މާލޭ ސިޓީއާއި ރާއްޖޭގެ ގިނަ ރަށްތަކުގައި ފެން އުފައްދަނީ ޑީސަލް ބޭނުންކޮށްގެން ކަމަށާއި މާލޭ ސިޓީން ފެނަށް ޖެހިއްޖެނަމަ ސަރުކާރުން އަމަލުކުރާނެ ގޮތެއް ރައްޔިތުންނަށް ބުނެދޭން ޖެހޭ ކަމަށް މާލޭގެ މޭޔަރު އާދަމް އާޒިމް މިއަދު ވިދާޅުވެއްޖެއެެވެ.
އާޒިމް މިހެން ވިދާޅުވީ، ދުނިޔެއަށް މި ވަގުތު ދިމާވެފައިވާ ތެލުގެ ދަތިކަމުގެ ސަބަބުން ރާއްޖެ ތެލަށް ޖެހިދާނެކަމުގެ ފުރުސަތު ބޮޑުކަމަށް ގިނަ ބަޔަކު ބުނަމުން އަންނަ ދަނޑިވަޅެއްގައެވެ.
އާޒިމް އެކްސްގައި ކުރެއްވި ޕޯސްޓެއްގައި ވިދާޅުވީ، މާލެ ސަރަހައްދަށް ބޭނުންވާ ފެން އުފަށްދަނީ ޑީސަލް ބޭނުންކޮށްގެން ކަމަށެވެ. އަދި، މާލެ ސިޓީގެ ސްޓޮކަކީ ގިނަވަގެން އެއް ދުވަސް ކަމަށެވެ. އެހެންކަމުން މިކަމުގައި ސަރުކާރުގެ ވިސްނުމަކީ ކޮބައިތޯ އޭނާ ވަނީ ސުވާލު އުފައްދާފައެވެ.
މާލޭ ސިޓީގެ ޑީސަލް ސްޓޮކް ބޭނުންކުރާނެ ތަރުތީބެއް އެކުލަވާލަން ޖެހޭ ކަމަށާއި ފެނަށް ޖެހިއްޖެ ނަމަ ސަރުކާރުގެ ޕްލޭނަކީ ކޮބައިކަން ރައްޔިތުންނަށް ބުނެދޭން ޖެހޭކަމަށް ވެސް އާޒިމް ވިދާޅުވިއެވެ.
ފާހަގަކޮށްލެވޭ ގޮތުގައި، އާޒިމަކީ މީގެ ކުރިން ގިނަ ދުވަސްތަކެއް ވަންދެން ސަރުކާރުގެ ފެން ކުންފުނި އެމްޑަބްލިއުއެސްސީގެ ފިނޭންސް ޑިޕާޓްމަންޓްގައި މަސައްކަތްކުރެއްވި ބޭފުޅެކެވެ. އަދި، މިދިޔަ އެމްޑީޕީ ސަރުކާރުގައި އެ ކުންފުނީގެ މެނޭޖިން ޑިރެކްޓަރުކަން ވެސް އަދާކުރެއްވިއެވެ.
މިހާރު ދުނިޔެއަށް ކުރިމަތިވެފައިވާ ތެލުގެ ތާށިކަމާ އެކު، ރާއްޖޭގެ ތެލުގެ އަގުތަކަށް ވެސް އަންނަނީ ބޮޑެތި ބަދަލުތަކެއް އަންނަމުންނެވެ. އަދި, މިއީ ސަރުކާރުން ވިސްނުންތެރިކަމާއިއެކު ހަރުދަނާ ފިޔަވަޅުތަކެއް އަޅަންޖެހޭ ދަނޑިވަޅެއްކަމަށް ގިނަ ފަރާތްތަކުން އަންނަނީ ވެސް ބުނަމުންނެވެ.
އެމެރިކާއާއި އިސްރާއީލުން އީރާނާ ދެކޮޅަށް ކުރާ ހަނގުރާމައިގެ ސަބަބުން އޭޝިއާއަށް އެންމެ ބޮޑު އަސަރެއް ކުރަނީ، ދުނިޔޭގެ ތެލުގެ ސަޕްލައިގެ 20 އިންސައްތަ ދަތުރުކުރާ މުހިންމު މަގު ކަމަށްވާ ހޮރްމޫޒް ކަނޑުއޮޅި ބަންދުވުމުގެ ބިރު ހީވެފައިވުމުންނެވެ. އެންމެ ހަނި ހިސާބުގައި 21 ނޯޓިކަލް މޭލުގެ ފުޅާމިން ހުންނަ މި ކަނޑުއޮޅިއަކީ އޭޝިއާގެ ގިނަ ގައުމުތަކަށް މެދުއިރުމަތީގެ ތެޔޮ ގެނައުމަށް އޮތް އެންމެ މުހިންމު މަގެވެ.