މަޝްހޫރު ދިވެހި ފިލްމު ޑައިރެކްޓަރު އަމްޖަދު އިބްރާހިމް (އަމްޖޭ)ގެ ސިއްހީ ހާލަތު ގޯސްވެ، ޓްރީޓޮޕް ހޮސްޕިޓަލުގައި ފަރުވާ ދޭން ފަށައިފިއެވެ.
'ސަން'އަށް މައުލޫމާތު ލިބިފައިވާ ގޮތުގައި، އަމްޖޭގެ ހާލަތު ގޯސްވެ ހޮސްޕިޓަލުގައި އެޑުމިޓު ކުރީ، ފުއްޕާމޭގައި ފެން ހެދުމުގެ ސަބަބުން ކަމަށްވާއިރު، އޭނާ ބަލިވެ އުޅޭތާ ދުވަސްތަކެއް ވެއްޖެއެވެ.
އަމްޖޭއަށް ޓްރީޓޮޕުގައި ފަރުވާދެމުން ދަނީ، ހިތުގެ ބަލިތަކަށް ފަރުވާދޭ ޚާއްސަ ޔުނިޓު ނުވަތަ ސީސީޔޫގައެވެ.
އަމްޖޭއަކީ، ދިވެހި ފިލްމީ ދާއިރާގައި މަޝްހޫރު ފިލްމު ޑައިރެކްޓަރެވެ. ފިލްމުތަކުގެ ސްކީރިންޕްލޭ ވެސް ލިޔާ އަމްޖޭ ޑައިރެކްޓުކުރި ގިނަ ފިލްމުތަކެއް ދިވެހީންގެ ތެރޭގައި މަގުބޫލުވިއެވެ.
މިގޮތުން، އުދަބާނި، މިލަ ހަނދުވަރު، ސަނދުރަވިރޭ، ބާރައިގެ ފަސް، ދިން ވޭނުގެ ހިތާމައިގައި، ދޮންކަމަނަ ފަދަ ފިލްމުތައް ހިމެނެއެވެ.
ދެހާސް ހަ ވަނަ އަހަރު އަމްޖޭއަށް ވަނީ، ޕާފޯމިން އާޓްސްގެ ދާއިރާއިން ފިލްމު ޑައިރެކްޓު ކުރުމުގެ ގައުމީ އެވޯޑު ލިބިފައެވެ. އޭގެ ފަހުން، 2011ގައި ބޭއްވި ފުރަތަމަ ފިލްމު އެވޯޑްސްގައި ބެސްޓް ޑައިރެކްޓަރުގެ އެވޯޑަށް ވެސް އަމްޖޭ ނޮމިނޭޓުވިއެވެ.