އަދިވި އާއި ބަތަލާ މްރޫނާލް ލީޑް ރޯތަކުން ފެންނާނެ ފިލްމު "ޑެކޮއިޓް" އެންމެ ފުރަތަމަ ރިލީޒްކުރަން ނިންމާފައި އޮތީ މިދިޔަ މާރޗް މަހުގެ 19 ވަނަ ދުވަހަށެވެ. ނަމަވެސް ބޮލީވުޑް ފިލްމު "ދުރަންދަރު 2"އަށް ލިބެމުން އަންނަ ތަރުހީބާ އެކު ސިނަމާތައް ލިބުން ދަތިވެ "ޑެކޮއިޓް" ރިލީޒްކުރާނެ ތާރީޚަކަށް މިހާރު ހަމަޖައްސާފައި ވަނީ މި އަންނަ ހުކުރު ދުވަހަށެވެ.
ފިލްމު "ޑެކޮއިޓް"ގެ ޓްރެއިލާ ރިލީޒްކުރި ރަސްމިއްޔާތުގައި ފިލްމުގެ ބައެއް ކާސްޓުން--ފޮޓޯ/ބޮލީވުޑްހަންގާމާ
ޝަނީލް ދިއޯ ޑައިރެކްޓްކޮށްފައިވާ މި އެކްޝަން ތުރިލާގެ މުހިއްމު ރޯލަކުން ޑައިރެކްޓަރު/އެކްޓަރު އަނޫރާގް ކަޝްޔަޕް ވެސް ފެންނާނެއެވެ. މި ފިލްމުގެ ވާހަކަ ބިނާކޮށްފައި ވަނީ ބޮޑު އޮޅުވާލުމެއް އޮޅުވާލި ކުރީގެ ލޯބިވެރިޔާގެ ކިބައިން ބަދަލު ހިފުމަށް ކުށްވެރިއަކު ކުރާ މަސައްކަތްތަކުގެ މައްޗަށެވެ.
އަދިވް ބުނެފައިވާ ގޮތުގައި ޑަބްކޮށްފައިވާ ވާޝަންތަކަށް ބަރޯސާވުމުގެ ބަދަލުގައި، ފިލްމުގެ އަސްލުކަން ހިފެހެއްޓުމަށާއި ގިނަ ބަޔަކަށް ފިލްމު ފޯރުކޮށްދިނުމަށްޓަކައި، މި ފިލްމު ޝޫޓްކޮށްފައި ވަނީ ހިންދީ އަދި ތެލުގޫ ބަހުންނެވެ.