މި އަންނަ ހަފްތާގެ ބުރާސްފަތި ދުވަހު ރިލީޒްކުރާ ބޮލީވުޑްގެ ފިލްމު "ދުރަންދަރު: ދަ ރިވެންޖް"ގެ ޓްރެއިލާ ރިލީޒް ކުރުމާ އެކު ބޮޑު ތަރުހީބެއް ފިލްމުގެ ޓްރެއިލާ އަންނަނީ ލިބެމުންނެވެ.
އެގޮތުން އިއްޔެއާ ހަމައަށް އެކަނިވެސް މި ފިލްމުގެ ޓްރެއިލާ ބެލި މީހުންގެ އަދަދު ވަނީ 27 މިލިއަން ފަހަނައަޅައި ގޮސްފައެވެ. ބަދަލުހިފުމުގެ ރޫހެއްގައި ބޮލީވުޑްގެ ކުޅަދާނަ އެކްޓަރު ރަންވީރު ސިންގް ދައްކައިލި "ދުރަންދަރު 2"ގެ ޓްރެއިލާގައި އެކްޓަރު ވަނީ ޕާކިސްތާނުގެ މުސްތަޤްބަލް ކަނޑައަޅާނީ އިންޑިއާއިން ކަމަށް ބުނެ ވަރުގަދަ އިންޒާރެއް ވެސް ދީފައެވެ.
ކުޅަދާނަ ފިލްމު ޑައިރެކްޓަރު އަދިތްޔާ ދާރްގެ ކާމިޔާބު ފިލްމު "ދުރަންދަރު"ގެ ދެވަނަ ބައިން ވެސް ރަންވީރު ސިންގް ފެނިގެންދާނީ ޖަސްކިރާތު (ނުވަތަ ހަމްޒާ)ގެ ނަމުގައި ކުޅޭ ކެރެކްޓާއިންނެވެ.
"ދުރަންދަރު: ދަ ރިވެންޖް" ރަސްމީކޮށް ރިލީޒްކުރާ ތާރީޚަކީ މި މަހުގެ 19 ކަމުގައިވީ ނަމަވެސް މި މަހުގެ 18 ވަނަ ދުވަހު ހާއްސަ "ޕެއިޑް ޕްރީވިއު" ޝޯތަކެއް ބާއްވަން ފިލްމުގެ އުފެއްދުންތެރިން ވަނީ ނިންމާފައެވެ. އަދި މި ޝޯތަކުގެ ޓިކެޓްތައް "ބުކްމައިޝޯ" އެޕްއިން މިހާރު ވަނީ ވިއްކަން ފަށާފައެވެ.
ފިލްމު "ދުރަންދަރު 2"ގެ ޓްރެއިލާއިން މަންޒަރެއްގައި ރަންވީރު ސިންގް--ފޮޓޯ/އެންޑީޓީވީ
މިދިޔަ އަހަރުގެ ޑިސެމްބަރު މަހު 5 ގައި ސިނަމާތަކަށް ގެނައި "ދުރަންދަރު" އަކީ ބޮކްސް އޮފީހުގައި–1428 ކްރޯޑް ރުޕީސް (158.1 މިލިއަން ޑޮލަރު)ގެ އާމްދަނީއެއް ހޯދި ފިލްމެކެވެ. "ދުރަންދަރު 2"ގެ މައިގަނޑު ކާސްޓުންނަކީ ރަންވީރުގެ އިތުރުން އަރުޖުން ރާމްޕާލް، ސަންޖޭ ދަތު، އާރް މާދްވަން އަދި ޒުވާން ބަތަލާ ސާރާ އަރުޖުންއެވެ.
މިފަހަރުގެ ބައިން އެކްޓަރު އަކްޝޭ ކަންނާގެ މާބޮޑު ރޯލެއް ނުފެންނާތީ ފަޅުކަމެއް އިހުސާސްކުރެވޭނެ ކަމަށް ވަރަށް ގިނަ ބެލުންތެރިން ވަނީ ބުނެފައެވެ.
ފިލްމު "ދުރަންދަރު 2" މިފަހަރު ރިލީޒްކުރަން ނިންމާފައި ވަނީ ހިންދީ ބަހުގެ އިތުރުން، ތަމަޅަ. ތެލުގޫ، ކަންނާޑާ އަދި މަޅަޔާލަމް ބަހުންނެވެ.