އެމެރިކާއާއި އިސްރާއީލުން އީރާނަށް ދެމުންގެންދާ ހަމަލާތަކަށް މަހެއްވެފައިވާއިރު، އީރާނުގައި ކުރިއަށް ގެންދާ އަސްކަރީ އޮޕަރޭޝަން ދެތިން ހަފްތާ ތެރޭގައި ނިންމާލާނެ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެއެވެ.
ހަނގުރާމަ ހުއްޓާލުމުގެ ސުލްހައިގެ އެއްބަސްވުމެއް އެކުލަވާލަން އެެމެރިކާއިން މަސައްކަތް ކުރަމުން އަންނައިރު، އެއްބަސްވުމަކަށް ނާދެވުނު ނަމަވެސް ހަނގުރާމަ ހުއްޓާލާނެ ކަމަށް ޓްރަމްޕް ވިދާޅުވިއެވެ.
ޓްރަމްޕް އެގޮތަށް ވިދާޅުވީ ވައިޓް ހައުސްގައި, ގޭހުގެ އަގު ބޮޑުވުމާ ގުޅޭ ގޮތުން ކުރި ސުވާލަކަށް ޖަވާބު ދެއްވަމުންނެވެ.
"އަހަރެން ކުރަން އޮތް ކަމަކީ އީރާން ދޫކޮށް ދިއުން. އަދި ވަރަށް އަވަހަށް އެކަން ކުރާނަން. އަދި އެ މީހުން ވެއްޓިގެން ދާނެ." ޓްރަމްޕް ވިދާޅުވިއެވެެ.
"ވަރަށް އަވަހަށް އެކަން ނިންމާނަން. ފަހަރެއްގައި ދެ ހަފްތާ ތެރޭގައި."
ޓްރަމްޕް ވިދާޅުވީ އީރާނަށް ނިއުކްލިއާ ހަތިޔާރެއް ލިބުން ހުއްޓުވުމުގެ މަގުސަދު މިހާރު ވެސް ހާސިލްވެފައިވާ ކަމަށެވެ.
އަދި އެމެރިކާގެ ހަމަލާތަކުގެ ސަބަބުން އީރާނުގެ އަސްކަރީ ގާބިލްކަން ވަރަށް ބޮޑަށް ބަލިކަށިވެފައިވާ ކަމަށާއި އިރާން އަލުން ބިނާކުރަން 15 އަހަރާއި 20 އަހަރާއި ދެމެދުގެ މުއްދަތެއް ނަގާފާނެ ކަމަށްވެސް ޓްރަމްޕް ވިދާޅުވިއެވެ.
އީރާނާ ދެކޮޅަށް ކުރާ ހަނގުރާމައިގެ "ފިނިޝް ލައިން" ވަރަށް އަވަހަށް އަންނާނެ ކަމަށް އެމެރިކާގެ ޚާރިޖީ ވަޒީރު މާކޯ ރޫބިއޯވެސް ވަނީ ވިދާޅުވެފައެވެ.
އީރާނުން ދަތުރުކުރުން ހުރަސް އަޅާފައި އޮތް ހޮރްމުޒް ކަނޑުއޮޅި ނުހުޅުވި ނަމަވެސް ޓްރަމްޕް ބޭނުންފުޅު ވަނީ ހަނގުރާމަ ނިމުމަކަށް ގެނައުމަށް ކަމަށް ވޯލް ސްޓްރީޓް ޖާނަލްއިންވެސް އިއްޔެ ވަނީ ރިޕޯޓުކޮށްފައެވެ.
ހަނގުރާމަ ނިންމުމަކަށް ގެނައުމުގެ ވާހަކަ އެމެރިކާއިން ދެއްކި ނަމަވެސް ހަނގުރާމަ ނިންމާނީ އެެމެރިކާއަކުން ނޫން ކަމަށާއި އީރާނުން ކަމަށް އެ ގައުމުން މީގެކުރިން ވަނީ ބުނެފައެވެ.
އޭގެއިތުރުން އެމެރިކާގެ ބައެއް އެކުވެރި ގައުމުތަކުން ހޮރްމޮޒް ކަނޑުއޮޅި ހުޅުވުމަށް އަސްކަރީ އެހީތެރިކަން ދޭން ދެކޮޅު ހަދާފައިވާތީ، ޓްރަމްޕް ވަނީ އެ ގައުމުތަކުން އަމިއްލައަށް އެ ސަރަހައްދަށް ގޮސް ތެޔޮ ހޯދުމަށްވެސް ގޮވާލައްވާފައެވެ.
"އެމީހުންނަށް އަމިއްލައަށް ކަންކަން ބެލެހެއްޓޭނެ. އަހަރެންނަށް ހީވަނީ ވަރަށް ރައްކާތެރި ކަމެއްހެން، އަސްލު، އެކަމަކު އަހަރެމެންނަށް އެކަމާ އެއްވެސް ގުޅުމެއް ނެތް." ޓްރަމްޕް ވިދާޅުވިއެވެ.
ހަނގުރާމަ ނިމުމަކަަށް ގެންނާނެ ކަމަށް ޓްރަމްޕް ވިދާޅުވެފައިވާއިރު، ސީދާ އަދި ނުސީދާ މެސެޖްތައް ލިބުނު ނަމަވެސް އެމެރިކާއާ އެކު އެއްވެސް މަޝްވަރާއެއް ނުހިނގާ ކަމަށް އީރާނުގެ ޚާރިޖީ ވަޒީރު އައްބާސް އަރަޢްޗީ ވަނީ ވިދާޅުވެފައެވެ.
އީރާނުން މަޝްވަރާތަކުގައި ބައިވެރިވެ، އެއްބަސްވުމަކަށް "އާދޭސް ކުރަމުން" ދާ ކަމަށް ޓްރަމްޕް މީގެކުރިން ވަނީ ވިދާޅުވެފައެވެ.