ބާޒާރުގައި ކަރާ މަދުވެ، މި ރޯދަ މަހު ފުރަތަމަ ފަހަރަށް ރަތް ކަރާ ކިލޯއެއްގެ އަގު 30 ރުފިޔާއާ ހަމައަށް ބޮޑުވެއްޖެއެވެ.
ރޯދަ މަސް ފެށުނުއިރު، ކަރާ ކިލޯއެއް ވިއްކަމުން އައީ 20 ރުފިޔާއަށެވެ. އެކަމަކު، މިދިޔަ ބުދަ ދުވަހު، ކިލޯއެއްގެ އަގު ހުރީ 25އަށް މަތިވެފައެވެ.
މިއަދު ބާޒަރުގައި ރަތް ކަރާ ކިލޯއެއް ހުރީ، 30 ރުފިޔާއަށް އުފުލިފައެވެ. މިއީ މި ރޯދަ މަހު، އެ ވައްތަރުގެ ކަރާ ކިލޯއެއް ފުރަތަމަ ފަހަރަށް އެ އަގަށް މަތިވި ފަހަރެވެ. އަދި، އަލަނާސި ކަރާ ކިލޯއެއްގެ އަގު މިހާރު ހުރީ 35 ރުފިޔާގައެވެ.
މާރުކޭޓުގައި ތަކެތި ވިއްކާ މުހައްމަދު އާރިފް 'ސަން'އަށް ބުނި ގޮތުގައި، ކަރާ ކިލޯއެއްގެ އަގު އުފުލުނީ ބާޒާރުގައި ވަރަށް ބޮޑަށް ކަރާ މަދުވެފައިވާތީއެވެ.
ކަރާގެ އަގު އުފުލުނުއިރު، ކަރާ ހެއްދުމަށް މަޝްހޫރު އއ. ތޮއްޑުއިން މި ރޯދަ މަހު ދުވާލަކަށް 10 ޓަނު ކަރާ މާލޭގެ ބާޒާރަށް ނެރެވޭނެ ކަމަށް އެ ރަށުގެ ދަނޑުވެރިން ވަނީ ބުނެފައެވެ.
މީހަކު ކަރާތަކެއް ހިފައިގެން: ރަތް ކަރާގެ އަގު ވަނީ 30 ރުފިޔާއަށް އުފުލިފައި ---ސަން ފޮޓޯ/ މުހައްމަދު އަފްރާހް
އިތުރު އެހެނިހެން ބާވަތްތަކުގެ އަގުތަކަށް ބަލާއިރު، ކަނޑޫދޫ މިރުހުގެ އަގުތައް އަދި ވެސް އަންނަނީ އުފުލެމުންނެވެ. އެގޮތުން، މިދިޔަ ބުދަ ދުވަހު 280 އަށް ނުވަތަ 230 ރުފިޔާއަށް ކިލޯއެއް ލިބެން ހުރި ނަމަވެސް، މިއަދު ވަނީ، 380 ރުފިޔާއާ ހަމައަށް ކިލޯއެއްގެ އަގު އަރާފައެވެ.
އޭގެއިތުރަށް، ޖުމްހޫރީ މޭވާ ކިލޯއެއް 130 ރުފިޔާއަށް ލިބެން ހުރިއިރު، ދޮންކެޔޮ ކިލޯއެއް ލިބެނީ 50އާއި 60 ރުފިޔާއަށެވެ. އަދި، މެލަން ކިލޯއެއް މިއަދު ބާޒާރުގައި ވިއްކަނީ، 55 ރުފިޔާއަށެވެ.